投稿讀者：行家
我都係做headhunt，話說我間Recruitment Agency分得好細緻，搵Banking job嘅有一條team，IT job就另一條team，另外又有其他department係專做contract job之類，各行各業分好晒。
IT recruitment嗰條team一向氣氛最差，因為個team head阿Hill係世紀仆街，捽數捽得好勁，下屬追唔到target就會講啲好難聽嘅說話，而當我哋每條team都有一定底薪升幅嘅同時，阿Hill係撳住唔畀下屬加人工，美其名話想幫公司慳錢，實際上係瀨老細鞋底（應該袋底都肯瀬）。
同埋呢個阿Hill係非常白鴿眼，對住junior同事黑口黑面好似死老豆咁，見到高級過佢或者老細嘅時候就烚熟狗頭。
我都聽過呢位IT team head鬧人，佢特別針對其中一個男下屬阿Joe，有次聽到佢話阿Joe人頭豬腦，有次就話佢跑唔到數，同呃公司錢冇分別，又話茶水阿姐都有貢獻過佢。呢位team head鬧人嘅聲浪好大，附近嘅department全部都聽得好清楚，阿Joe當然好尷尬。
其實阿Joe有同我哋班男同事呻，佢好鍾意headhunt呢份工，但同時覺得好難做，你做headhunt都知啦，有時努力並唔足夠，運氣都佔一部分，開唔到單唔代表你冇heart做，辛辛苦苦撮合咗candidate同埋個客之後，candidate自己有更好offer而揀另一份工嘅情況經常發生，如果因為條數唔靚就要畀上司侮辱，其實係好唔公平。
阿Joe問過我哋其他team有冇空缺，佢想內部調過嚟，我同其他同事都試過幫手，因為佢抵受唔住日日畀阿Hill鬧，但你知嗰班team head同team head之間始終有交情，佢哋收咗阿Joe過嚟，某程度上即係同阿Hill作對，試問邊個阿head會為咗保阿Joe而做傻事呢？上面嗰班都好自私㗎！
後來有日阿Joe又甩咗隻job，佢team head阿Hill講咗句：「正廢柴！今個月爭你未開單咋！究竟係咪呃飯食㗎你！」阿Joe應該積壓得太耐喇，第一次兜口兜面還擊：「你老母就廢，鬧夠未呀！生出嚟畀你鬧㗎？你呢個上司就真係咁多個team head裡面最廢喇！」
一人一句，兩個又愈哄愈埋，其他同事即刻行埋去分開佢哋，避免有更尷尬嘅場面出現。
同日阿Joe辭職，畀人針對咗咁耐，都算係意料之內，大家以為事情會告一段落啦，點知未完。隔咗個半月左右，阿Joe話佢搵到新工，去咗我哋其中一個客嘅公司做Talent Acquisition，你做過Headhunt實會明白，我哋呢行轉去普通公司做In House HR或者TA（Talent Acquisition）係好普遍，老實講仲幾吃香。
阿Joe第一時間畀咗啲job我哋，身份上由同事變成我哋嘅客，真係好多謝佢，但原來呢個係阿Joe復仇計劃嘅第一步。
阿Joe首先約咗我哋大老細上佢新公司傾合作，話會畀大量職位我哋請人，然後要求一個discount rate，大老細份人好簡單㗎啫，見錢開眼，阿Joe而家間公司咁大，本身又係我哋嘅大客，佢覺得阿Joe過到去會照住舊公司，畀好多生意我哋做，當堂笑到見牙唔見眼。
我都有份幫阿Joe請人，差唔多畀親CV佢都請咁滯，其他team嘅同事做阿Joe啲生意亦好順利，後來阿Joe話要搵幾個IT position，咁我公司喺分工上一定要畀佢以前個team head阿Hill跟，因為IT job歸IT team，你明㗎啦！阿Joe仲指定要同阿Hill對口，老細當然話冇問題啦，最緊要賺錢，話之你兩個以前有咩恩怨情仇啦！
前上司阿Hill send過去嘅CV，阿Joe收一份ban一份，仲要日日打電話發炮鬧阿Hill，話佢係廢柴唔識搵candidate，跟住再打畀大老細投訴，話前上司阿Hill態度差，畀啲唔啱條件嘅CV佢哋，警告再係咁就抽起晒啲job畀另一間agency，大老細腳都震埋。
阿Joe每日唔打嚟爆阿Hill係唔安樂，每次喺電話羞辱完前上司之後，阿Joe就會WhatsApp我哋，成班同事即刻望過去，又真係見到阿Hill塊面紅晒，有啲似咩呢？似當日佢鬧完阿Joe之後，阿Joe面紅耳熱嘅反應。
阿Joe對我哋完全冇保留，佢承認係明玩嘢，而且一次比一次講嘅說話難聽同埋有挑釁性，嗰次阿Hill塊面紅到爆血管咁滯，原來係阿Joe喺電話度講咗句：「我一定玩殘你！指定咗要你跟我啲job，你唔使旨意畀班細嘅跟。」
阿Hill同大老細反映過阿Joe係公報私仇，淨係老點佢搵人，但從來唔請佢啲人，仲要日日追佢拎CV，不過老細完全唔認同佢，原因係阿Joe一樣有畀position其他team去做，全部人都順利喺阿Joe身上開到單，老細認為我哋班細嘅都得，冇理由阿Hill呢個department head一張單都開唔到。
個人認為阿Hill係抵X死嘅，當年咁對人，而家阿Joe轉咗做TA反客為主，趕狗入窮巷就梗㗎喇，唔折磨你都對唔住佢自己啦！
不過阿Joe玩咗阿Hill幾個月之後，可能係出咗啖氣啦，佢都慢慢放開喇，阿Joe話求職者係無辜，唔想因為私怨而影響到其他人，最後佢話唔要阿Hill跟佢啲job，轉為畀IT recruitment一個新同事跟，阿Hill諗住甩難，點知新同事畀幾隻CV阿Joe全部中晒，阿Joe即刻打畀阿Hill：「你真係垃L圾，新人都勁過你。」
世界好細，香港行頭更細，我諗山水有相逢就係咁解。