都唔知由邊度講起，我有個同事叫Kathy，好friend嘅，人哋話男女之間唔可以有純友誼，其實未必，我同Kathy真係可以，同埋我已經有個就結婚嘅女朋友，所以唔使期待呢個故事會發展出愛情或者任何曖曖昧昧嘅嘢，絕對純友誼，純同事。
Friend係因為當我入嚟呢間公司做嗰陣，Kathy已經做咗2年，好多嘢都係佢教我，呢條女真係乜都唔計較，好抵得諗，我自己由新仔時期開始就見佢對其他同事有求必應，直至我而家做咗3年，雖然老土講句佢係我前輩，但就連我都可以調轉頭點返佢做嘢，可想而知Kathy份人幾nice幾好人。
做人太Nice有時會自找麻煩，特別係香港呢個地方，平時Kathy接到嗰啲傳銷電話都會同人傾一輪，我話cut線啦，佢會話唔好咁冇禮貌，人哋都係打份工，結果係點？結果對方咪每日打幾次嚟轟炸式sell嘢囉！喺街上面任何人走嚟賣獎劵賣曲奇，Kathy好多時都會買，仲有嗰啲問卷就算唔填都會同對方傾一大輪。
好心，唔一定會有好報，因為有啲人就係知你性格溫馴同腍善，個個都唔搞，淨係走嚟搵你著數。平日笑面迎人嘅Kathy早排顯得好唔開心，成個人唔同晒，以前明明係大笑姑婆，突然間變得沉默寡言，有次佢行出office講完電話返嚟仲眼濕濕，一定有啲嘢啦。
我同Kathy前前後後識咗3年，由於工作方面合作無間，一星期對足五日，有四日仲要OT，我見佢仲多過見我老母同條女，所以彼此感情好好，甚至係無所不談，不過佢嗰排唔開心竟然問極都唔講。
直到月尾，Kathy毫無先兆下問我借錢，借畀你唔緊要，但竟然問我借$300？
我：「冇帶銀包咩？」
Kathy：「唔係，最近洗大咗之嘛。」
我：「借畀你冇所謂，但你借三嚿水就真係有啲擔心，唔係串你，你咁大個人幾百蚊都冇？定係睇我唔起，覺得我嘅財力只可以借到$300畀你？」
Kathy：「唔係咁嘅意思，不過月尾得返幾日，我都係用嚟食飯啫，$300夠㗎喇！」
當時銀包只有$500，我成張塞咗咗佢：「袋住先，一陣撳多$500畀你，仲有五日先出糧，三嚿水真係未必夠。」
Kathy：「唔使撳啦！$500夠晒喇。」
我：「老老實實，搞咩咁窮呀？你應該好有錢㗎喎，我見過好多次成班同事出去食lunch你畀住先，有幾條友經常側側膊唔多覺你都冇追佢哋飯錢，同埋你又冇咩嗜好嘅，又唔用名牌，做咩突然咁窮啫，屋企有事？」
Kathy：「冇呀，真係冇事。」
我：「講啦！明顯睇得出你唔開心，問咗你成個禮拜都唔肯講，我個銀包得張五百蚊紙都即刻畀你，以我哋嘅交情係咪有事都唔講出嚟呀？嗱！真係問埋呢一次，你唔講就算。」
因為我平日都係嬉皮笑臉，Kathy見到我咁認真都打個突。
Kathy：「借咗錢比個friend，不過佢唔肯還。」
我：「借錢畀個friend會搞到冇錢食飯？你借咗幾多畀人呀？」
Kathy：「前前後後28萬……」
我：「28萬？嘩！原來你咁多錢㗎？」
Kathy：「三分二係積蓄，三分一係信用卡透支借畀佢。」
我：「你係咪白癡㗎！借晒成副身家都算，透支信用卡去幫人？拎返張五百蚊嚟，你太戇鳩，唔抵幫！」
Kathy：「都話唔講㗎啦，講咗實畀你鬧。」佢眼紅紅想喊。
我：「戇鳩就要屌㗎啦！唔好喊住，講埋先，你個friend有絕症定係佢屋企人有絕症？來來去去都係呢啲藉口㗎喇。」
