唔知大家公司Annual Dinner可唔可以請埋家人出席，我呢間公司係可以，以前啲工真係未試過，得呢份係咁。但係佢都唔會畀你叫晒全家嚟食，老細只可以畀員工帶老婆老公同仔女出席，老豆老母家姐細佬或者男女朋友就免問。
可以畀你帶老公或老婆嚟會唔會好多人？又未必，其實呢啲公司應酬場合，自己喺度做都唔一定想去啦，所以另一半會出席嘅同事只佔4分1左右，有啲就唔帶另一半嚟，只帶仔女，但通常啲仔女都係比較細，例如幼稚園或小學，正常嘅，十幾歲嘅後生仔女點會想同父母去食公司飯呢！
不過講咗咁耐，我係未結婚嘅，單身寡仔一名。
上年Annual Dinner，我全晚都食得好唔開心同好唔聚財，因為同部門有位同事Raymond帶埋老婆出席，一嚟到酒樓，Raymond就拖實老婆同其他人打招呼，直至介紹我：「老婆，呢個就係傑仔喇！」
Raymond老婆突然收起笑容：「你就係傑仔呀？」
我都嚟唔切反應：「吓？」
Raymond老婆：「我老公成日提起有個同事叫傑仔，原來就係你！」
咩料呀？我同Raymond雖然係同一個department，但未去到好熟，最多就係工作上嘅接觸，會一齊食lunch同埋吹下水，關係雖然好，不過只限於office範圍內，放咗工連WhatsApp都唔會聯絡，我又唔係大粒高層，當時只係做咗一年幾，再上一年個Annual Dinner我都未入嚟，講咩你就係傑仔？講咩你老公成日提起我？一個小角色值得你老公返屋企提起我咩？
及後因為我有份做Annual Dinner嘅抽獎小組，即係要負責搞啲禮物同埋玩遊戲，所以掛住忙冇理咁多，點知開席又嚟料，由於我同Raymond同部門，食飯時坐埋一枱，佢老婆亦理所當然喺度。
Raymond老婆：「傑仔，食雞吖，你咁鍾意。」、「老公，佢冇用公筷喎！」、「鮑魚呀，啱晒你呀傑仔！」、「傑仔聽講你未拍拖喎，正正經經搵返個女朋友啦！」
雖然呢個女人全晚嘅說話同態度都令我好唔舒服，但呢一枱人入面，我始終係最年輕同埋年資最淺嗰個，其他人嗱埋都喺公司做咗最少5年或以上，所以我都無謂反枱，食下又行開搞下抽獎啲嘢，不過就打算第二日返工問下Raymond咩事？
第二朝返到去諗緊點開口，已經有另一位同事忍唔住代我問：「Raymond呀，點解你老婆好似咁憎傑仔嘅？句句有骨，充滿敵意喎！」
頂你個肺，原來其他同事都睇得出。
Raymond擰過嚟望住我：「對唔住呀傑仔，因為我有時出去同friend飲嘢，或者放工遲返屋企都會話同你出去，我老婆識佢哋，Annual Dinner見過晒，得你係新嚟佢未見過，借咗你過橋sorry，不過女人係咁，你唔好介意，其實佢冇惡意。」
我：「咁都冇惡意？出去飲嘢啫，唔使話我鍾意雞同鮑魚呀？」
Raymond：「Er……係咁嘅……有次個friend send咗啲141嘅link過嚟，又畀老婆發現我click嚟睇，詳情唔解釋喇，總之我都好驚，求其話係你send嚟咁囉……」
屌你啦！講得出口嘅都咁震撼，肯肯定背後唔止咁少，我敢講自己個File喺佢老婆心目中厚過黃頁，如無意外，我個角色已設定為雞蟲、有愛滋、玩SM、裝女同事去廁所……
之後Raymond怕我嬲，工作上對我好好，咩都幫手，咩都幫我出頭，平均一個星期請我食一次lunch，唉！算啦！一年先見你老婆一次，我都唔想因為一個每年見一次嘅女人，而走去同一個我日日要見嘅前輩交惡，話晒都未打算離開呢間公司，所以疫情令到今年個Annual Dinner取消，我真係好開心，唔係黑心疫情延續，只係開心唔使再去呢啲飯局。
不過最近有個新入職嘅小妹妹問我：「你同Raymond好friend㗎？」
我：「Ok啦，做咩咁問？」
新入職小妹妹：「冇呀，早兩日Raymond話我係新人，要私底下請我食lunch，佢同我lunch time搭的士去食日本嘢，真係勁好人呀！又肯教我嘢，好細心。但係食食下佢老婆打嚟，我聽到Raymond答同傑仔食，之後佢話老婆咩都呷醋，所以費事講同女同事食喎！又話我咁靚，老婆一定嬲硬，勁搞笑囉Raymond。」
Raymond，我DLLM呀！
投稿讀者：File厚過黃頁嘅傑仔