我哋公司個廁所喺Office入面，初初嚟呢度做嘅時候唔知頭唔知路，見有尿兜就屙，見有廁格就入㗎啦，呢啲根本就係世界共識，點知當我想入其中一格嘅時候，廁所裏面有個senior喝住我。
「喂，嗰格老闆專用㗎 ！咁多格你唔去，去另一格啦！」
嘩，使唔使咁呀！去廁所都有階級觀念？日本公司都未必會咁啦！後來我睇清楚嗰格度門的確有個牌寫住「老闆專用」，好似office啲經理房度門咁，一來我新嚟真係唔知，又冇人提過我，二來嗰次度門係打開咗，邊會留意到有牌啫！
當時新入職唔敢講嘢啦，後來同啲同事熟咗就有提起，其他男同事就話嗰一格的確係老闆專用，叫我平時千祈唔好用，特別係廁所有其他senior或者高層嘅時候，仲話曾經有同事照用，老闆又咁啱入嚟見到，跟住發晒脾氣，後來捉咗嗰位同事嘅department head入房大興問罪之師。
最恐怖係咩，係啲高層會好似糾察隊咁，mon實有冇職員走去用，痴孖筋！
不過都唔使恨啦！做落之後成日聽到公司個清潔姐姐鬧鬼，佢話老闆專用嗰格特別污糟，小便周圍都係，開大更加慘不忍睹，仲話：「得佢嗰格係咁，污糟過出面啲公廁。」
直至有一次我OT，去廁所發現老闆專用嗰格閂左門，仲聞到有人爆緊石，頭先明明見到老闆走咗㗎喎，唔通開埋大先返屋企？
跟手見到個同事行出嚟，吓？又話唔用得嘅？
我：「你咁大膽用呢格？」
「乜你唔知道老細一走咗之後，我哋全部低級職員都係集體用呢格嘅咩？」
我：「上次食lunch你哋講㗎喎，叫我平時千祈唔好用，特別係廁所有其他senior或者高層嘅時候。」
「咪係囉，重點係『平時』唔好用，『平時』呀！何況搭正6點班高層就走晒㗎啦，6點後就盡量用呢格，我晏晝食完麻辣嘢，頭先屙到爆花咁，幾辛苦先等到6點呀！」
原來班友仔都好討厭公司同埋老闆連去廁所都有階級觀念，你越係唔畀啲小職員用，大家就更加要用，仲要有「大project」先用，諗諗下，老闆個專用廁格可能先係最污糟嗰格。
第二日喺廁所門口撞到清潔阿姐，佢個樣充滿怨氣，見到任何人都呻一餐，佢同我講：「你老闆真係好污糟，個樣明明好斯文，點解成個鄉下佬咁，我屋企隻狗屙屎屙尿都冇咁污糟。」🤣🤣🤣
我自己就唔敢用老闆廁格喇，唔係遵從佢嘅階級觀念，而係我知道呢一格先係成個男廁最污糟嗰格，用返平民嗰幾格安心啲。
投稿讀者：查理
延伸閱讀
送上其中一篇我上年好鍾意嘅稿
《點解有人會做洗廁所？係咪後生做錯事？》