我之前做過一間公司好經典，由見工開始已經係世界級，過程冇特別，係老細親自in我，佢最後一句說話唔係：「你有冇咩問題想問？」，而係：「你食唔食煙？先小人後君子，你行入嚟都見到同事個個喺度食煙，所以好坦白講，雖然想請你，但係接受唔到無謂勉強。」
「我Ok呀，其實我都食煙。」
「好，咁下星期一返工有冇問題？」
「冇問題，多謝晒。」
「你食開咩煙？」
「純萬。」
「好，你星期一準時9:30啦！」
「多謝你畀機會我。」
係呀，我去interview嗰陣，一行入去呢間公司都有少少錯愕，腦海浮起一句歌詞：「抬頭是明月但覺煙霧瀰漫。」
而我又真係食煙嘅，不過唔多，通常係同朋友出去飲酒先食，基本上自己唔會買煙，每次都係痴人哋啲煙，當時我未知Office有人食煙究竟有幾惡頂，只知道已經失業兩個月，再唔答應呢個offer就唔係食唔食煙嘅問題，係食風同食屎嘅問題。
呢間公司其實10個人都唔夠，首先講返點解個老細會直接問我食唔食煙先，做落之後聽同事講：「上個再上個做你個位嘅人，辭職就辭職啦，走去報控煙辦，搞到有日控煙辦上咗嚟，痴線！又唔係冇出糧畀佢，大家又冇過節，真係唔明啲人點諗，所以老細驚呀，問實你先，Ok就做，唔Ok大家唔好勉強，你情我願啫呢啲嘢，啱唔啱先？」
「啱啱啱，但你點知係嗰個舊同事報串？」
「係佢㗎喇，平時一點煙就嘴藐藐。」
「如果佢搵管理處你哋仲大鑊呀！」
「佢有呀，不過老細識個業主，呢度個管理處就廢嘅，新年個個收我哋利是，所以老細驚控煙辦多啲，話晒要罰錢吖嘛！」
「好黑暗呀！」
「香港大把嘢黑暗啦！」
其實呢度啲同事冇乜嘢，個別仲幾風趣，老粗為主，冇辦公室政治，係食煙食得好勁，煙駁煙嗰隻，我自己真係唔得，煙駁煙會想暈，返工後已經買定一包半包長期擺喺枱面，始終新嚟就無謂痴同事煙食咁衰啦，但有時我冇點煙，佢哋係會走埋嚟隊枝煙我食，好癲！
我都尚算適應呢個環境，前前後後做咗5個月，但係引發出嚟嘅問題同煩惱愈嚟愈多，特別係成身煙味，無論衫褲鞋襪定係個背囊都好大陣煙味，自己永遠唔會覺，係屋企人同女朋友聞到之後不斷投訴，有時放工即刻同女友出街，佢會話陣煙味真係好難頂，想攬下都頂唔順，因為太勁喇陣味。
我自己都喺不知不覺間食多咗煙，以前淨係同朋友落bar飲酒先會食幾枝，後來直情有煙癮，女友愈嚟愈不滿，日日煩我要轉工，仲同我講：「你食煙多咗，又長期喺一個細office吸二手煙，遲早出事，唔該你去check下癌指數。」
久而久之，我都唔想自己行呢條不歸路，有時返到屋企掛起件衫，因為屋企冇人食煙，件衫同啲袋嘅煙味就出晒嚟，係難頂嘅，後來搵到份新工就走咗喇。
嗰班同事算好funny，有時會掛住佢哋，但有啲人真係一日食一兩包煙，恐怖到你唔信，希望佢哋都收斂下啦，咁樣落去好易死，唔係想咒佢哋。
投稿讀者：Eason都變煙神