20個同事18個中 剩低兩個要返工

其實公司之前就冇Work from Home呢樣嘢嘅,但由於有同事確診,佢住緊嗰幢大廈較早前仲要被圍封,結果老細就死死地氣咁宣布,check到係陽性嘅同事可以留家工作,冇事嘅人就繼續返Office,係咁易叫人消毒就算。

老細更加要求每位同事兩日做一次快速檢測,但係公司並唔會有任何資助,其實都想趁住呢個機會問吓大家咁樣係咪正常?因為我有朋友嘅公司會大量購入快速檢測盒,係出面某一隻公價100蚊左右嘅牌子,員工買就只需畀20蚊,所以想知道大家嘅公司有冇金錢上嘅資助。

Anyway,唔知係確診嗰位同事一早散播咗,抑或係呢個omicron真係好似傷風感冒咁易中,自己快檢之後呈陽性嘅同事愈嚟愈多,真係一變四,四變十二,唔使兩個禮拜已經有十幾個同事中咗,須知道我間公司唔計老細都係得20人。

講開又講,我懷疑老細自己中咗都冇講,因為其他同事每兩日就要影張相畀HR,即係我,證明自己係陽性定陰性,唯獨是老細唔使show畀我睇,佢話唔中就係唔中,所以真相係點得佢自己最清楚,總之20個人嘅office,唔使兩星期已經有18個同事中招,不幸地包括我。

根據老細嘅policy,中咗可以Work from Home,唔中嘅就繼續返工,搞下搞下得返兩個唔中嘅同事返office對住老細,佢兩個話好似置身地獄一樣,唔係驚咩omicron,而係老細抬起頭就見到佢哋,習慣乜嘢都搵佢兩個做,連公司冇晒廁紙都叫呢兩位「倖存者」同事出去買。

過多兩日,其中一個「倖存者」都影咗張兩條線嘅快測棒話中招,另一個隔多一日又中埋,20個同事終於全部「陣亡」,得返老細自己一個返office,如果真係全部人中晒,老細有冇可能獨善其身呀?呢條友相當有可疑。

然後公司有人向我報寸,話有同事喺另一個group講,自己睇咗早幾日《東張西望》,知道原來用果汁或者汽水可以製造假陽性嘅兩條線效果,同我舉報嗰個人仲話,自製陽性嘅同事毫無悔意,指責係老細迫到佢咁做。

我:「你同我告密,係咪想我鬧個同事或者揭發佢?」

「你唔好話畀人知係我爆呀!」

我:「咁唔話得畀人知係你爆,我點揭發?我又唔喺你哋個group裡面。」

「一係你就咁畀截圖老細睇囉,我可以screen cap畀你。」

我:「老細一定問我邊度得嚟?張截圖邊個畀我?」

「咁呀,算啦,不過想同你講有啲同事將一支棒分幾個角度影,所以就長期都係陽性。」

我:「不如咁啦,你又唔畀我開名,一係你直接同老細report咪得囉!」

「唔得呀,老細到時實開我名,都係算啦!」

雖然自製假陽性結果係錯,但我更加睇唔起呢種想爆料又要鬼鬼祟祟嘅人,職場上總有呢類物體想借刀殺人,麻煩同埋手尾畀人哋承受,自己就坐享其成食花生睇戲。

自製假陽性仲周圍講嗰個同事都好蠢,係咪覺得自己好威?醒少少啦!不過老細更唔抵幫,明知有咁多員工確診亦唔考慮全部Work from Home,仲要叫冇事嘅人繼續返工,同事條氣唔順係好正常,因為你本身嘅做法已經唔公平,最後搞出個亂局,我始終認為老細嘅責任先係最大。

投稿讀者:Serene

error: