Office有小圈子或者同事之間有心病，其實度度都有㗎喇，我公司算係氣氛好好，一直好和平，但係早輪突然有兩位男同事嘈起上嚟，阿A叫阿B還錢，阿B話冇錢唔肯還，聽真啲個銀碼係7萬蚊，阿B仲惡到話要報警，係呀你冇聽錯，債仔話要報警呀！
最初聽佢兩個嘈交係聽到咁多啫，仲聽到阿B同阿A講咗句：「你恐嚇我呀？一拍兩散囉！」跟住就有其他同事分開咗佢哋。
阿頭捉咗佢兩個入房傾，一傾就成個朝頭早，我哋幾個同事一早已經準備咗成斤花生，lunch time即刻捉住阿頭去食晏，希望八多啲料返嚟，你知啦，都要關心下自己dept發生緊咩事，都想知點解會有成幾萬蚊錢銀關係㗎嘛！
原來阿A有兼職做外圍艇仔，可以同佢買馬、買波、買六合彩，聽到呢度我忍唔住打斷阿頭話柄：「六合彩都有外圍？點買呀？幾千萬點賠呀？」跟住我就長知識喇，六合彩外圍係可以買number同大細，唔知6粒珠搞出嚟加埋等如幾多即係大，少過幾多即係細，另外有得買特別號碼，唔知一賠幾十倍，特別號碼係單數定雙數都有得買。
入返正題，阿B輸成7萬蚊唔係買六合彩，亦唔係買馬，而係買波。我自己都睇波，今季因為疫情影響，啲賽果的確係比較反覆，輸死人唔出奇，阿B就係咁輸咗幾萬蚊，不過佢冇死，而家好似係阿A會死先，因為阿A做艇仔，人哋幫襯買波，佢又唔知點樣射出去莊家，人哋大莊係唔識阿B，贏錢同輸錢都係同阿A交收，而家阿B輸打贏要，阿A照計係要自己找咗數畀莊家先。
阿B今次輸7萬蚊，冇錢找發窮惡，冇詳細問究竟拖咗幾耐，總之就冇得還，阿A求助阿頭希望幫手追債，阿頭同我哋講：「其實同事間嘅金錢糾紛，我就唔應該插手，本身諗住有單有據或者有message做證，都會夾一夾阿B找咗佢，唔好搞到同事間面左左，不過呢兩條友而家玩外圍喎，一個買，一個賣，犯法㗎大哥，點幫手追呀？欠人7萬嗰個唔抵可憐，收唔返7萬嗰個都一樣，我叫佢兩個有咩就私底下拆掂佢，唔好搞到返公司。」
我唔係想幸災樂禍，因為呢單嘢堅好笑，聽講阿A同阿B喺阿頭房裡面都情緒激動，阿B三句唔埋兩句就話冇錢還，最多報警，阿A可能都知道窮鬼係最惡，最後竟然提出一個offer～～～～～分期付款，我嗰下爆笑咗，賭外圍輸錢都可以分期，唔知以為係信用卡做緊咩推廣，至於最後有冇實行就唔知喇，因為阿頭話唔想理咁多，叫佢兩個自己好好地傾。
阿頭：「我臨尾淨係同佢兩個講，要劏要殺唔該離開office先，唔想上A1頭條。」
投稿讀者：Matt仔