我阿爸當年債台高築，佢好鍾意過大海賭錢，一早知佢好唔掂同埋大把街數，但冇諗過佢連親戚錢都呃，仲要係我阿媽嗰邊啲親戚。
結果阿媽、阿哥、家姐，仲有我，集合4人之力幫佢還清部分債項，你一定會問：「點解仲要幫個爛賭老豆還錢？」我哋唔想㗎，佢欠財務公司啲蘇州屎可以由佢自生自滅，但唔少債主都係親戚，姨媽姑姐嗰啲唔通唔理咩？
記得屋企出事嗰陣，家姐仲有兩個月就結婚，因為我哋根本唔知阿爸私底下問咗咁多親戚借錢，喜帖就一早派晒，真係唔想擺酒當晚有不愉快事件發生，其實我知道家姐都好痛苦，請飲前先爆單咁嘅嘢，到時肯定尷尬，乜嘢籌備婚禮嘅心情都冇晒啦！結果阿媽好勇敢約晒班親戚債主出嚟，逐個逐個還返錢畀佢哋，件事總算拆掂咗。
身邊有個不負責任，四圍呃錢借錢嘅人，其實你嘅生活點都會受到影響。同一個月裡面，家姐結婚，我阿媽同阿爸就離婚，阿爸冇得唔答應，因為阿媽開出咗個條件，就係賣咗層樓，分一部分畀佢還債，試問我阿爸呢種長期等錢使嘅人又點會唔應承吖。
阿哥一早結婚搬出去住，家姐婚後亦搬埋，所以我同阿媽兩個喺賣樓後另外租咗個單位，地方細過以前，但冇咗一個經常為錢而偷呃拐騙嘅人喺身邊，生活的確自在同舒服好多。
多謝阿媽咁堅決同狠心，屋企人今時今日先至有好日子過，以前成日對住一個長期避債嘅老豆，我梗係明白債仔嘅死穴同心態啦！
我：「點呀，message佢有冇覆你？」
Kathy：「冇呀，噚晚搵咗佢幾次，電話唔聽， WhatsApp已讀不回，但我諗唔明，點解佢唔索性block咗我呢？會唔會有心還錢？」
我：「佢唔block你唔係有心還錢，係因為呢單嘢發生咗唔算好耐，佢驚你採取其他行動或者真係報警，咁有咩都可以第一時間知吖嘛。」
Kathy：「真係咩？」
我：「坪石村X石樓X02室，你send呢個地址畀佢睇，包佢好快覆你。」
Kathy：「佢地址啊？你點知㗎？」
我：「咁你想知答案定係想要返啲錢？」
Kathy：「梗係要返啲錢啦，除咗打地址仲要講啲乜嘢？」
我：「乜都唔使講，淨係打地址，招呼都唔使打。」
唔使3分鐘，仲快過淥杯麵，嗰條友已經直接打嚟。
Kathy：「喂，你終於覆喇，幾時還錢呀？你唔好講其他嘢先，你應承咗還錢畀我，msg唔覆，電話又唔聽。」
見佢哋沒完沒了，使唔使約出嚟飲茶聚舊呀？我向Kathy示意拎個電話嚟。
我：「吳耀輝，捨得還錢未？你唔好理我哋點解有你地址啦！」
條友仲大返我轉頭：「你用咩方法知道我地址呀？信唔信我報警？」
我：「好呀好呀，唔該晒，Kathy點都唔報警，又話搵你唔到，而家你自己報警就啱晒喇，嗱，唔好氹我呀，記得同差佬講你詐騙，呃人簽單，偽造文書，如果你唔講都ok，到時我哋自己同差佬講。」
一個佢唔識嘅陌生人，再加埋歡迎佢報警，你唔報就我報，其實足夠令呢位吳耀輝折騰，再加上少少幸運成份，冇心貶低住公屋嘅朋友，我細個都住過公屋，但同時要講句：「鬼叫吳耀輝你住公屋咩！」
住公屋有好多牽絆，首先你唔係咁易搬，如果佢係出面求其租屋就麻煩啲，拍下屁股可以話搬就搬，公屋唔同，你一個人為咗避債要搬？咁屋企人點呀？房署咁多單位畀你慢慢揀呀？所以就住所嚟講，吳耀輝冇得走，而且睇到佢咁緊張，我亦好肯定佢家人未必知佢出面咁多衰嘢。
吳耀輝答應還錢，不過想分期，仲話分兩年，每個月還一萬一千幾喎……
我：「唔得！」
吳耀輝：「12個月啦，每個月$23,000得喇啩！」
我：「唔得！一個星期內要還晒。」
吳耀輝：「你迫死我都冇用㗎，咁我真係冇吖嘛！」
我：「自己諗辦法，一係差館見，一係我上你屋企。」
吳耀輝迫於無奈答應，其實我預咗佢唔會遵守承諾。
對住呢啲冇口齒嘅債仔要記住三樣嘢：1）唔好信佢講任何嘢，一定要見到錢見到數；2）唔好仁慈，佢打劫又好，呃第二個又好，呢啲嘢交畀佢自己諗，你唔需要操心；3）盡量唔好畀佢分期，因為你分10期同100期，每個月還十蚊定係一萬蚊，基本上係冇分別，佢敷衍你一排之後，最後都會爛尾。
