好多人做Sales可以飛黃騰達，搵好多錢，不過我唔可以。
好多年前我做過行街Sales，非常唔適應，老細要我哋每日visit至少5個client，朝早11點要離開公司㗎喇，否則就會有面色睇，但係啲客根本唔想見我哋，每次打去同佢哋講：「你好呀，最近有冇咩要訂呀？今日我會經過荔枝角，到時上嚟見見你吖。」
超過8成嘅客會覆：「上嚟做咩啫？有單會搵你㗎啦！好多嘢做呀！唔得閒應酬你。」
雖然態度惡劣，不過我好理解，將心比己，自己做緊嘢都唔想有個Sales上嚟公司搵你啦！
後來學精咗就決定蛇王，11點離開公司返屋企瞓覺，有次買咗盒叉雞飯返去食，食完小睡片刻，下午3點鐘紮醒，唔知點解斷咗片，突然諗：「大鑊，瞓過龍曠工！」當我彈起身之後，望一望枱面有個飯盒，我先慢慢記起朝早係返過公司㗎！當年做Sales嘅日子，一個字可以形容～～～頹。
我太唔鍾意份工喇，啲客當你係狗，老細又係咁畀啲不切實際嘅target你，同事之間好多小圈子，已經選擇唔埋堆㗎啦，點知仲衰，所有小圈子一齊唔妥你。
或者你會問，做得唔開心咪唔好做囉！有人搵支槍指住你做呀？鬼唔知阿媽係女人咩，窮吖嘛！呢份糧都係僅僅夠開支，每個月去到廿幾號已經捉襟見肘。
好記得有一次我去見客，離開時去咗附近商場嘅洗手間，入面有個清潔工令我留下深刻印象，因為目測佢仲細過我，真係廿幾歲仔，我見佢洗完其中一格廁所之後行出嚟，仲識得對我點點頭笑一笑。我自己份工每日都係陪笑，一眼就分得出邊啲係「職責所在嘅笑」，邊啲係「發自內心嘅笑」，我唔知佢人工幾多？亦唔知佢點解會洗廁所？我只係知道佢嗰一刻真係快樂。
好多人用外表去判斷一個人快唔快樂，其實著住西裝並唔代表快樂，更何況社會上好多「身光頸靚」都係扮出嚟，大把人著住名牌衫褲但係身無分文，亦有人著短褲人字拖原來腰纏萬貫。再者，雖然冇錢係萬萬不能，但係快樂的確唔係用錢可以買到，起碼我肯定當日喺商場見到嗰個洗廁所嘅後生仔係比我開心，比我更無憂無慮，比我生活得更輕鬆。
所以最近又聽到人問：「點解有啲人會做洗廁所同埋倒垃圾呢類工作㗎呢？究竟佢哋後生係咪做錯咗咩事，後來先會搞到咁折墮呢？」
職業無分貴賤，只有分適唔適合自己，同埋做得開唔開心。至於賺多定賺少，高尚定唔高尚，最重要係睇你嘅心態同埋生活模式。所謂嘅低下層工作，或者對方真係做得好開心好自在，你叫佢著西裝去中環返工，未必係佢最渴望過嘅生活。
其實有工開，可以自食其力，本來已經係一件值得開心嘅事。