久違了嘅專欄（可想而知我幾懶🙈），節錄當中一段親身經歷，如果各位老細覺得好睇，咪係咁易過去JobsDB睇埋全文囉😂
當年我做HR，有位新同事戰戰兢兢走入人事部話我知mouse壞咗：「唔好意思呀，想問下可唔可以換一隻？」
我：「當然可以啦，你下次直接問Admin得喇，我而家幫你打去畀Susan講聲。」
幫佢解決咗之後，我行出去pantry斟水，經過Admin附近嗰陣，頭先喺電話度好好態度嘅Susan，以一副好唔耐煩嘅嘴臉招呼嗰位新同事：「麻鬼煩！返咗個幾星期又話mouse壞，你等等啦！」
我睇到一頭霧水，後來先發現原來有一班同事對住我，或者對住其他更高層嘅人，嗰啲態度同埋嘴臉同對住junior員工係唔一樣。
點解會記得咁清楚？因為我都做過新人，我都畀人恰過。
仲有一件事冇寫落今次個專欄度，以前我做新人嗰陣，去咗一間細公司見工，連埋老細同倉務都係得七條友（做啲醫療用品），臨尾本住禮貌而講咗句：「我會畀心機學嘢。」
個老細咁樣回應：「公司出糧畀你唔係學嘢。」
當年細細個未識得反枱屌柒佢，加上又冇其他選擇呢，最後好唔爭氣咁take咗offer，不過做咗一年半之後，見佢完全冇任何意識加薪，我唯有膽粗粗同老細提出，然後佢咁答我：「後生仔，唔好睇得錢咁重要，最緊要喺度學到嘢吖嘛。」
咁我即係要學嘢定唔學嘢呢？冇所謂啦，反正我嗰陣都係辭咗職。
https://www.facebook.com/JobsDB.HongKong/posts/10157533097700505