雖然搵工好辛苦，不過做一份唔適合自己嘅工作，其實都係一種折磨。幾個月前我睇廣告搵咗份「收數專員」嘅工作，一睇都知係收數佬㗎喇，結果返咗一個月就頂唔順，環境頂唔順，氣氛頂唔順，自我挫敗感更加頂唔順。
首先我呢間公司係「正途」，雖然講到尾都係追數收數，但我又真係見過佢哋公司名同埋信件，只要你曾經欠過電話費、收費電視月費、寬頻費……等等，除咗服務營運商追你之外，一耐咗就會交由呢啲收數公司去追。佢哋同財仔收數唔一樣，財仔一般有自己嘅人負責收數，我哋就係專責幫啲大公司收數。
係咪覺得呢間公司一定有成班紋身漢同黑社會呢？初初我都係咁諗，但返咗工之後先發現唔係。包括我在內嘅呢班收數專員有阿叔又有後生仔，office喺油尖旺正常商業大廈，入面相當光猛企理，四正過好多工廠區嘅office，咁當然係有老粗啦，但亦都有同事外表十分斯文，記得有位同事個樣極似台灣男歌手張信哲，但佢打電話追數時一開聲真係惡到你心寒。
我呢份收數專員係唔需要出街做嘢，全日喺office打電話追數㗎啫，你問有冇人去拍門鎖閘淋紅油呢？應該係有嘅，但我個層次未接觸到，不過其他同事都講咗係有，佢哋稱為「行動組」，永遠唔會出現喺公司。咁我哋收數專員同行動組又點分工呢？講真係完全冇交接，當我哋打咗好多次都搵唔到個債仔，又或者債仔講完之後唔入數，我哋就會將個file掟出去，然後有同事pass畀內部，內部再叫行動組去做嘢！
以我嘅職位、層次、認知，一直都只係幫公司處理電話費爛帳，老細有冇接其他追數project就唔知喇。呢間office全日都會聽到其他同事打電話追數，個個把聲都好惡，有啲會爆晒粗，係全日每分每秒都喺咁嘅環境下工作，如果你有朋友打嚟，根本就唔方便留喺office聽電話，因為一定嚇親朋友。
有次阿爸call我問食唔食飯？我懶得滯冇行出office聽，諗住簡單應一句就收線，點知咁啱有同事打通畀債仔：「XXXX捨得還錢未呀！係咪要我上門呀！」我阿爸聽到都嚇親，係咁問咩事，我亂作話落咗街有個痴線佬大叫……屋企人唔知我做收數㗎，我一直話自己做clerk。
呢度返工要用假姓氏，而且係好冷門嘅姓氏，你會被安排姓白、姓畢、姓田、姓車……等等，冇深究點解，亦費事問，應該係方便債仔打嚟嗰陣，一聽到搵貴姓知道係邊個同事跟。
講返我嘅挫敗感先，我長期有種「債仔好可憐」嘅心態，由於主力追電話費，有啲提早轉台違約都係一萬鬆啲，有啲中途違約就幾千，有啲欠電話費唔交更加係幾百至千鬆啲蚊，銀碼唔算大都交唔到，仲要左閃右避，一定有佢哋困難之處。講到呢度，你應該feel到我嘅心態係錯晒，根本唔適合做呢份工啦！
唔怕話埋畀你知吖，返咗一個月，每日打無數個電話去追數，我直至離職嗰日係一蚊都未成功追到，打出去畀債仔不外乎幾個結果：1）佢電話已停止服務；2）即cut線；3）長響唔聽；4）終於聽，應承你入，跟住失蹤。
最接近嗰次係有個女仔欠1500蚊電話費，打通畀佢，成功對話，個女仔把聲好慘咁叫我畀多兩日時間，我叫佢講過要算數，佢勁有禮貌收線，兩日後打去都照聽，佢話去緊找數，15分鐘後搞掂，之後再打，冇聽我電話，隔日再打，都唔聽，第三日再打，電話已停止服務。
追人數個心唔舒服，仲要冇一次成功追到，唔係食呢行飯真係冇得勉強，後來辭職再搵工，好好彩搵到份正常文職，不過「收數專員」呢個經驗實在太難忘，忍唔住要分享下。
當然，呢個工作經驗係唔會出現喺我履歷上面。
投稿讀者：田先生