政府為感染確診市民提供$5000津貼嘅消息傳出後，坊間已經有唔少「玩味濃」嘅post出現，例如《蘋果日報》嘅李八方Online提及到，有確診武肺口水喺拍賣網出售，$1000／10ml，確診賣家如sell出50樽就賺5萬，500樽就賺50萬，上樓置業不是夢，另外Carousell亦有一張未知真假嘅對話cap圖，客戶查詢所售賣嘅確診者口罩係咪嚟自跳舞群組？肯定中招先會購買。
唔少網民更打趣表示，用少少成本買確診者口水或口罩，就有一筆錢可以買到最新推出嘅PS5返屋企。
當然，冇人會用自己嘅健康同性命去換$5000津貼，問題係呢項反智措施嘅方向完全錯晒，自私唔戴口罩嘅人肯定會有恃無恐，反正平時都唔鍾意戴罩，甚至會喺街上面除口罩食煙，而家有埋津貼，仲使乜避忌呀？
對於當權者諗出嚟嘅反智措施，我喺職場上都見過唔少令人啼笑皆非嘅真實例子，當年喺觀塘返office工嗰陣，有個老細好唔鍾意員工搭正6點走，正確啲講，6:30走都唔鍾意，佢認為你準時走即係偷懶，即係唔勤力，即係唔肯為公司付出……通常自己係咁嘅人，先會用呢種心態去諗人。
其實好多員工真係朝9晚6努力工作，為咗準時收工而做足本份交出100％，無奈老細完全諗唔到呢點，仲以小人之心覺得一定要留喺公司耐一耐先叫做有heart，結果佢公佈咗一項新措施，只要你留喺公司直至8點就有每小時$60蚊OT錢，另加一個$80以內嘅外賣可以claim錢，如果留到8:30或更晏，公司容許員工claim埋的士錢。
公司有晚飯同埋車錢去資助OT員工無疑係德政，奈何呢項措施嘅漏洞百出，亦阻唔到別有用心嘅人去攞著數，之後出現嘅情況係有班本身唔做嘢嘅同事拖慢工作，lunch time之前基本上係吹水煲劇玩candy crush（當時好興candy crush），食完飯再施施然玩下做下，去到5點幾6點先投入工作，連帶影響埋平時做嘢好爽手嘅同事，因為努力嘅員工覺得好唔抵，日日仆心仆命勤勤力力，務求喺office hour內做晒啲嘢，點知月尾出糧會少過拖慢嚟做嘅人一截，每小時$60 OT補水，一日兩個鐘即係$120，一星期五日，一個月20日，最低消費都差成$2400，未計claim的士同晚飯錢。
呢項只睇員工留到幾點，唔睇員工實質上做咗咩嘅反智措施，喺實行一個月後出現咗一幕奇景，就係公司去到夜晚8點仲係全人類留晒喺度，有人R腳趾、有人上網睇其他嘢、有人溫日文、有人同女友傾電話，總之各有各hea，一齊坐到7:15左右集體叫外賣，8:30全部人一齊打卡走，個別幾位仲狼，坐到9點幾10點，佢哋話：「約咗friend飲嘢，未夠鐘，呃多一個鐘OT先。」
亦有同事話：「觀塘6點行出去迫巴士又多人又塞，而家遲走不過可以直接搭的士claim錢，其實同平時塞車唔算差好遠，點解我要咁笨6點走呀？」
新措施推行初期，老細晚晚6點幾走嘅時候，見到office裡面50幾個員工全部留低「搏殺」，冇一個位係吉嘅，佢倍感安慰，仲覺得自己嘅決定係好正確，大約5個月後，老細發現工作效率同埋生意冇明顯改善，但係OT錢、飯錢、的士錢，就令公司每月用多10幾萬，佢愈諗愈肉赤，但又要執返個尾彩，結果再次改變策略，取消claim車錢同claim晚飯制度，叫員工OT唔好超過7點，因為要響應環保節約用電喎…….
取消OT同claim錢制度後，全公司搭正6點即走，連未有OT補水前會做到6點幾7點先走嘅勤力員工，都一併搭正6點馬上鬆人，士氣差過之前。
有時一啲反智嘅措施唔止貽笑大方，仲會適得其反，支出多咗但收唔到預期效果，不懷好意嘅人趁機賺一筆，同時搞到做足本份嘅人心灰意冷，兩頭唔到岸。
根據政府今次派5000蚊嘅政策方針去演算，即係之前去一樓一召妓，又或者不理勸喻去多人高危嘅群組，中招人士可以袋走呢筆津貼，反而嚴守防疫措施，跟足指引避免自己感染嘅人就冇獎勵同津貼，咁同朝9晚6勤力工作，但係收入仲少過呃OT員工呢個case有咩分別？
有人話：「咁中咗武肺手停口停吖嘛，咪要津貼囉！」
我想問：「既然唔想手停口停，點解仲要喺疫情肆虐之下去參加高危群體活動？」
如果又有人好似之前咁，去完風月場所中招，幾廿個KOL迫埋半島酒店房Staycation中招，跟住再喺社區四圍走不斷播毒，係咪又要派$5000畀佢哋？咁樣同獎勵緊佢哋有咩分別？有冇需要視乎不同情況去批呢？
德政還是反智，往往係一線之差。