「老闆，我好鍾意返工，唔想放假，不如你星期六日都休息下啦，又或者夜晚先返嚟埋數囉！我搞得掂㗎喇！」佢唔係講緊晦氣說話，唔係玩嘢，更加唔係撞邪，呢個員工已經連續兩個月冇放假，佢以各種「形式」每日留守。
我舖頭係幫人整電話同埋買賣二手機為主，仲會賣一啲電話同電腦嘅配件，二線商場舖，所以係年中無休。以前有個partner同我一齊做，但後來partner一家大細過咗多倫多而退股，得返我自己一個做，加上我出面另外有嘢搞，所以就請咗個員工睇舖。
我本身淨係需要佢返5日，即係cover我星期一至星期五有其他嘢做嘅日子，返門市有得畀員工放星期六日都算係咁啦，呢兩日就由我自己睇舖囉，點知有一次星期六佢走咗返嚟。
我：「放假喎今日，你係咪睇錯日子呀？」
「唔係，我見冇嘢做，又咁啱行過，咪入嚟陪你坐下囉！」
我舖頭喺觀塘，佢屋企喺黃大仙，雖然算近，但係點樣咁啱呀？
星期日，佢又咁啱行過……
我：「你走啦，唔使留喺舖頭喎！今日星期日嚟㗎，星期六你已經喺舖頭坐足成日，放假你去玩啦！」
「留喺屋企好悶㗎，我得一個朋友，半年前都走埋，你畀我喺舖頭幫手啦，我又唔會同你計加班嘅，自願返嚟舖頭之嘛！」
最初我以為佢朋友所謂「半年前都走埋」，係類似我partner嗰種離開香港，點知原來唔係，佢朋友半年前真係重病走咗，其實我呢個員工已經65歲喇，佢個friend走嘅時候就69歲。
最初幫舖頭請店務員，因為人工出得萬幾蚊唔算好高，我係開放任何年齡人士見工，本身請咗個後生仔，點知對方返工當日no show，從此搵唔到人，結果我退而求其次請咗而家呢位員工，仲記得佢第一句就咁問我：「我65歲，你介唔介意？」
我答佢唔介意，最緊要幫到手，幾多歲唔係問題，人人都會老，如果第日自己生意失敗，我都希望65歲仲有人請，更何況睇舖、收手機、賣下周邊產品都係手板眼見功夫啫，點會做唔掂吖？
做落之後發覺呢位65歲嘅員工唔止ok，仲要「過份盡責」，晚晚遲收舖OT唔願走，任何紅日都會返嚟，初初就係好似上面咁樣，搵啲藉口借頭借路話行過順便返舖頭打躉，一坐就坐足全日，最終做咗大半年，一日假都唔願放。
我話勞工法例唔可以唔畀員工放假，咁樣係犯法，所以星期六日我都係照返工，唔想大安旨意瞓到自然醒，然後丟低佢一個人睇舖，但係呢位65歲員工真係話極都唔聽，後來我忍無可忍……星期六日照出糧畀佢，用月薪除30日，佢返多8日，就畀多8日錢，當OT咁計。
「我朋友唔多，得一個老友識咗幾廿年，半年前佢都走埋，年頭仲同佢兩個人過年，估唔到係最後一次見。」
講講下我自己都覺得好唏噓，雖然自己不過係40歲，但隨住年紀漸大，身邊啲親戚同長輩開始走下一個，走下又一個，兩年前結婚先發覺我班親戚係湊唔夠兩圍，年紀大，生離死別嘅場合自然愈嚟愈多。
我：「你有冇結婚呀？老婆仔女呢？有時放假搵佢哋出街飲茶囉，唔好一年365日都返舖頭啦，我唔畀你放假真係犯法㗎！」
「我老婆4年前走咗喇，有一個仔，結咗婚，成家移民，唔好話飲茶啦，想佢打電話返嚟都難，我喺屋企好悶好屈，冇人同我傾計，呢度仲可以同客傾，同隔籬舖傾，時間比較容易過，難聽啲講句，如果我喺屋企死咗真係冇人知。」
65歲都唔係好老啫，但可能係老友走咗，老婆又已經唔喺度，個仔去咗外國又兩三個月都唔打一次電話返嚟，連平時WhatsApp都已讀不回，所以佢一講到呢啲話題就會特別灰。
聽過好多人講，老人家如果冇嘢做，冇人同自己傾計，一個人喺屋企屈住屈住反而會短命啲，我都唔知呢個講法有冇道理，不過老實講句，星期一至五我只會返去收舖，次次見到佢都好失落，仲猛咁搵話題同我講，好似想用盡辦法留喺舖頭多一陣，反而星期六日佢就最開心，因為我會喺度同佢傾計。
有時我又會諗，每個人其實都注定要孤獨面對死亡，去到最後都係得自己陪伴自己，好似我呢位員工咁樣，一早有心理準備，或者將來會更加識得點樣從容面對呢！唉，連我都灰埋。