同事舉家移民英國，前兩個星期放工約埋食飯道別，可能飲大兩杯又依依不捨，我膽粗粗問就快搬去倫敦嘅Isaac：「記唔記得好多年前嘅Facebook，如果你嘅朋友add咗其他人，Facebook係會有notice顯示。」
Isaac：「好似係，而家唔會啦，靜雞雞add任何人都唔會有notice彈出嚟。」
唔知各位有冇印象，當年Facebook只要你個friend add人，其他人係會知你add咗邊個，後來改咗先唔會咁樣顯示。
我：「有件事想問你好耐，唔好介意。」
Isaac：「問啦，婆婆媽媽！」
我：「點解你結婚前兩日先add你老婆Facebook嘅？」
Isaac笑而不語。
其實佢老婆Mimi都係我同事，呢段婚姻好經典，Isaac係IT，Mimi係會計，公司有兩層，佢兩個唔止唔同層，我仲好肯定Isaac同Mimi只係知道對方係同事，疏到連招呼都唔會打嗰隻，從未見過佢哋傾計，更枉論咩暗撻，因為會計班女人不嬲都係獨家村，咁其實IT都係。
我肯定見過Mimi男朋友嚟公司樓下接佢，仲記得Mimi條仔外型好MK，又帶點不羈，揸電單車嘅，有少少似肥屍，即係《古惑仔3之隻手遮天》裡面梁焯滿嘅造型；同樣地，Isaac都有女朋友，我未見過真人，不過Facebook見過相，後來Isaac同佢條女分咗手先冇再post。
如果真係要我諗Isaac同Mimi第一次打招呼嘅場景，冇記錯應該係一次放工去卡拉OK，老細請客，都有幾多員工出席，成班人坐party room真係好熱鬧，有啲高層又係咁灌人飲酒，當晚都玩得好癲下，但由於事隔多時，細節就唔記得喇。
隔咗幾個月，突然有一日見到Mimi大肚，由於嗰陣剛剛過咗農曆新年唔算好耐，我好深刻印象同Isaac講過一句：「而家啲同事咁嘅，結咗婚都唔派利是，但早兩個月我先見到Mimi收人利是，搞錯呀！」
Isaac：「唔好理人咁多嘢啦！大肚一定要結婚㗎咩？」
點解我咁記得？因為Isaac本身係一個好口臭嘅人，平時都係佢發起講mean嘢、賤嘢、咸嘢、仆街嘢，而家由佢把口叫我唔好理人咁多嘢？你條社會敗類做咩無啦啦扮傑青呀？
嗰一排Isaac係反常㗎！靜咗好多，我一度擔心佢唔知係生癌定愛滋病，冇理由邪惡核心會180度大轉變㗎嘛，又過多一排，Isaac派帖畀我，佢明明同條女散咗㗎喎，都唔夠一年。打開張帖睇，因為張帖唔係傳統紅色，係銀白色比較西化嗰種，有男女雙方英文名，Mimi Chiu？
我：「咁橋嘅，我哋個會計又係叫Mimi Chiu，叫Mimi咁hit㗎咩？」
Isaac：「係嗰個Mimi Chiu。」
我：「你同會計Mimi Chiu結婚？」即係話我一直怪錯Mimi Chiu，佢新年冇派利是因為未結婚，而Mimi Chiu個肚就係Isaac嘅。
Isaac：「有咗小朋友，梗係要負責任啦！」你早排明明反問我大肚一定要結婚㗎咩……
我：「你哋幾時一齊㗎？」
Isaac：「嗰次公司唱K之後，原來我同佢都係差唔多時候失戀，你班友仔又走晒，我同Mimi咪轉埸再飲囉。」
轉咩場吖，轉床就轉床啦！即係嗰晚醉醉地咩咩埋，有咗BB，而家結婚，明晒。
我都幾肯定Isaac同Mimi係冇中間拍拖甚至做朋友嗰個階段，完全係skip晒，因為唔止我，仲有其他同事都見到Isaac同Mimi喺結婚前兩日先互add Facebook，即係佢哋之前並唔係friend嚟。
去飲當晚，Mimi喺台上致詞喊到豬頭咁，同事個女（小學咁上下大）仲問：「個姐姐點解喊嘅？」同事答：「嫁畀鍾意嘅人咪喊囉！」然後婚禮上就播出新人嘅成長片段，Mimi同Isaac係冇任何生活合照，而我見到成長片段裡面有幾張相，係Mimi同佢以前個男友肥屍嘅合照，係呀，肯定係當時接佢放工個翻版梁焯滿，其中一張係兩個坐住電單車㗎！呢個成長片段係咩事呀？Isaac又好似冇嘢咁，不斷同人劈酒，唔好再飲酒喇，累死人㗎！
老細唔知頭唔知路仲笑得好開心，聽講封咗好大嘅人情畀呢對新人，話難得同事喺度做可以識到另一半喎！佢一定唔知係自己當時請唱K先會搞出人命。
點都好啦，而家Isaac同Mimi都好好，個仔又得意，祝佢哋喺英國新生活愉快，人生有時就係咁錯有錯著，可能冥冥中真係有主宰。
投稿讀者：係我呀，我係IT Ben呀
好在Isaac媽媽當年冇叫Mimi諗清楚先嫁🤣
《未來奶奶叫準新抱諗清楚先嫁》
https://hkofficedaily.com/?p=13308