跟住就精彩喇，原來Kathy個friend聲稱做唔知乜撚嘢基金，有次搵佢出嚟食飯話要練習銷售技巧，模擬sell隻基金畀Kathy，仲要佢喺張合約上面簽名。
Kathy：「佢話要模擬晒成個銷售過程，包括點樣叫客人簽名closing張單，點知一簽咗佢就話生效，一定要畀錢真正完成。」
我：「咁你咪反枱囉！擺明呃鳩你啦！報警拉返佢轉頭都仲得，但我知講呢啲嘢都冇用，因為你而家連食飯錢都冇，即係當時真係有畀錢啦！」
Kathy：「因為佢後尾有講晒對唔住，仲承認係有心叫我簽單，誓神劈願話個基金唔會蝕，不如真係當投資完成咗佢，好過大家咁難做。」
我：「有幾難做呀？佢而家詐騙呀！」
Kathy：「我後尾諗返都覺得係，但當時又驚簽咗呢份文件有法律效力，既然佢講到咁穩陣，我咪當儲錢囉！」
我：「你知唔知做人易話為同戇鳩只差一線？你真係戇鳩無藥醫！」
可能我話佢戇鳩加上語氣好差，Kathy兩行眼淚就咁樣流落嚟，個故事仲未完，後來Kathy問對方拎正式文件同埋收據嘅時候，佢個打靶friend竟然話根本冇買到，張合約冇生效，但真係好等錢用，又怕直接問佢會唔肯借，所以就出此下策。
我：「你就係咁樣傾家蕩產再透支畀咗啲錢佢呀？報警啦等咩呀？咪撚食lunch喇，陪你一齊去報警啦！」
Kathy畀我係咁鬧，喊得愈嚟愈犀利，我知佢除咗傷心啲錢冇咗之外，其實都好嬲自己咁戇鳩，當然仲有因為信任朋友而被出賣嘅無力感，我都明自己係咁屌鳩佢係唔啱，但相信換轉係你都會屌到佢撻皮。
Kathy：「我怕畀屋企人知呀，所以想自己追咗先，未到最後一步都唔想搞大件事。」
我：「你畀人呃喎，點解要驚畀屋企人知？咁你有冇追佢呀？」
Kathy：「其實我都有講過會報警㗎，但佢係咁求我唔好，話兩個星期後會畀返我，點知過咗兩個月都冇，呢兩日打畀佢又唔聽，而家搵唔到人，同埋唔係個個父母都support仔女，講出嚟會畀我老豆老母話抵死，到時仲煩，你而家都係咁鬧我啦！」
又好似係，但真係唔屌唔鬆化吖嘛，我：「都係嗰句，報警！唔使將簡單事情複雜化。」
Kathy：「如果真係報警拉咗佢，會唔會嚿錢都追唔返？到時又係我自己孭。」
我：「不如咁，如果你驚告到佢坐監會收唔返啲錢，介唔介意我幫你追？真係追唔到先至報警，點睇？」
Kathy：「你點追呀？我都搵佢唔到。」
我：「你畀佢地址我。」
Kathy：「我唔知佢住邊㗎！」
我：「人哋住邊都唔知走去借28萬？咁你點識佢㗎？」
Kathy：「佢係我上一份工嘅舊同事，同事點會知佢住邊喎，好似我知你住黃大仙啫，都唔知你住幾樓幾室啦！」
我：「唉，咁你有佢電話吖嘛，畀佢number我啦！」
Kathy：「佢都唔聽電話。」
我：「畀我啦，有辦法㗎喇！佢叫咩名呀？有幾多資料畀晒嚟先。」
Kathy不斷問我會點樣追，其實呢，一個電話號碼已經可以做到好多嘢㗎喇，小綿羊唔使問咁多，講咗佢都唔會明。
見到一個咁好，咁nice，咁抵得諗，咁唔計較嘅同事畀人昆晒成副身家仲要透支信用卡，連幾百蚊食飯錢都冇，你話我英雄主義又好，話我有義氣都好，總之就無名火起，雖然戇鳩的確冇藥醫，不過我決定要幫佢。
一個星期，我畀自己一個星期時間，我有信心憑一個電話號碼就可以連本帶利攞得返呢28萬。
（未完待續）