發生喺我同事Tarf身上，有次我同佢喺pantry吹緊水，隔籬team另一位女同事Agnes行埋嚟，無啦啦話要同Tarf合照。
交代少少，Tarf青靚白淨，雖然已經二十八九歲，但望落都仲有啲小鮮肉feel，可能個樣生得細個，公司好多人都話佢靚仔。
Agnes就普通一個女同事，外貌同埋工作方面都唔係好起眼，不過佢無端端走嚟話要同Tarf合照嗰陣係好有禮貌，我記得佢咁講：「可唔可以同我影張相？我成日同出面啲friend講公司有個靚仔。」
當時我哋都覺得有啲唐突，但同事要影相又好似幾正常，所以Tarf窒一窒之後都應承，點知呢張合照竟然係一個惡夢嘅開始。（可憐我呢個唔靚仔要行埋一邊🤦🏻♂️，幾尷尬）
大約兩個月後，Tarf幾乎每日都收到恐嚇電話，冇來電顯示，對方初時淨係打嚟講粗口，純粹講一聲DLLM就收線，嗰排Tarf見到冇caller display已經盡量唔聽，不過Tarf始終係Sales，好多時啲客打嚟又的確冇來電號碼，佢亦試過因為咁而miss咗客嘅電話，所以簡單嚟講，Tarf喺office hour以內係焗住聽。
純粹打嚟講粗口嘅行為持續咗一個月，第二個月開始有少少內容，因為Tarf唔知得罪咗咩人，都有正面問過對方有咩仇口，然後個男人就話佢搶人女朋友，又揚言要搵人打阿Tarf，仲叫佢出入小心啲。
Tarf聽到一頭霧水，一路叫個男人講清楚啲，對方又完全無理，次次都係打嚟鬧完就收線，Tarf話有啲擔心，始終自己在明，人哋在暗，唔知條友會點樣搞事，畀人打就唔好驚，最驚真係咁老土走嚟淋鏹水，卒之有一次阿Tarf好有心機咁同對方傾計，因為又係office hour，我喺隔籬都聽到笑，Tarf好似社工咁樣慢慢問發生咩事，又話畀佢屌咗幾個月好無辜，自己已經有穩定女朋友加上從來冇亂搞男女關係。
對方可能屌咗幾個月開始覺得唔係辦法，終於向Tarf承認自己係Agnes嘅男朋友，條友見過Tarf同Agnes嘅合照，又知道Tarf成日借啲意約Agnes去街，仲成日對住佢女朋友講咸嘢……痴線！完全與事實不符。
首先我哋Sales Team同Agnes已經係唔同部門，大家個坐嘅位都有一段距離，其次係我哋根本同Agnes唔熟，因為Agnes都只係入咗呢間公司8至9個月咁上下，所以當日Tarf被要求合照先會覺得唐突，唔計say hi say bye，大家嘅交談應該唔超過20句。
因為Tarf畀人電話恐嚇咗幾個月，基本上我哋department人人都知呢件事，結果呢單嘢驚動到Team Head，呀頭知道後仲嬲過Tarf本人，最終走去同Agnes個阿姐講，兩個dept head閂埋房門開會，之後再叫埋Agnes入去「照肺」，另外叫Tarf入去講返成件事，真係搞到好無癮。
聽返Tarf講，Agnes喺會議室裡面承認叫Tarf合照，係因為想激自己個男朋友，佢話覺得男朋友唔夠緊張佢，想對方呷醋，所以先至會咁做，強調唔知道男朋友日日打去恐嚇阿Tarf，又話可能係男朋友check佢手機先搵到Tarf嘅電話號碼。雖然唔知Agnes呢個解釋有幾多成係真，不過照Tarf一直畀佢男朋友鬧嘅內容，似乎係吻合嘅，而嗰次大家閂埋房門講清楚之後，Tarf亦冇再收到恐嚇電話，事情告一段落。
我第一次覺得原來自己唔靚仔都有好處，Agnes當日要求同Tarf合照真係「暗藏危機」。
Tarf喺呢件事𥚃面真係好無辜，最慘係個女同事面皮成尺厚，唔好話Tarf，我哋Sales Team幾個同事喺公司撞到Agnes都唔知講乜好，換轉係我一定resign，你咁樣屈個男同事追你，要佢畀你男朋友日日用粗口問候，好唔好意思呀？
投稿讀者：Wong
＝＝＝
講到被同事另一半誤會，我覺得呢一單慘啲
《被同事老婆當仇人，原來File黃頁咁厚》
https://hkofficedaily.com/?p=15360