Interview，個經理話呢份工壓力好大，問我頂唔頂得住：「之前兩個做咗半年左右，短囉，啱啱開始熟又話走，我要請人再重新教過都麻煩㗎！講真如果你面皮太薄未必頂得住，急起上嚟啲客會『媽叉』你，我哋辦房師父個個都係性格小生，多嘢做又會詐你型，有句成語叫咩呀……腹背受敵！你覺得自己抗壓能力點吖？」
聽完之後我禮貌微笑，好淡定咁回答經理：「你都見到我份CV啦，失業9個半月，然後外母話我食軟飯，後悔將個女嫁畀我，老婆上星期返咗外家，今朝嚟見工之前睇返record，淨係jobsdb我都send咗258封CV出去，一係冇回音，一係見完唔請，今時今日我仲未跳樓，你覺得我夠唔夠抗壓？」
睇得出個經理係好人，佢聽完先係呆一呆，似乎唔care我send咗幾多份CV，但就好關心我嘅婚姻：「你老婆咁現實？」
我：「其實唔係因為我失業先走嘅，導火線係我外母，日撚日……sorry！」
經理：「唔緊要，你可以講粗口㗎！」
我：「Ok，外母日撚日話後悔將個女嫁畀我，單單打打，又問我係咪想食軟飯，仲鬧我老婆冇眼光，唔識揀老公，我好忍得㗎喇，當面冇發過外母脾氣，係返到屋企閂埋房門先喺老婆面前鬧爆外母，可能鬧得太激動啦！咁我老婆咪嬲囉，嗰個始終係佢阿媽，所以我老婆就搬返外家，叫我冷靜下先。」
經理：「如果係我都會激動啦，一家人有事應該互相支持，唔使講埋啲咩冇眼光呀，食軟飯呢啲嘢喎！」
我：「不過仲有好多事夾夾埋埋嘅，有個friend好耐之前問我借咗兩萬蚊，當時好景幫得咪幫囉！之後我失業吖嘛！叫佢還錢即刻拖嚟拖去，話分期每個月還500，人窮志短，我都要接受啦！點知還咗一個月就失蹤，都幾好笑，咁多年朋友原來只係值兩萬蚊，呀唔係，佢還咗一次500，我哋之間嘅友誼值19,500！」
經理：「咁你之前做嘢冇積蓄？」
我：「有！所以失業頭半年仲頂得順㗎，之後就愈嚟愈辛苦，結果我拎咗筆定期試下玩股票，諗住賺少少都好啦！」
經理：「聽你語氣應該輸鳩晒啦！」
我：「係呀！財不入急門，我仲要本身唔熟股票，冇興趣㗎，諗住賺返兩餐晏仔咋，結果蝕咗十幾個，我咪安慰自己囉！未蝕嘅，未蝕嘅，係帳面跌到冇晒啫，總之我一日唔放，將來都有機會升返，最近開始要透支信用卡交租喇，呢下先最心寒！」
經理：「你冇搵其他工咩？馬死落地行，咩工都要做住先啦！」
我：「有呀，冇full time請，咪做住炒散先囉！中菜廳侍應做過，嘉年華工作人員又做過，又去攞咗個保安牌，實Q都撈，不過出面都係替更多，好唔穩定。」
冇呃個經理㗎！今朝嚟見工之前睇返record，淨係jobsdb都send咗258封CV出去，未計其他平台，一係冇回音，一係見完唔請，人到中年搵工真係唔容易，降低要求去見工，人哋怕你騎牛搵馬，當佢公司係踏腳石，再唔係就嫌我年紀大，其實我都係三十幾歲啫！
我：「而家同你傾計好似講得幾輕鬆，其實日日上求職網搵工真係好灰，個心態又奇怪，搵到冇晒信心，唔想見人，不過為咗搵食又要硬住頭皮，講真我到今時今日仲未跳樓都算係咁，你覺得我呢種算唔算抗壓能力吖？相對於畀客屌，畀辦房師父屌，我諗都冇乜所謂㗎喇，屌吖屌吖！朝九晚六任屌！」
經理：「O…k，咁又唔需要做傻事嘅，條條大路通羅馬，不過我哋係朝十晚七，你最快幾時可以返工？」
我：「今日！」差啲想更正返朝十晚七任屌，但經理請咗我，都係唔好講太多粗口喇！
經理：「而家都晏晝，半日好難計，聽日啦好嘛？」
我：「得！冇問題！多謝你先！」
結果相隔9個月之後，我終於搵到full time喇！我唔肯定個經理係buy我嘅抗壓能力，抑或係可憐我呢段時間嘅遭遇，唔緊要啦！最重要都係有錢開飯，盡快找返啲卡數先。（完）