有日一對夫婦嚟到診所。
先生行埋嚟登記處：「我老婆有咗要俾啲咩你呀？」
我：「係咪想要驗孕寫信呀？俾身分證我登記先呀，轉頭俾埋樽你，去洗手間留少少小便」
佢放低身分證，我俾個樽佢，佢又返嚟交樽，醫生嗌埋佢哋入房，所有嘢都好流暢正常，做診所助護就係咁easy輕鬆咋嘛，YEAH！
到佢哋出返嚟，醫生寫咗證明信同轉介信。
我同佢哋講：「可以啦，呢張證明就俾僱主嘅，呢張就係去母嬰健康院嘅」
先生望望張證明再問我：「個日期可唔可以改早幾個月呀？」
我：「吓？」
先生：「我同我老婆同一間公司㗎」
我：「呢啲冇得改㗎…」
先生：「咁全公司嘅人都會知道我哋Work From Home嗰陣做咗啲咩」
做愛做的事唔羞恥呀。
先生再問：「改早幾個月啫，你當聽錯咁寫落去咪得」
咁不如你當你香港腳發作自己刪咗去再寫呀？
我：「你哋頭先同醫生講嘅，醫生都有入落電腦度紀錄低㗎」
先生望向老婆：「你都幫吓口啦」
老婆冇俾反應，繼續得先生繼續講：「寫早少少呀姑娘」
我：「呢啲唔係我寫我話唔到事，醫生都唔會改日子㗎」
你死心啦。
先生繼續重覆問：「改早少少呀？」
突然老婆問先生：「你咁驚嘅唔好要囉好冇？」
冷靜啲冷靜啲！
先生靜一靜再問我：「幾錢呀姑娘？得㗎啦」
做愛做的事的確唔羞恥呀，而且你可以日頭做嘢，夜晚做愛做的事㗎嘛，邊個得閒理你啫？
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。