舊同事打嚟問我某一個客嘅background：「唔好意思想請教下，你以前咪跟開呢個客嘅，Check返system見你都開過幾張單，應該正常㗎喎，但係我個求職者上去interview之後話好古怪，而家唔肯去2nd in。」
我：「個客係咪警告你個求職者搵食行遠啲，唔好喺公司拍拖呀？」
「係呀！差唔多意思，聽我個求職者講，負責interview嗰條友係咁問佢有冇拍拖，佢話自己single，然後對方再三強調公司文化係唔贊成辦公室戀愛。」
我：「首先你個求職者有權唔答，有冇拍拖關你鬼事？不過佢因為咁而turn down offer？」
「又冇turn down，個客都未話請，仲要2nd in，但我個求職者話以為去咗參加全民造星，又唔係做Artist，點解要promise唔會同同事拍拖？你以前係點做呢個客？」
我：「照做囉！都未入佢公司做，點可能咁快講定唔會同同事拍拖啫？Hea答得啦！感情嘅嘢好難講㗎嘛，邊有得保證？Btw，全民造星好似冇話唔畀參賽者拍拖喎！」
「係喎，咁其實呢間嘢咩料呀？咁古怪嘅。」
見我個舊同事虛心請教，喺度就講下呢間公司嘅歷史。根據當年同我接觸嗰位HR陳述，公司曾經有一pair同事拍拖，本身甜甜蜜蜜，後來唔知因為咩事嘈交嗌分手，日日將私人恩怨帶埋落公事上面，最重要係呢對情侶都係sales department，結果互撬對方啲客，個女仔仲會無啦啦喺office大喊，而個男仔唔想煩，連續請咗20日大假避情債。
最後，佢兩個復合……
「咁咪一天都光晒囉！」
我：「未完，因為佢兩個鬧分手期間，其他同事都有take side，有啲幫個女仔，有啲幫個男仔，復合之後，個女友同男友講返有邊幾個同事當日話佢衰，慫恿佢哋分手，而個男友亦都同個女友講返，有邊幾個同事覺得佢唔係好女仔，成日發癲，早飛早著，結果佢兩個又分別同好多同事結怨。」
「其實感情問題就一律建議分手㗎喇，點知佢兩個會復合，畀過意見嘅人竟然被清算，不過啲情侶鬧分手都係唔好畀太多意見，你永遠唔知佢哋幾時跳掣又喺返埋一齊。」
我：「個HR話，老細好不容易先等到呢pair情侶先後離職，所以從此之後就有個不成文嘅規定～～～～～辦公室不准談戀愛。」
「邊有得咁規定㗎，人哋要拍拖都控制唔到啦，真係拍拖又點先，炒咗對情侶咩唔通？可以去勞工署告個老細㗎喎，你點睇？」
我：「冇點睇，覺得成件事好on9，學你個求職者話齋，公司唔畀員工拍拖，你估做Artist咩！」
個人認為辦公室戀情係非常普遍，坦白講，一個人返工嘅時間遠遠比出街多，所以同同事擦出愛火花嘅機會頗大，就算唔係同同事拍拖，當個另一半喺出面認識，鬧交或者鬧分手嘅時候，一樣會將情緒帶返公司，所以關鍵唔係同咩人拍拖，而係本身個人識唔識控制情緒，識唔識得公還公，私還私。
我記得幾年前美國有份辦公室戀情研究報告，當中有五成受訪者表示自己曾經同同事拍拖，另外有兩成受訪者表示，當時正在同同事拍拖，所以男女感情呢啲嘢邊有得禁止㗎！唔係已婚上司下屬搞埋啲不倫戀都偷笑啦！