4日3夜禁室培育 完全唔覺自己去過大阪

早排日本重新開放畀旅客入境,公司有位年輕嘅女同事即刻同新男友去咗轉大阪,不過佢返嚟之後就猛咁投訴。

「好似禁室培育一樣,住心齋橋附近,三餐都喺心齋橋食,就咁樣過咗4日3夜,連美國村咁近都冇行過去,來來回回心齋橋筋商店街,完全感覺唔到自己去過大阪。」

我:「即係其餘時間喺酒店呀?」

「係呀!起身就做,落街食完嘢又話要上房做,夜晚又做,凌晨又做,我話我想行街呀!佢話街幾時都有得行,返到香港就冇機會成日搞嘢,我最後嬲咗,你幾懶唔想出街都好,hea極都同我去下黑門吖,我真係覺得自己似出埠賣淫,我估出埠陪客都仲多啲機會行街,唔知今次去大阪做過啲乜,淨係做愛。」

突然有位中女同事插嘴:「好羨慕呀!你男朋友唔係懶,佢係勤力,我同老公3年冇做喇,佢掂都唔掂我,有時開到口話想要,老公就會話好攰,如果有個男人禁錮我喺酒店做足4日3夜,我餐餐食Lawson雞扒唔落街都制呀!阿妹你身在福中不知福!」

你哋不如changing🙈🙈🙈……但係中女同事肯,年輕女同事都唔肯,到時中女同事個老公就會突然「生猛」日日要,年輕女同事個新男友又寧願出街唔返酒店房㗎喇,我都幾肯定係咁。

或者一切都唔關年齡事,純粹係熱戀期同埋結咗婚十幾年嘅分別🤷🏻‍♂️

error: