《大叔的誘惑》上 25歲女同事戀男上司

Regina係我嘅秘書同事,25歲,雖然外表比真實年齡稍為成熟,但仍然係全公司最後生,呢度亦係佢人生第一份正式長工,所以個個都當佢係妹妹咁看待,而作為一位新人,Regina做嘢算唔錯,起碼肯學有交帶,青春又humble,都幾受同事歡迎㗎!

架構上,Regina嘅上司係Samuel,44歲,喺度做咗好耐,Regina未嚟之前我就係跟Samuel,所以大家都幾熟,幾年前佢結婚擺酒都有請我去,證婚個律師直頭係我幫佢搵,其實Samuel同老婆係結束8年愛情長跑先結婚,兩個差唔多年紀,所以都好襯,不過佢兩個唔打算生小朋友,仲成日話呢個世代生BB,分分鐘害咗個細路。

Regina雖然稚嫩,但勝在有heart,我見佢跟Samuel啲嘢都好上心,亦周不時問我關於Samuel嘅喜好同作風,其實呢啲好平常,直至一而再再而三見到Regina放工坐Samuel架車走,我開始覺得有少少Over,須知道我跟咗Samuel咁耐都未試過坐佢架車,所以就決定開心見誠問一問。

「噚日見到你放工同Samuel一齊,去邊呀你哋?」

Regina:「冇去邊呀,佢車我返屋企之嘛!」

「下!」

Regina:「原來我同佢住得好近㗎,Samuel住星河明居,我住龍蟠苑,隔條馬路咋。」

「原來你住龍蟠苑,又真係幾近既,佢主動話車你咁好?」其實呢句係試探。

Regina:「唔係啦,係我知道Samuel住星河明居之後,成日叫佢車我返工放工之嘛,我係咪好衰呀?冇理由有順風車唔坐㗎嘛!佢架車一出停車場都係要途經我等車個站。」估唔到小妹妹又幾誠實。

順風車事件可能係我多心,但係同Regina共事多幾個月,我又開始覺得唔係咁簡單,因為小妹妹成日向我打探Samuel嘅事。

Regina:「你嗰陣係咪有去Samuel婚禮呀?佢老婆靚唔靚㗎?」

「你又知我有去?你日日坐Samuel車唔直接問佢?」

Regina:「Samuel有提過下,不過佢揸緊車走去拎相睇好奇怪。」

還好Samuel冇隱瞞自己已婚,但唔係喎,偷食嘅最高境界應該係對方知道你已婚都心甘情願獻身。

「佢老婆靚㗎,有種貴氣。」

Regina:「噢,不過都正常嘅,Samuel咁好,佢老婆一定唔會差得去邊,咁你當時去飲有冇同佢哋合照呀?我想睇呀!」

「咁多年前,都唔知張相去咗邊啦!」

Samuel的確係一個唔錯嘅人,但稱唔上係靚佬,普通大叔囉,你話我多疑都好啦,總係覺得Regina對Samuel係超越咗下屬同上司嘅感情。

每一日我都聽住Regina讚Samuel,隔幾日Regina就會問我關於Samuel嘅事,通常圍繞住以前嘅事同埋私事,我認為係過咗火位,所以嘗試用講笑方式再問清楚。

「嗱,Regina,你唔好同我講你暗戀Samuel呀!你對佢好有興趣咁喎!」

Regina:「係呀,你唔覺得Samuel好Man好正咩!如果佢未結婚就好喇。」

完全估唔到Regina會咁直接同坦白,25歲即係25歲,不過呢種大無畏精神似乎用錯咗地方。

「咪亂講嘢啦!Samuel有老婆㗎,何況佢大你19年,19年喎!佢中學畢業嘅時候你先啱啱出世咋!」

Regina:「唔係,係未出世先啱!」

「咁咪係囉!佢讀緊大學你仲讀緊幼稚園,我唔知你講真定講笑啦,咪攞呢啲嘢嚟玩。」

Regina:「唔係玩㗎,我認真㗎!」

聽得出小妹妹係認真,然後我講咗身邊一個朋友嘅經歷畀Regina聽,可能會得罪唔少老夫少妻,但整件事我冇加鹽加醋,只係如實講出嚟。

我個妹有個朋友當年24歲,中學同學,成日嚟屋企玩所以我都認識,佢嫁咗畀個50歲嘅男人,計生肖足足兩個圈有多,個女仔嘅父母曾經極力反對,仲搞到反晒面,不過我妹嘅朋友一意孤行,嗰個50歲嘅男人幽默、有事業、玩音樂,而個26歲嘅女仔就好仰慕對方嘅才華,同Regina仰慕Samuel工作上嘅認真同能幹一樣。

男人嘅成熟同埋睿智係由歲月磨練出嚟,對入世未深嘅女仔嚟講簡直就係光環,剛結婚時的確一切向好,佢哋仲生咗小朋友,但係後來嘅矛盾就愈嚟愈多,最近個女仔仲同我個妹呻,兩公婆已經兩年冇搞嘢,分唔清係出面有另一個女人,定係年紀大機器壞,畢竟個男人而家已經57,個小朋友都5歲,仲話老公嘅朋友見面時會叫佢阿嫂,嗰班人全部都50幾60歲,每次聽到都有啲怪怪咁。

「不過鍾意大叔唔係問題,最大問題係Samuel已經結咗婚。」

Regina:「大叔先至有魅力,何況佢望落一啲都唔似44歲,其實有男仔追我,大家差唔多年紀,只係識咗Samuel之後更加唔想同佢哋一齊,講嘢又低能又冇point,做人又好似冇目標咁,溝通唔到,Samuel唔同,佢份人好體貼,同埋我發覺好似冇嘢係Samuel做唔掂,永遠都咁冷靜。」

「我都講咗啦,Samuel點好都冇用,佢結咗婚㗎喇。」

Regina:「我明,但佢哋都冇BB,唔似你個妹嘅朋友咁多顧慮,而且……我上星期同佢表白咗喇。」

唔係啩!辦公室戀情都算,仲要係上司同下屬,年齡相差19年,我係咪應該隻眼開隻眼閉,唔好理咁多嘢呢?一個青春少艾有後生仔唔鍾意,係要椿個頭落個阿叔度,搞咩呀?(未完待續)

error: