電話響起～
我：「你好，乜乜診所」
佢：「點解啲藥咁苦？」
點解你個問題咁高能？
我：「你俾俾你個覆診號碼我先呀，我同你睇睇排版，睇吓係啲咩藥先」
佢：「XXXXX」
我搵到排版唔見有藥水，多數俾人投訴苦嘅都係藥水，今次究竟衰邊隻？
我：「先生，請問你係指邊隻藥比較苦呀？」
佢：「全部呀，隻隻都苦呀」
我：「就咁吞落去喎，一擺入口即刻飲啖水就吞落去喎？都覺得苦呀？」
佢：「你識唔識食藥㗎？」
我最鍾意聽到人哋問我識唔識㗎啦，一講得呢句即刻又有新奇刺激又好玩嘅事要發生了！COME ON BABY！
我：「你係點食㗎？」
佢：「要啲藥發揮到最極致嘅效用梗係擺落脷底等佢慢慢溶」
你個腦係咪未發揮到最極致呀？
我：「我哋呢啲藥唔駛㗎，就咁吞落去就得㗎啦，如果係有特別食法一定會寫明㗎」
佢：「你哋一定唔會寫㗎，俾我知道咁食藥效最極致食一次就好嘅，你哋食風咩？」
你個腦入緊風呀。
我：「唔係呀，啲藥有指引點食嘅，你可以就咁吞啲藥㗎」
佢：「我唔吞」
咁你苦死佢啦，打嚟托咩。
我：「咁我都冇嘢可以幫到你㗎喎….」
佢：「冇啲冇咁苦嘅藥咩？」
我：「我哋啲藥唔係預你慢慢喺口㗳㗎嘛，就咁吞嘅藥唔多唔少都會有啲苦㗎啦，你就咁吞就可以㗎啦，落去胃都係會溶晒㗎啦」
佢：「你咪唔識食囉！」
係呀？
佢再講：「你個胃同個頭近啲定個口同個頭近啲呀？」
我冇出聲。
佢再講：「計路程都知係個口近啲啦，啲藥喺個口度溶咗咪唔駛去咁遠水路囉，咪快啲有效囉」
你真係一個好貼心嘅男孩子啊。
佢繼續講：「藥都唔識食真係問嚟都冇意思」
嘟。佢CUT咗我線。
你鍾意啦～
===
==
👉🏻即睇其他診所低能奇觀嘅文章
👉🏻《診所低能奇觀》 拐帶睇醫生
https://hkofficedaily.com/?p=15506
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。