而家好多人都Work from Home，用視像開會同埋傾工作已經成為日常，有冇曾經因為咁而出事呢？可能我公司特別邪，呢一年半載都有幾單嘢好爆，上個月先「出席」完高層個婚禮，用視像形式喎，阿姐仲叫我畀$800人情，睬佢都傻啦！
嗰位高層個婚禮應該前年舉行，但疫情下一改再改不斷改，佢未婚妻又喺加拿大，而家禁咗加拿大航班抵港，咁其實仲可以由加拿大先去另一個國家，再由另一個家飛香港嘅，但高層話佢未婚妻係食煙，頂唔順要住21日酒店隔離，所以唔想煩之下決定搞個視像婚禮喎……ok……視像婚禮唔緊要呀，新郎同新娘唔喺同一個空間，咁都得？
高層邀請咗成班同事仲有佢啲朋友「出席」視像婚禮，有幾十人join，個mon顯示大家嘅人頭鬼死咁細，我都要好用心先睇到邊格係新郎，邊格係新娘，睇住佢兩個天各一方喺各自嗰格講” I do !” 再拎住酒杯敬酒，我同時間拎起盒維他檸檬茶講”Congratulations!” 真係覺得個畫面好灰諧。
阿姐話雖然唔係請飲，但同事應該識做係咁易畀$800人情，唔止我呀，其他同事都話唔制，又冇派帖又冇嘢食，仲要用自己data上網，$800不如你畀返我啦！阿姐想擦高層嘅鞋，咁你擦飽佢啦，$800人情我就一定唔會畀㗎喇！
呢單都係碎料，最爆係有個女同事開視像期間話要去廁所，佢後面就係洗手間，個馬桶幾乎對到鏡頭正一正咁滯，見佢好似痴咗張嘢想遮住鏡頭，但唔知係甩咗定點，畫面濛咗一下又見返全景，有份出席視像meeting嘅同事都睇住佢如廁……
咁點算？個個都大聲嗌提佢要熄鏡頭，提佢閂廁所門，但係個同事明顯聽唔到，視像meeting裡面有兩位男同事，佢哋即刻自己熄咗個cam，嗱，佢熄咗只係代表我哋見唔到佢，唔代表佢喺鏡頭另一邊冇睇緊㗎！唉，點解要咁大意呀？
我哋後來同返呢位女同事講，佢即刻覺得好尷尬，仲喊得好淒涼，嗰兩位男同事就話乜都睇唔到，不過唔分男女，去小便咁私人嘅事畀任何人睇到都唔好啦，呢個真係一世嘅陰影。
公司有個新人雖然冇呢位女同事咁慘，但相信Work from Home嘅日子都唔好過，每次開視像都見佢阿媽入鏡，喺鏡頭後面抹呢樣抹嗰樣，抹成半個鐘都唔走，最搞鬼係會搭嘴，擺明全程偷聽啦！
有次開緊視像會議期間，其中一位同事隨口噏咗句超市買唔到嘢，新人個阿媽就即刻加把口：「係呀，畀啲人搶晒，你要早啲落去呀！」講到興起就走埋嚟對住鏡頭係咁噏，我見新仔好困擾，係咁叫個阿媽走開都唔聽，最慘係佢屋企冇房，想要少少私隱同空間都唔得。
講起屋企人，有個之前喺Office文質彬彬嘅男同事都形象盡失，事緣有一次開視像傾嘢，佢屋企有兩個男人無端端大聲鬧交，仲要係粗口橫飛，相信係佢嘅阿哥細佬之類，男同事好斯文又好尷尬咁叫屋企人靜一靜，點知有把聲鬧返佢轉頭：「收聲啦仆街，你扮乜L嘢好人呀？」
跟住男同事就忍無可忍，火遮眼之下用粗口還擊，仲離開咗鏡頭範圍，只係聽到起碼三把男人聲互屌，期間仲砰砰嘭嘭，似係拎起啲褶凳打架，過咗一陣佢返嚟話唔好意思，呢個會唔開住，要處理一啲私事。
平時佢喺公司好斯文，識咗幾年都未聽過佢講粗口，不過講粗口好小事，最緊要人冇事，好在第二日開視像傾嘢仲見到佢健在。
其實我哋公司Work from Home視像最初好多人唔開鏡頭，淨係出把聲，但係有幾次個別同事完全no show，好似唔記得有meeting，仲要搵唔到人，之後逢親有老細參與嘅視像都被要求開鏡頭，老細美其名話想大家close啲，疫情下冇得返office都可以見下，實際上梗係想check住啲人係咪WFH啦，有時開會前10分鐘先通知要開cam，化妝都化唔切，總之就好狼狽啦！
投稿讀者：Candice