早輪都幾黑仔，搵咗工幾個月，終於都有一個Offer，咁就開開心心返工啦，點知無厘頭畀班同事排斥，個原因仲要好無稽。
其實啱啱入嚟做嗰陣好正常，同事都有叫我一齊食lunch，後來發現佢哋次次都唔嗌一個叫Ricky嘅同事，咁我新嚟亦冇理太多，可能Ricky自己有帶飯呢！
有一次，Ricky朝早9點幾已經走嚟約定我食lunch，佢話咁耐以嚟都未正式同我呢個新人溝通過，ok啦，咪一齊食囉！嗰日得我同Ricky兩個食，成餐lunch嘅過程亦好正常，普通傾下計，冇講任何人壞話，佢分享下喺度工作嘅事，我又講下自己上一份工係點，就係咁簡單。
當日食完lunch返到office，我已經覺得幾個同事黑口黑面㗎喇，但冇諗過成班人會走嚟杯葛我咁搞鬼啫！十問九唔應都算，第二日放lunch嗰陣，有個同事仲大大聲叫食飯，循例唔叫Ricky，但亦都唔叫我，之後連續幾日係咁，加上平時做嘢當我透明，招呼又唔打，咩事呀？有咩得罪你哋咪講囉！玩冷暴力呀？
初初一頭霧水，自己又係新仔，過多幾日我咪主動叫大家食飯囉，跟住有個同事答：「你唔係同Ricky食㗎咩？冇預你喎！你哋慢慢食飽佢啦！」佢嘅態度非常唔友善，我聽完打咗個突，首先係覺得使唔使咁講嘢呀？其次係我好肯定呢句唔係講笑，佢係好認真。
因為我食煙嘅緣故，有時落樓放煙break會撞到隔籬team另一位同事，大家傾開計就講到呢個問題，佢話我條team班人好唔鍾意Ricky，因為覺得佢份人好鍾意擦鞋，鍾意打小報告，又成日搏表現，所以見到我痴埋Ricky一齊食飯就好反感，仲話我上一手嘅同事都係因為咁而被排斥。
要強調一件事，Ricky係咪鍾意擦鞋打小報告同埋搏表現呢，我就真係唔知喇，當時只不過入咗嚟做唔夠一個月，得鬼閒理咁多是非咩！Ricky又唔係女，點會留意佢呀！更何況當日係Ricky一早叫我食lunch，唔係我痴埋佢度，作為一個新人我係出於禮貌答應，而且食餐lunch啫，有幾咁閒呀？我冇興趣研究你哋長久積落嘅恩恩怨怨囉！
見到咁幼稚嘅行為，係咪以為佢哋係fresh grad唔懂事呢？唔係呀，呢班排斥我嘅同事全部都30幾歲㗎喇，佢哋唔止平時當我透明，食lunch特登唔叫我，仲試過人事部有張通告要每個同事傳閱加簽名，班友簽完就skip咗我交返出去，最後要麻煩HR姐姐特登行埋嚟，問點解淨係我一個冇簽名，梗係啦，張通告冇嚟到我手，根本冇機會簽同睇。
成班人加埋百幾歲仲做埋啲小學雞嘢，真係服咗佢哋。
我冇同Ricky特別friend，自從嗰次之後亦冇特登再約埋一齊食lunch，因為我根本唔需要埋堆，亦唔想參與任何辦公室政治，打份工咪搞咁多嘢啦！
做咗差唔多三個月嗰陣，有headhunt介紹我轉另一份工，人工福利都好啲，我亦順勢辭職走咗，好在新公司冇呢啲小學雞，最憎呢啲小圈子文化。
投稿讀者：ROY