23歲仔銀行有550萬 堅拒升職只想Hea做

父母喺我好細個嘅時候就分開,我同阿哥跟阿媽住居屋,而阿爸因為已經再婚,所以一年見佢嘅次數大約係3次左右,父母嘅恩恩怨怨隔咗好耐,我同阿哥細個有嬲阿爸,但經歷咗咁多年都冇咩感覺喇,反正連阿媽提起阿爸都唔再激動。

今年年初,阿爸唔知咩事良心發現,佢話想畀層樓我同阿哥,原因係咁多年都冇咩理過我哋兩兄弟,不過我哋兩兄弟完全冇興趣,一來阿媽唔想要佢恩惠,唔想搬去阿爸住過嘅地方,二來嗰層樓喺屯門嗰啲半山,咪玩啦,住開九龍,返工又九龍,而且層樓嘅位置真係半山,出入要靠shuttle bus嗰啲,煩唔煩呀?阿哥仲講咗句:「我唔想買包煙都要搭shuttle bus出屯門市中心呀!」

屯門半山應該有便利店啩,我真係唔知,亦冇興趣去睇,而且開頭唔覺阿爸咁好心,所以一笑置之,點知佢最後嚟真,知我哋唔會住入去,結果就賣咗層樓,將啲錢分畀我哋兩兄弟,一人竟然分到550萬,換言之層樓係過千萬,究竟有幾on9先會用千萬喺屯門買半山樓呢?你搭車經屯門公路途中見到喺側邊個山嗰啲喎,我知好多人當寶,但請原諒我同阿哥都唔識欣賞個location,更何況我哋冇車,唔想靠shuttle bus度日。

據了解層樓唔係一人分550萬就等於總數1100萬,阿爸話佢都扣起咗啲錢做律師費同埋先前嘅裝修成本呢樣嗰樣,是但啦,1000萬又好,1500萬又好,我都唔會明白點解呢個價錢要去買屯門樓。

550萬,如果話一啲感覺都冇就一定呃你,不過我哋同時諗緊阿爸係咪有絕症之類,佢話唔係,純粹係另一頭家都有個仔,而當年同阿媽一齊嘅時候,佢好窮畀唔到咩我哋兩兄弟,而家搵到錢唔想咁唔公平……真係咁簡單?是但啦!

其實呢,我哋對呢個阿爸感覺真係唔大,一年見面嘅次數5隻手指數得晒,試問有幾深感情吖,亦正正因為咁,唔通你畀錢我哋唔要咩!佢又真係冇為我哋屋企付出過,聽講當年離婚,阿媽仲幫佢頂咗筆十幾廿萬嘅債。

阿媽堅持唔要一分一毫,佢唔想要阿爸任何好處,咁你唔計通漲都拎返幾廿萬,當係填返當年幫佢孭債條數都得啩!阿媽好硬頸堅持唔要,但就話我哋兩兄弟一定要收,因為我哋收得起,絕對有資格收,放心啦阿媽,你講呢句嘅時候已經收咗㗎喇,e-banking check過係可用結餘。

阿哥拎住550萬第一件事係同佢女朋友結婚買樓,層樓500幾萬,阿哥一炮過畀晒,叫做有瓦遮頭單就冇多餘錢剩,我自己唔想咁樣,因為而家同阿媽一齊住嗰間居屋嘅面積其實唔細,我唔想拎一大嚿錢出嚟買一間細過而家居住環境嘅屋,而且我都想同阿媽住。

如果用部份比首期再留返啲錢傍身,然後再慢慢供呢?我都唔想,我啱啱出嚟社會做嘢,而家份工得12000,唔想咁快供樓,何況由細到大都覺得喺香港買樓係好on9,有機會都想去外國,不過唔係而家。

我都驚啲錢齋擺喺度會貶值,但自己唔識投資,唔熟咩基金債券,更加冇信得過嘅人去幫忙。我有嘗試玩股票,但輸到仆街,聽講上年買咩都升,可惜我今年先有錢入場,一買就隻隻都跌,暫時帳面損失7萬,擺喺度當牆紙之餘,亦更清楚自己真係唔鍾意做任何投資。

有諗過買車,12000蚊人工揸車返工型唔型先?但諗諗下先醒起自己冇車牌,又唔想學,都係算啦!

我而家返工嘅心態轉咗,月薪12000嘅Sales Support工作,Hea下Hea下又一日,每日見到其他同事忙到甩轆,我都有種置身事外嘅感覺,真係好爽,夠鐘打卡走,返屋企煲劇打機,我知500幾萬唔係好多,但我得23歲咋,你想我拯救地球咩!

早排老細話要升我,因為Sales Support做得好同埋攞咗經驗之後,下一個step係會升做Sales,做Sales唔止底薪會加到15000,另外公司仲會畀客我跟,即係再有佣,每月又會多幾千,然後我同老細講:「唔升得唔得?」

老細個表情好驚訝:「點解唔升?」

我:「唔鍾意見客,睇到同事咁忙又咁大壓力。」

老細由驚訝轉為失望:「咁你一世做Sales Support,一世拎住萬二蚊人工呀?」

係喎,老細唔知我呢個公司最低層員工銀行戶口有500幾萬,佢對我完全冇上進心當然會費解:「我可唔可以考慮下先?」

老細:「考慮啲咩呀?」

我:「考慮下升唔升。」

老細嘅表情難以置信。

我到而家為止都冇覆過老細接唔接受升職,佢亦都冇再追問,斷估係對我太失望,然後件事不了了之。我都唔知呀,我小朋友嚟咋,呢幾百萬當然唔係多,但自己變咗唔急於搵錢,只想輕鬆過生活,畀啲時間我消化啦!

其實我未辭職算係咁啦,12000蚊人工照做住先,因為嗰種唔等錢使,唔等出糧,唔想升,唔想同人爭,然後睇住同事忙到頭暈轉向嘅感覺真係好爽㗎!

Btw,除咗阿媽、阿哥同埋阿嫂,身邊冇人知我銀行戶口有幾百萬,女朋友都唔知,因為我知道自己條女都唔係好人,我而家呢份糧佢都成日叫我買嘢,我驚佢知道之後會有部署,一陣搞嘢嘅時候夾住我迫我中出咪死,所以必定要保密,自己keep住暗爽就算。

投稿:廢青一名

error: