Leo：「加拿大嗰邊批咗，我同Macy 9月底飛，特登飲埋Raymond嗰餐先走，政府唔好玩嘢又禁晚市就得喇，我想多啲時間準備，應該呢一兩日就遞信。」
會唔會太多人物搞到好亂？簡單啲，以上同以下所有出現嘅男仔名都係我同事，同一個department，而所有女仔名都係佢哋嘅另一半，亦都係我老婆嘅表姐表妹。
同事同埋老婆嘅親戚會撈埋一齊，全因4年前我嘅婚禮，一個伴郎（Leo）加三個兄弟（Raymond、Tom、Victor）全部係我部門同事，我哋份工都幾忙，有時見佢哋仲多過見屋企人，所以呢班戰友私底下亦好好交情，最重要係呢班人其實幾抵得諗，結婚搵兄弟好自然搵咗佢哋。
老婆朋友多過我，但佢同兩個表姐（Micky, Macy）感情十分好，F.5之前仲要一齊住，真真正正由細玩到大，4年前結婚佢一定要呢兩個表姐做伴娘或者姊妹，本身想加插另外兩個friend，不過又希望姊妹團嘅人馬本身就互相認識，唔使到時要破冰尷尷尬尬，所以最後就叫埋兩個表妹（Zita, Olivia）一齊做姊妹喇。
我同老婆從來冇諗過要做雞仔媒人，嗰陣結婚都夠晒忙，顧掂自己個婚禮先啦，邊有時間搞呢啲嘢吖，好多人話兄弟姊妹應該喺婚禮前出嚟食餐飯，但我哋忙到安排唔到，換言之佢啲表姐表妹同我啲同事係婚禮當日先至第一次見面，咁都可以擦出愛火花首先要多謝我舅父。
我有個舅父成個曹查理咁款，連個格都好似（後生一輩知唔知邊個係曹查理？），至弊佢朝早有份去酒店畀我哋斟茶，所以玩新郎個環節佢都有去新娘房嗰邊湊熱鬧，曹查理舅父九唔搭八提議啲兄弟姊妹玩「嘴對嘴傳膠片」……
曹查理舅父：「咀吖！我都可以一齊玩㗎！」
老婆班姊妹面露尷尬，又冇一個人夠膽開聲拒絕，曹查理舅父仲不斷催迫要開始玩呢個game，呢個時候我兄弟之一嘅Victor就出聲喇：「唔玩！冇嚟新意，呢啲遊戲過時啦！」
曹查理舅父：「曾志偉掌門人都有玩㗎，好過癮！」
Victor：「邊有人睇掌門人㗎，好悶呀！不如我表演單手掌上壓啦！」
曹查理舅父：「掌上壓有咩特別呀，嘴對嘴傳膠片先熱鬧㗎嘛！」
Victor：「冇特別？舅父，咁不如你表演十下掌上壓先啦，我單手，你雙手。」
曹查理舅父：「咪搞咪搞，骨頭都散呀！」
Victor：「咁舅父你行開先，畀個位我做掌上壓。」
輕輕鬆鬆就解咗圍，我見班姊妹個個放下心頭大石之餘，仲覺得單手做掌上壓嘅Victor好man，特別係老婆嘅大表姐Micky，後來我先知佢兩個已經私下用WhatsApp傾計，隔咗一個星期左右仲相約出去食飯，唔係成班兄弟姊妹喎，得Victor同Micky兩個咋喎，我同老婆隔咗成年先知佢哋拍拖，估唔到曹查理舅父會促成呢段姻緣。
第一對：Victor + 大表姐Micky
老婆另一個表姐Macy就同伴郎Leo最快開始（後來先知唔係，下面再解釋），話說我哋兩家人啲老粗親戚喺婚禮當晚係咁敬酒，好似要隊冧晒全部人先安樂，由於Macy係伴娘，好多時企到最前解圍，啲親戚咪係咁叫佢代新娘飲囉，Leo威呀！見一杯頂一杯，仲man過朝早單手做掌上壓嘅Victor。
據聞Macy當晚已經同我老婆講過Leo好好人，而我就太熟Leo喇，條友仔本身唔多飲酒，因為佢會出現痛風症狀，婚禮後第二日果然出晒事……
