唔知係咪每個老細都一樣，因為呢份係我出嚟社會之後第一份工作，前前後後做咗三年零九個月，有諗過跳槽，可惜呢兩年似乎冇乜好機會，所以就做到而家。
我想走嘅原因係老細太chur，其實換位思考，公司係佢嘅，盤生意係佢嘅，做老細緊張係無可厚非，呢一點始終同打工仔係對立，但我老細嗰隻chur係蠶食埋你嘅私人時間，影響埋你日常生活。
唔止平日夜晚，就算係星期六日或者紅日，我老細都會不斷喺WhatsApp群組講公事、叫同事做呢樣做嗰樣、問意見、要你即刻畀資料佢，留意返，係「即刻」，佢要呢一分鐘問完你，下一分鐘就有答案或者收到想要嘅文件或者資料，如果覆遲咗，老細會喺個群組裏面當住咁多同事鬧你。
早排就有同事星期日同老婆仔女睇戲，較咗震機唔知老細急要一份report，結果老細喺群組裡面發脾氣不斷鬧佢，個同事散場後都唔知發生咩事，然後老細已經直接打電話去鬧佢， family day咩心情都冇晒。
老細仲會講埋啲晦氣說話，有晚10點幾喺群組問design方面嘅意見，其實已經有幾個同事覆返佢，只有個別未覆，然後老細會話：「而家問嘢冇人答㗎喎！好定唔好都講一句吖，睇咗msg又唔應嗰啲即係點？」
壓迫得耐終於有人反抗，有個weekend老細又唔知問咩意見，要求全部同事即刻回覆，見到個msg係藍剔，換言之大家睇晒，但仲有一個同事已讀不回，神經老細又走去tag嗰位同事不斷追問，結果佢如願以償，嗰位同事打咗一大段文字回應：
「你知唔知放假要人做嘢即係OT？仲要強制員工星期六日都要即覆msg，我哋冇阿媽生㗎？我哋冇自己生活㗎？間公司係你嘅，你要花光所有時間去做嘢我明白，但我哋只係打份工，冇理由連私人時間都要賣畀你，迫到幫你做嘢嘅人無路可走，你間公司都唔會走得遠，因為正常人最後會一個一個離開，你都知我辭咗職，我可以唔出聲好頭好尾，不過真係頂唔順，再係咁落去肯定有更多人辭職，大家唔走只係因為市道唔好，今個月唔走，下個月都會走，下個月唔走，過埋年一樣走。」
藍剔，全部人睇晒，包括老細，然後全場人靜晒，冇人講嘢，冇人打圓場，我隔住個mon都睇到腳震，點收科呢？老細又會點回應呢？
然後同事私下互相msg，個個都話好爽，但同時膽顫心驚。我同嗰位發火嘅同事並唔熟，所以都係睇到呢段msg先知佢辭咗職。
嗰一晚公司個群組靜晒，老細亦都冇回應，返office之後氣氛有啲唔同，唔知點解安靜咗好多，可能大家都唔知應該講返件事好，定係講下笑令工作環境輕鬆啲好。更大嘅變化係，平日過咗6點鐘之後，仲有星期六日同埋公眾假期，老細冇再喺群組叫人做嘢或者畀意見。
無可否認，同事辭咗職講句嘢都大聲啲，故此可以咁勇敢做死士鬧老細，不過佢都講得好啱，其實辭咗職絕對有權唔出聲，反正都走，咪留返其他同事喺度繼續受囉，但佢偏偏幫留下來的人道出心聲，令大家有好日子過，喺度真係要同佢講聲respect兼敬禮，祝呢位勇敢嘅同事新工作順利，亦祈求老細真係反省咗，將來唔會故態復萌。
投稿讀者：Bryan