電話響起～
我：「你好，乜乜診所」
對方係一位女士：「診所呀？我想問你一啲好SMALL CASE嘅嘢呀」
我：「如果係健康方面嘅問題，嚟問返醫生好啲呀，我唔係醫生答唔到你啲咩呀」
佢：「唔係唔係，唔係啲咩健康嘢嚟呀，好正常嘅嘢嚟咋，你唔駛咁驚，我自己都未驚過未擔心過」
…咁你打嚟做咩？
我：「我應該淨係可以答到你應診時間啊」
佢：「你聽咗我想問咩先啦，可能你答到呢，唔駛郁啲就搵醫生嘅，你喺得度都算係半個醫生呀，俾啲信心自己先得呀」
醫生，我要出你半份糧呀！
我：「…」
佢：「我要問做愛做得激烈啲同冇咁激烈，個懷孕率係咪會有唔同？」
醫生，嗰半份糧我都係唔要啦，都係俾返你答啦。
我：「…呢層…問返醫生好啲喎，我都唔識答你」
佢：「係咪我問得太婉轉呀？我轉問做愛嗰陣係死魚又或者好淫嘅會唔會有咩唔同呀？死魚會易啲有BB定好淫嘅會易啲有呀？」
『條條大路通羅馬』係咪呢個時候啱用呀？
我：「呢啲我真係答你唔到呀，不如你試吓問其他有懷孕經驗嘅人又或者嚟問醫生呀？」
佢：「我有問啲friend㗎，佢哋話心情呀mood呀都會有影響，咁我叫佢哋俾我睇吓佢哋做嗰陣係點啦，佢哋又唔俾，咁樣我點知要用咩心情咩mood咩反應去做先有呀」
大佬呀，你唔好咁癲啦。人哋兩公婆嘅嘢無啦啦點俾你觀摩呀？
佢再問：「定抑或我一個月係死魚一個月係好淫嘅咁試吓呢？」
我：「你…決定啦，呢層我真係答你唔到，或者你有需要嘅可以嚟睇醫生，醫生都可以轉介你去專科」
嘟。
佢終於收我線。
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。