我同老婆講：「Leo隻腳腫晒喎，搞到我好內疚，不過我畀人拉咗去影相，睇唔到咁多。」
老婆將呢件事同班姊妹講，表姐Macy緊張到即刻WhatsApp Leo慰問，因為我哋婚禮當日開咗個WhatsApp group方便兄弟姊妹有緊急事溝通，估唔到佢兩個「公器私用」，呢個都唔係重點，重點係Macy原來走咗去陪Leo睇醫生。
我：「痛風點醫？」
Leo：「冇㗎，主要係戒口㗎咋！」
我：「咁Macy又話同你睇醫生嘅，聽我老婆講仲睇得好密喎！」
Leo：「睇咗醫生一次啫，之後幾次都係睇戲食飯。」
哦，明白晒，其實Leo同Macy都係兄弟姊妹中比較年長嘅一對，可能大家各方面都偏向成熟，所以一拍即合嘅同時，仲要用咗一年半就拉埋天窗（唔知咩事咁趕時間😂），所以一年半後Leo同Macy嘅婚禮幾乎又係原班人馬做兄弟姊妹。
第二對：Leo ＋表姐Macy
講返Leo同Macy嘅婚禮，班底係同一批人，唯一分別只係我同老婆由新郎新娘變咗做兄弟姊妹，第二次見面嘅Tom同埋老婆嘅表妹Zita原來一早有啲嘢，Tom承認喺我嘅婚禮上已經對Zita一見鍾情，但係嗰陣Zita表妹有男朋友，誰不知阿Tom條衰仔念念不忘唔放棄，又畀佢等到Zita回復單身，後來佢兩個就一齊喇。
Zita同Tom有個共通點，就係唔想結婚生小朋友，佢哋認為同居開心啲，冇咁大壓力，anyway，最緊要佢兩個開心就得啦！
第三對：Tom + 表妹Zita
我另一位兄弟Raymond同埋我老婆另一個表妹Olivia就最衰，點解？因為佢哋玩地下情，收收埋埋拍咗3年拖，早排突然派帖話8月結婚，我哋所有人都嚇一跳，冇頭冇尾冇人知你哋幾時一齊，頂你個肺當自己明星咩，學人秘戀！
佢哋好彩呀，因為Leo同Macy之前決定移民加拿大，遲啲結就未必出席到個婚禮，而家時間啱啱好。
我：「其實你係幾時同Olivia開始？」
Raymond：「下，幾年前啦！」
我：「講啦仆街仔，我哋一嚟就收到帖已經成肚火㗎喇！」
原來Raymond同Olivia比起其他幾pair人更早撻著，早成點呢？就係4年前我結婚當晚。
Raymond條死仔同Olivia同路，佢哋都住九龍灣，婚禮結束後佢話送人返屋企，但兩條友醉醉地冇返九龍灣，去咗九龍糖，Olivia覺得講出嚟會畀我哋笑，所以就要求Raymond保密，諗諗下，我同老婆結婚當晚因為太攰冇洞房，Raymond同Olivia反而……佩服佩服！
第四對：Raymond + 老婆另一個表妹Olivia
1場婚禮撮合咗4段姻緣，我真係想知道香港史上有冇其他相同例子，曾經有其他朋友話好神奇同埋好羨慕，身邊最close嘅人都親上加親，睇你點睇啦，表面上係，實際上都唔係太爽㗎咋，Leo本身係阿頭，後來都唔敢鬧我哋，大家有時喺公司講嘢都有少少保留，費事講錯一句又唔知邊條二五返屋企篤灰，就連公司新嚟咗幾個靚女都唔敢讚唔敢望。
有時我老婆又會向我打聽Leo、Tom、Victor、Raymond嘅事，包括以前同而家嘅嘢，肯肯定係佢啲表姐表妹想起底，一個唔覺意隨時搞到班兄弟家變，所以我喺office都要步步為營。