眼見一個禮拜限期就到，吳耀輝去到第五日自動投案，不過只係還咗5萬，佢仲同Kathy講好有誠意還，其餘都係想分期，因為真係冇辦法。
其實吳耀輝同時亦不斷追問Kathy我係邊個，但我已經同Kathy講咗，對方問乜嘢都唔好答，亦唔好應承任何嘢，要冷處理，因為債仔估唔到你下一步點樣做，內心就會非常不安，更何況佢唔止錢咁簡單，真係報警告詐騙監都有得坐，除非唔介意坐監啦，不過睇反應就肯定驚喇。
我：「你同佢講，仲有2日，一定要見到另外嗰23萬，否則報警，一係上佢屋企，記得唔好再任何語氣同招呼，你咪加任何emoji呀！」
Kathy：「咁絕？佢都還咗5萬蚊啦，使唔使畀啲時間佢呀？」
我：「畀你條命！」
兩日後吳耀輝冇守承諾還錢，我特登叫Kathy唔好搵佢，而佢亦冇msg Kathy，一切都喺我預期之內，因為債仔會搏一鋪，到期日會特別小心，甚至全日留守喺屋企，佢都驚真係有人上門追數。
再過多幾日先，等吳耀輝稍稍放低戒心，我約咗Kathy直接踩上去條友屋企，拍咗兩下門已經有人應，嗰位應該係佢阿媽嘅女人充滿疑惑咁講：「你哋邊位搵佢呀，佢未返喎！」
我：「吳耀輝呃咗我哋錢，但佢仲未還。」
女人：「你哋係收數公司呀？」
我：「唔係，吳耀輝另外呃我哋簽咗啲買賣文件，我哋打算去報警，你幫我同佢講聲，呢幾日再唔還，咁就唔好怪我哋去落案。」
Kathy全程冇出聲，佢明顯好驚，以佢嘅性格應該仲會覺得騷擾人哋阿媽唔好意思，不過都未有時間同Kathy討論，吳耀輝已經send msg過嚟。
Kathy：「佢問我哋有冇搞錯，走去搞佢阿媽。」
我：「你淨係講，今日係我哋上嚟，過兩日就到差佬上門搵你阿媽，send啦！」
吳耀輝呀吳耀輝，可惜你唔係無牽無掛吖，又驚屋企人知，又驚要坐監，似足當年我老豆一樣，如果唔係搞到親戚嗰邊差啲反面唔去家姐婚禮，我估老豆仲會繼續呃呃騙騙好多年。
Kathy仲猶豫報唔報警係因為一場相識，同埋主要驚吳耀輝真係坐監的話，啲錢又點算呢？不過唔使煩咁多喇，過咗兩日，吳耀輝還埋餘下嘅23萬畀Kathy，最正係佢send入數紙嚟嘅時候仲加多句：「我哋以後冇friend做！」
嘩，還錢都還得咁惡，而家你呃人錢，但你同人絕交？佩服佩服。
Kathy：「有兩樣嘢我到而家都唔明，點解佢可以還到咁多錢畀我，但當初又要搞到咁？」
我：「呢種人，出面正當財務公司就唔會借畀佢㗎喇，借到都唔會多，所以得兩個原因，一係佢阿屋企人見事態嚴重，周圍借或者拎啲棺材本出嚟幫個仔，另一個可能性就係吳耀輝又有其他大話呃更多嘅人，總之呢28萬唔會係佢嘅，一定有苦主。」
Kathy：「咁佢屋企人同啲朋友咪好慘，可能佢又用同一招呃咗另一個人。」
我：「你有冇諗過佢上次呃你28萬，可能就係畀人迫還錢？其實債仔嘅心態唔難理解，佢還錢都有先後次序，呃咗你咁多，即係代表出面有一筆好急嘅債要還，佢哋都會視乎邊樣影響到自己多啲，邊樣對自己威脅大啲，吳耀輝最初就係蝦你乜都唔敢做，只要我哋take action，佢就要去第二度呃啲錢返嚟解決咗先，我哋唔係超級英雄，顧唔到咁多人，顧掂自己就夠。」
Kathy：「咁你點樣查到佢地址？」
其實有一個電話號碼，莫講話要查一個人地址，你可以連佢身分證號碼同中英文全名都知道，唔需要有咩power同背景，大公司一個小CS都做得到。
不過重要嘅嘢想講三次，呢種方法絕對唔啱！絕對唔啱！絕對唔啱！今次見Kathy被騙成28萬咁多，非常例子先至用到非常手段。
最後想忠告一句，大家平時填form填問卷以為好閒，其實危機四伏，唔係邊有咁多推銷電話，不過做人最緊要行得正企得正，唔好偷呃拐騙就冇咁多嘢要驚。