有時我都唔明，無仇無怨，大家萍水相逢成為同事，有冇必要互相為難呢？事緣我搵到份新工所以辭職，已經同直屬上司一早溝通好，工作方面亦順利交接，Last day前兩個禮拜我就同HR講定要reference letter離職證明啦，因為呢part要人事部搞，由佢哋負責print出嚟同埋吸公司印。
去到真係last day嗰日，我走去人事部交返職員證同埋櫃桶鎖匙，咁就問問有離職證明未啦，點知個HR一嚟已經好似食咗火藥，對住我咆哮：「你都走啦！仲加重我工作量？行開唔好煩我，好多嘢做呀！」因為個HR聲浪都幾大，我見附近有其他部門嘅同事都擰咗過嚟。
唔係呢一刻先要求佢畀離職證明我㗎！半個月前已經講定，何況離職證明呢啲嘢，正常你都有template，真係咁難處理？Ok，你話忙，冇問題，係咪需要用呢種語氣呢？講真我唔係嬲你畀唔到，我係嬲你用呢種態度，所以嗰一刻我已經有啲㷫，不過忍住先，冷靜……
新公司當時知我呢份工仲做緊，叫我稍後先補返離職證明，雖然唔算急，但都要有個期吖，我唯有好聲好氣再問個HR：「請問大約幾時有？我要覆返新公司，係咪會寄畀我定係點？」
個HR竟然話：「新公司？咁快有offer？即係之前偷偷去見工啦！仲想我畀離職證明你呀？」
Bu你阿麼吖！本身諗住好嚟好去，你條八婆玩嘢吖嘛，我就用雙倍嘅聲量同佢講：「我幾時去見工關你鬼事呀！比齊啲文件係你責任嚟㗎！我last day仲要受你氣？係咪玩吖！我奉陪到底，一係我叫老細親自開離職證明！」
我大聲喝完之後，成個office靜過太空，無所謂呀，我last day喇，做埋呢幾個鐘就走，你就唔同喇，仲要繼續留喺呢間公司，咁睇下邊個瘀啲囉！
其實呢啲離職證明只要跟template改返個員工資料同日期就搞掂，當你要好謹慎核對資料再請示埋我直屬上司，相信幾粒鐘都完成啦，半個月前講定都畀唔到我，仲要咁惡？
好似進行咗個社會實驗咁，我一次過證實咗兩件事，第一，職場真係好多西人，大家無仇無怨，我同人事部嘅工作基本上冇交集，完全冇得罪過你，點解要咁樣對我呢？唔可以smooth啲㗎咩？抑或留難個同事會帶畀你成功感？
第二，人的確係欺善怕惡，鬧完佢隔咗15分鐘就畀咗離職證明我喇，聽聞有啲同事離職半年都未收到，哦！原來要靠惡同埋靠大聲先至有用，返工返到咁真係好悲哀，換言之有禮貌就要畀你恰？呢啲西人個腦係咪有事㗎？問你攞離職證明啫，問你攞錢咩！講到尾，你做HR都係打份工咋，係要阻人搵工搵食，心理變態㗎？
***以上投稿部分已經完結，以下係關於離職證明探討，首先講下勞工法例，其實目前香港嘅《僱傭條例》並冇規定僱主喺員工離職嘅時候，必需發出離職證明，即係我哋通常講嘅reference letter，但係離職員工仍然可以用其他方法，證明自己真係喺某一個時期之內，曾經喺嗰間公司裡面任職，例如向新公司出示你嘅糧單、稅單，或者強積金供款紀錄。
咁點解唔簡單啲，畀新公司睇你之前嘅僱傭合約？正常嚟講，我哋喺某公司工作多年之後，就算職位一樣，但薪酬可能已經同當初僱傭合約嘅描述唔同咗，咁最後都係要搵返文件去證明你最新人工係幾多，做到邊一日離職……等等。
其實離職僱員仲可以引用《個人資料私隱條例》去做資料查冊，要求你嘅前僱主提供涉及個人私隱部分嘅文件，包括該年度列有聘用期嘅報稅文件，詳細可以先向勞工處查詢。
坦白講，雖然《僱傭條例》並冇規定僱主要畀離職證明，但其實一般公司都會提供，reference letter通常會顯示員工名稱，任職年期，最後任職嘅職位……等等，有唔少公司亦會加幾句描述，講下員工嘅優點，祝同事離職後一切順利。
有機會再同大家分享多啲職場見聞同埋勞工法例。（完）