扮返工的日子

上星期終於last day喇,又要飄入個職場大海搵工,不過暫時想休息一段時間先。

好記得以前細個未搬出嚟住,轉工同埋失業喺阿媽眼中同殺咗人或者吸毒係冇咩分別,因為佢會覺得有工就做啦,仲揀呀?所以當時我係唔會同屋企人講,冇支持都算,仲要鬧,壓力千斤重,每次轉工嘅空白期我都會喺街遊蕩,一係就去嗰種大型連鎖快餐店打躉,hea到差唔多時間先返屋企。比較好彩嘅係,我搵工算好快手,印象中都係扮返工一至兩星期左右,但其實呢啲日子真係一日都嫌多。

嗰陣太細個,以為得我一個係咁,後來發現有唔少人都有相似經歷,再誇張啲都有,例如有大假唔敢放,因為屋企人會覺得老細唔鍾意,而我個朋友又好怕佢阿媽,結果十幾日大假全部斬件放半日,行下街,坐下快餐店,等夠鐘再返屋企。

收過唔止一個inbox都係類似嘅分享,有位女讀者返咗工兩日之後覺得唔適合,又唔敢同屋企人講,結果日日扮返工。前兩個星期又有一個case係咁,另一位讀者喺屋企人面前都唔可以失業,因為佢老竇係唔係都會覺得佢錯,結果要日日買co-working space嗰種一日通行證,扮返工兼順便搵工。

身邊人嘅支持真係好重要,我唯一嘅進步係已經搬咗出嚟住好多年,今次唔使再扮返工,但係有幾樣嘢都係冇進步過,就係失業唔會同阿媽講,去旅行唔會畀阿媽知,因為我仲係無法扭轉佢認為失業、轉工、旅行、休息,全部都係十惡不赦嘅概念。

如果你失業中,祝福你盡快搵到一份自己想做嘅工,必要時馬死落地行,探索嘅過程中總有得著。

如果你身邊有朋友因為各種原因失業,又或者失業嘅人係你嘅仔女,我懇求你畀啲時間佢哋慢慢搵,畀啲時間佢哋沉澱同摸索,唔好每一句說話都係責怪。

希望冇人會再好似我當年咁樣扮返工,呢種滋味唔好受,我理解,因為我係過來人。

error: