唔知係好彩定唔好彩，我兩個月前搵到份工，當時我已經冇嘢做㗎喇，絕對可以即刻返，但係個阿姐話：「你呢個position係replacement，有位同事做埋呢個月先走，老實講我唔想你哋太多交流，驚你學埋佢啲衰嘢，所以你下個月先返啦，到時我親自教你，有冇問題？」
嗰陣冇其他offer，梗係冇問題㗎！不過就咁聽個阿姐講幾句已經覺得人事關係複雜，正常你都想舊人帶住新人啦，竟然唔想我同即將離職嘅同事交接？仲要講到出口？奇怪啲囉！多少聞到伏味，可惜都係嗰句，我手上冇offer，根本冇得揀，所以咩都應承咗先。
一個月後我就準時返呢份工啦，個receptionist打內線畀HR嘅時候已經好奇怪，聽到佢講：「今日有新人咩？唔知呀……咁樣樣……不如你出嚟處理返啦！」
我當時懷疑過自己搞錯，難道唔係一個月後先返？愈諗就愈不安，終於等到個HR行出嚟reception，個HR姐姐認得我呀，之前first in我係見佢先㗎！但佢望到我嘅時候一臉驚奇，碌大隻眼問：「咦！係你呀？你做咩返工呀？冇人通知你cancel offer咩？」
我：「通知啲咩呀？」不祥預感已經湧上心頭。
HR姐姐：「Dorothy冇做喇喎！」解釋下先，Dorothy即係一個月前話請我嗰位阿姐。
我：「冇做？咁即係點呀？」
HR姐姐：「佢冇做之後，啲position應該frozen咗，而家你條team轉咗第二個阿頭。」
我：「Frozen咗？但冇人通知我唔使返喎！Dorothy之後仲打畀我confirm啲細節。」
HR姐姐：「咁就弊喇！可能佢臨走唔記得通知你，一係……你入嚟先，我幫你問一問。」
咩幫我問一問呀？你哋請咗我㗎？當嗰個Dorothy冇交帶，但你先係HR喎！有咩決定同改動唔係應該由你通知求職者咩？
好自責冇簽定合約，如果佢唔認數就冇晒保障，雖然我唔係特登辭工過嚟做啫，不過都等咗呢份工一個月吖，假設一早話唔請，我應該會好落力再搵工，唔會疊埋心水返呢份。
結果我坐埋一邊等咗15至20分鐘左右，過程好煎熬，因為睇住個HR姐姐同一個男人密密斟，一路講又間中望過嚟。
佢兩個傾完一輪終於行埋嚟「派彩」，HR姐姐：「呢個係你嘅新上司Martin！」
Martin又接住講：「你好！因為我都係啱啱接替Dorothy，完全唔知佢請咗你，人事部又以為Dorothy同你講咗，Anyway，唔緊要啦，反正我仲要請一至兩個人，你照原定返工先，公司都唔想你為咗我哋轉工，最終又冇工返，呢個係Dorothy嘅責任，唔應該由你承擔。」
立立亂呢間公司！都話我本身係失業，唔係特登辭職轉過嚟，所以呢位新上司Martin擺明唔知我background，不過有一樣嘢佢冇講錯，呢個責任唔應該由我承擔，所以我亦順理成章照常入職。
入職後其實Martin同班新同事對我唔差，有講笑，有傾計，食lunch都有叫埋我，但就冇嘢畀我做，淨係交低啲文件同資料叫我睇，簡單啲講就係投閒置散。
原來Martin係空降取代上一位阿姐Dorothy，而Martin又帶咗幾個跟開佢嘅人過嚟，即係有班頭馬同埋合作無間嘅近身侍衛，所以我就變成一個外人。
幸運地，Martin呢黨人行為同態度上並冇孤立或者排擠我，佢哋只係唔畀嘢我做啫，頂盡叫我去影印，一啲都唔爽㗎！返工如果太過得閒，係好難捱咁多個鐘，時間會過得好慢。
呢種日子持續咗一個星期啫，然後我就被調去另一組喇，Martin同我解釋另一個部門要人，比佢哋更有急切性，所以調我過去幫忙，其實我有鬼得揀咩，畢竟試用期第一個月內郁我，佢係可以即時通知兼無須賠錢。
轉咗去新team又係另一段投閒置散嘅日子，又話急切性要人？原來呢，呢條team早排有個人走咗，但佢哋工作量又唔多，高層講過如果冇需要咁多人就cut budget，呢條team個阿頭就唔甘心畀人cut一個位，點都要霸住先，所以見我咁得閒就拉咗我過嚟攝位。
呢條新team啲人就冇咁友善喇，因為佢哋圍內已經好熟，完全當我係稻草人。
過多一個星期，我又轉team喇！個阿頭直接走嚟同我講：「Sales Team唔夠人呀，你過去幫幫手先！」
我：「但我唔係做開Sales喎，我唔識sell嘢！」
阿頭：「唔係sell嘢，係assistant啫，幫啲Sales處理後續同埋文件，唔使出去見客㗎！」
點解我唔介意做人球畀佢哋亂咁舞？因為之前投閒置散嘅日子裡面，我已經偷偷地再搵工，得閒吖嘛！有一日仲扮病請假，其實去咗interview，我覺得嗰份工都有啲機會，所以心態上就做住先，當係等另一份嘅結果。
呢鑊我真係覺得畀人呃喇，首先去咗Sales Team之後，我發現之前個阿頭原來另外請咗人，即係求其搵個藉口轉我去其他部門啦！其次係，我喺Sales Team雖然唔使出去見客，但唔等於唔使sell客，個職位係要不斷同client電話聯繫，唔單止有sell嘢成份，仲有客戶服務成份，會比客鬧㗎！
傻下傻下又做多兩個星期，我好唔鍾意Sales Team嘅工作，唯一優點係忙，時間會過得快啲，與此同時，偷偷地去見嗰份工真係出offer請我，所以我都打定辭職信，費事再喺呢間行政咁混亂嘅公司裡面做，一直畀人當波咁踢。
因為Sales Team係堅忙，大家步伐好急速，正當我猶疑緊幾時遞信嗰陣，個Sales Manager竟然先下手為強！！！
Sales Manager：「唔好意思，我觀察咗你呢兩個星期嘅表現，似乎唔係好適合我哋部門，我覺得你唔夠主動。」
我唔係Sales底，本身就唔係做呢個位，你想我幾主動呀？總之個Manager講完一大輪就係想同我終止合約，今次唔使轉去其他team喇，係直接分手，仲好啦！反正我想走，而家唔使自己開聲，點估到最後有個小驚喜。
輾轉間去人事部搞離職手續，我想講呢……佢哋個HR姐姐都轉埋人，嘩！你哋公司真係好似走馬燈咁換人，我都唔知點形容，但諗返自身經歷，呢間公司轉人轉到七彩其實好合理。
新HR：「因為你啱啱做超過一個月，按照勞工法例，試用期第二個月起係需要畀7日通知或者7日代通知金，咁我哋會陪多7日人工畀你，而家走得㗎喇！」
多謝晒！我真係啱啱過一個月，而家有新offer，仲收多7日糧，好在自己頭先猶疑未遞辭職信咋！
所以我都唔知好彩定唔好彩，返咗一個月多啲，借住投閒置散嘅日子搵到另一份工，金錢上亦有進帳，叫做係不幸中之大幸啦！但呢啲經歷一世人一次就夠喇！（完）