我發覺逢星期日都好似租咗畀婉儀寫Love Hotel專欄，已經係第三回，睇佢個伏筆好似仲有第四回。
＝＝＝＝＝＝＝＝＝＝＝＝＝＝＝＝＝
投稿人：婉儀 （又係佢呀，又係陳生）
首先講下我間Love Hotel嘅結構先，否則大家可能會睇唔明呢個分享。
客人入嚟之後，會經過一個停車場，其實只係一個空間較大嘅停車area，因為九龍塘呢啲獨立屋別墅同電視見到嘅有錢佬屋企係一樣。穿過呢個停車area之後就到接待處，即係我工作嘅櫃台，我稱之為G/F啦，呢層都有好多間房，而行樓梯上去嗰層係一樓，呢度更多房。
話晒我都做咗幾年，一般男女係咩關係勉強都分到，有啲係純粹交易，有啲真係情侶，有啲係偷情偷食，全部都好易睇得出，得一種係冇樣睇，就係變態，不過留返下次先講。
某次一男🧔🏽一女👱🏻♀️嚟幫襯，由停車場位已經見佢哋打情罵俏，女嘅三句唔埋兩句就打個男仔嘅心口同手臂，總之一個發緊姣，一個又好受落啦！登記嘅時候，個女仔👱🏻♀️突然話：「不如我哋分兩間房啦！」
條仔🧔🏽好明顯黑咗面，不過佢隔咗兩秒仍然選擇扮紳士：「好，兩間房囉！」
得啦！識做啦！個天都幫你哋，真係得返一間房，另一間啱啱退房仲未執好，我答：「唔好意思，今日星期六好full，暫時得一間房。」
條仔🧔🏽即刻話：「咁唔緊要啦！有冇兩張單人床？」
我心諗你收皮啦！快快脆入房唔好阻住我煲劇：「我哋啲房全部係雙人床。」
條女👱🏻♀️：「Ok啦咁，冇辦法。」
咁咪大家好做囉！話之你聽朝瞓醒一齊返教會啦！
跟住佢哋又開始打情罵俏，個女👱🏻♀️話：「我唔理呀，尖頭對腳呀！」
男🧔🏽：「你隻腳臭唔臭㗎？好委屈我囉！」
女👱🏻♀️：「好衰㗎你！唔同你一齊瞓呀！」然後又打個男仔心口。
就喺呢個時候，主角出場喇！清潔嬸嬸喺接待處隔離間房標出嚟：「有多間房喇，啱啱執完，靚女你等陣，轉頭拎埋毛巾畀你。」
氣氛即時陷入膠著狀態，條女👱🏻♀️呆一呆就話：「唔緊要啦！唔使麻煩你喇。」
盡忠職守嘅清潔嬸嬸完美示範何謂專業：「唔麻煩，我都係咁做之嘛，等等，好快拎毛巾畀你。」
我真係忍笑忍得好辛苦，結果……佢兩個一人一間房，一個樓上，一個樓下🤣🤣
佢哋呢場戲真係好尷尬癌，一方面依依不捨，另一方面又要顧住面子。當佢哋分別入房之後，我就同清潔嬸嬸講：「你破壞咗人哋好事喇，佢兩個其實好想同房㗎，扮嘢咋，你睇唔出咩？」
清潔嬸嬸：「咩呀，我執房嗰陣聽到佢哋又話要兩間房，又話要單人床，我咪嗱嗱聲執完出嚟畀佢囉，乜唔係㗎？後生仔女咁扭擰㗎咩？我老公好直接㗎喎，一嚟就除褲。」
呢個故事教訓我哋，幸福真係要自己爭取，學下清潔嬸嬸個老公啦！直接啲！而家成晚要著住條褲瞓喇，幾無謂呢！屋企冇床咩？
＝＝＝＝＝＝＝＝＝＝＝＝＝＝＝＝＝
婉儀投稿
《第一回》女仔唔好亂飲醉
http://hkofficedaily.com/?p=4208
《第二回》花美男
http://hkofficedaily.com/?p=4218
《第三回》幸福要靠自己爭取
http://hkofficedaily.com/?p=4222
《第四回》睇人唔好睇表面
http://hkofficedaily.com/?p=4231
《第五回》菲菲 1
http://hkofficedaily.com/?p=4240
《第六回》菲菲 2
http://hkofficedaily.com/?p=4199