我叫Gavin，Barry同Paul係我大學同學，當年已經好投契，因為大家啲嗜好十分相似，即使畢咗業都仲係好friend，我哋三個最叻就係吹水唔抹嘴，其實講過好多嘢都冇做，例如一齊去旅行，不過各自有女朋友，點會咁神心三條麻甩仔去玩吖，有錢都留返同自己條女去啦！
我哋仲講過一齊搬出嚟租樓住，因為可以不分晝夜瘋狂打機，結果又係得個講字，講咗好多年都冇行動；我哋又話過一齊考車，然後三個人合力買一部車齊齊揸，點知阿Paul個衰仔考咗3次都肥佬，考考下都冇晒心機，最終共同供車計劃又擱置。
唯獨有一件事最後成真，就係開公司創業，其實咁多樣嘢之中，呢一樣反而係最高難度，又要有計劃，又要有資金，仲要驚三兄弟因財失義，點知我哋又真係搞咗間startup出嚟，世事真係好難預料。
Barry當年講過：「喂，我哋咁辛苦創業，都要等自己返工開心啲先得，講定先，公司齋請女職員，我想每日返到office都係畀女圍，一條仔都唔請，得唔得先？」
我：「好難㗎喎，一係咁，請仔唔係唔得，一定唔可以請高大威猛有型靚仔，要請就請啲毒男，咁到時有女喇喎，我哋咪突出啲囉！」
Paul：「嗱，我要有份interview㗎！你知你兩個啲taste啦，認波唔認人，我就唔同，我睇樣先，冇你哋咁膚淺。」
我：「算吧啦阿Paul，我同你都有穩定女朋友，係Barry條友成日換畫之嘛，請女咪益咗佢。」
講開又講，係咪每個男人欣賞女性嘅角度都唔同呢？我哋三兄弟鍾意啲女仔都唔同類型，Paul係睇樣，平胸佢冇問題，Barry就係乳房學家，有奶便是娘，我就睇性格…..好啦好啦，唔扮清高喇，其實我睇腳🙈
曾經有人話，男人鍾意啲咩女人，留意邊個部分，係同年齡有直接關係，後生仔通常鍾意姐姐，然後老咗又會鍾意返妹妹仔，好似一個循環咁。又有人話男人愈後生愈重視女性上圍，大個啲就會將重點放落對腳，再成熟啲先會咩都唔要淨係睇樣，其實有冇根據呢？個人就覺得冇，我哋三兄弟年齡相若，審美眼光都唔同啦！
諗得好完美，返嚟現實世界先，公司係順利開咗，不過頭兩年成個office一條女都冇，反而請咗4條仔，再加埋我哋3個老闆，4+3 = 7，total係7條仔……當年話要組全女班嘅宏願呢！
Barry：「女呀！我要女呀！」
Paul：「畀心機搞好間公司先啦！請人梗係請啱用㗎啦，唔通請10個model返嚟坐咩，到時公司執笠就咩女都冇啦！」
我：「生性啦Barry，有錢有女，冇錢冇女呀！」
其實我哋講笑啫，男仔圍埋係講衰嘢㗎啦，我相信女仔圍埋都一樣，何況咁辛苦創業，梗係做好盤生意先啦！不過後來公司真係出現咗變化，有個男員工嘅態度同行為愈嚟愈差，每日lunch先返工，一個星期平均請一至兩日假，有時仲要電話都冇個直接no show，加上佢真係好卸膊，另外幾個男同事都非常唔鍾意佢。
我哋創業嘅時候咩都諗過晒，唯獨是冇諗過有炒人嘅一日，細細間嘅startup company仲諗咩炒人呀，梗係想開開心心成班人一齊玩一齊做㗎啦！
我：「下面怨聲載道喎，我哋係咪要諗下點做呢？」
Barry：「阿Paul，不如你做醜人好冇，你派大信封啦！」
Paul：「都要㗎啦，佢今日又no show，長遠落去唔係辦法，好影響士氣，話時話，我哋三個好似唔識睇人，點解當日會請個咁嘅員工嘅。」
我：「有時要睇清一個人真係需要時間㗎！我都明嘅，要開口炒人真係好難。」
Barry：「有冇諗過我哋可以好似球會咁，用合約方式招聘球員，啱用咪不斷續約囉，咁如果做落咗又發生同類型事件，合約到期咪唔續囉，炒人真係好殘忍。」
Paul：「唔使講到球會球員咁離地，其實我細妹做幼稚園教師，佢嗰行都係玩每年續約㗎，簡單啲，即係之後唔請permanent，轉做請contract啦係咪？」
我：「都好喎，反正我哋之前話請Sales同CS，但又計唔掂條數，你知啦，公司仲係細，淡季旺季又差咁遠，不如咁啦！雖然係用contract形式請人，福利一定要畀足，所有嘢都一樣，唔好刻薄員工，我哋冇理由一朝被蛇咬，十年怕草繩㗎嘛！請咗一個唔負責任嘅同事啫，唔代表人人都係咁嘅，暫時用呢個方式觀望下先。」
Barry：「觀咩望吖，直情正啦！咁第日咪可以請啲女女返嚟，名正言順追，再名正言順飛囉！嗱，唔係追到手就炒呀，係contract到期咋，嘩，諗起都爽呀！」
今次唔係FF，炒咗嗰位神龍見首不見尾嘅員工之後，我哋真係請咗個女同事返嚟，Barry親自interview，完全係佢鍾意嘅類型，但就……MK咗少少囉！
不過唔好理，唔知係個女仔腳頭好定係點，我哋公司接咗幾單大生意，愈賺愈多，業務上晒軌道，而Barry亦實踐咗佢對自己嘅「承諾」，真係追到個MK女同事，兩條友仲打得火熱，日日一齊返工放工，係咪當其他同事死㗎！Barry條友好似真係沉船，諗諗下唔係好對路，會唔會多咗個老闆娘？股份使唔使再分配過㗎？
我：「點呀？就快一年喇喎，係咪同你條女續約呀？轉埋permanent係咪？」
Barry：「痴線，梗係唔續啦！我擺咗你同阿Paul上枱㗎喇，我話想同佢續，係你兩個堅持唔續。」
Paul：「咁多人死唔見你死嘅！」
（未完待續）