公司有個美股燈神 買相反足以致富

我哋成班同事都玩美股,有幸見識到GME嘅大衛決戰哥利亞情節,最近亦炒埋啲Clubhouse概念股,風風雨雨下依然獲利,真係要歸功一位燈神~~~我哋老細!

基本上佢話買邊隻股票都好,你只需要戒急用忍,不出兩日就會大跌,屆時慢慢入貨,如果佢睇低邊隻或者抽身離場,你甚至可以按埋層樓重注,因為一定會升,萬試萬靈。

本身呢,炒美股就唔會同老細討論嘅,係佢有一次聽到我哋講美股,然後好奇地問:「你哋都有玩㗎?」搞下搞下,佢知道同事間有個group係專門研究美股,每晚大約10點就開始熱鬧,老細又想join埋,話要add佢入group chat,咁咪是但囉!

你join唔緊要吖,唔好扮專家吖嘛,係咁畀心得,但係啲心得又完全唔得。認真講句,買股票有升有跌,我哋都試過買就跌,沽就升,好平常係咪先?不過自從老細呢盞明燈加入之後,佢真係照耀咗成班同事嘅路,係漆黑中嘅螢火蟲,係沙漠中嘅清澈水源,然後有位同事就話:「其實老細畀心水都係好事,指引我哋嘅方向,不叫我們遇見試探,救我們脫離兇惡。」

我唔知點樣表達畀你聽老細有幾咁燈,佢買啲大型重磅道指成份股都可以跌到飛起,然後一放就開始回升,買細價股呢?一樣咁大鑊!就呢幾日之嘛,有隻叫荔枝嘅美股(編按:LIZI),$5嘅時候佢叫我哋入,佢話自己重鎚出擊,跟住5.3放咗,話自己執咗幾千,又問我哋執咗幾多?大家就喺group chat度求其話有跟隊,少少一兩千斬獲,其實當時根本冇人入,知道老細一放,我哋即刻入場,5.3入,升到15.8,每人帳面獲利5位數,正煩惱緊幾時放呢個問題嗰陣,老細又喺group chat講:「呢隻神奇喎,似乎仲有得升,再入場玩下。」

嘩!鐘聲響起歸家的訊號,所有同事沽貨離場,就喺呢個時候神蹟出現,隻荔枝由15.8呢個價位以山泥傾瀉式跌落13個幾,因為個價細,跌一兩蚊係好多㗎喇,此時老細叫各同事止蝕,佢都蝕兩蚊走,輸萬幾蚊好過跌落無底深潭……其實我哋15.8走咗啦!

只係神蹟又點會出現一次咁少呢?短短幾個鐘都出現兩次呀!喺老細止蝕離場之後,隻荔枝又上返去,今晚盤前見到荔枝直情升到去17蚊,老細似乎有啲唔忿氣,而家又再蠢蠢欲動,我哋今晚睇定啲先,等總司令出手先決定點行動。

我哋另外開多咗個group叫《老細喺大廳》,專門商量真實注碼,而有老細在內嗰個group就用嚟收料㗎啫,最近差啲畀老細發現,因為佢問:「近排大家咁靜嘅,好早瞓咗?唔玩美股?」然後我哋就如夢初醒~~~係喎,個個去晒《老細喺大廳》個group傾計,唔記得返去另一個group得閒講嘢,已經吩咐咗各同事要保持返兩個group都send下msg,唔係會引起燈神懷疑,就嚟新年喇,大家好需要錢,千祈唔好打草驚蛇。

唔好以為我哋好衰喎,同事都有良心發現嘅時候,今日喺office叫外賣,我哋唔使佢夾返飯盒錢,因為知佢噚晚損手,老細仲好慘咁話:「食龍肉都冇味,食荔枝啃撚死咗,你哋輸幾多?sorry呀,今晚再度其他股畀你哋。」

有同事安慰佢:「屌,唔好講呢啲啦!一齊作戰㗎嘛!今晚再傾戰略。」

放心呀!老細唔睇你呢個page,我哋check過佢fb個「About」,佢淨係follow啲Double May嘅page為主㗎咋。

投稿讀者:雷鳴燈

error: