數數手指，我都出咗嚟社會工作13年，頭10年經常轉工，近呢4年終於穩定，因為我遇到一個「特別」嘅老細，佢有啲行為令你覺得佢好慷慨，有時就覺得佢好膚淺同冇腦，所以我唔會用「好」或者「唔好」去形容呢個老細，睇埋落去你應該會明。
由4年前我嚟呢間公司interview講起，見完HR再見老細，返屋企等咗兩日消息，HR打畀我confirm offer，偏偏之前見另一份工又返咗offer，錢同福利係差唔多，但另外嗰間比較有規模，咁我咪reject個HR囉，點知隔咗唔夠半個鐘佢又打嚟：「黃生話人工可以畀多$5,000，你不如再考慮下。」
黃王就係我而家個老細，當時我聽到人工畀多$5,000真係扯晒旗，首先係$5,000喎！兩份工都係咁做，多五叉嘢真係好好使㗎！另一份工就算一年加$1,000，你都要做幾年先追平呢個數啦，打工都係求財啫，講真兩間公司嘅硬件又唔算差好遠，咁梗係揀人工高嗰份啦！
其次係，我以為自己好叻好勁，個老細好鍾意我，咁諗都好正常吖，明明拒絕咗個HR，轉個頭對方又再打嚟話老細加碼，一定覺得我係可遇不可求嘅人才啦，內心多少有啲飄飄然，見你咁識貨我咪應承囉，跟住我就入咗嚟做喇。
入職後有冇伏呢？其實又冇嘅，我只係誤會咗自己係可造之材啫，原來黃生呢位老細之所以畀多$5,000人工，係因為佢想要嘅嘢係會付出一切代價去得到，呢個係佢嘅性格，覺得有人爭同埋貴就係好嘢，公司所有嘢都要最貴，例如影印機同電腦，黃生係完全唔睇功能，只會揀最貴嗰部。
清潔姐姐係外判公司，黃生話人哋啲吸塵機唔掂，特登買咗部Dyson返嚟畀人哋，叫佢專用呢部嚟吸我哋公司；4年前佢出差叫個助理買行李箱，助理知AEON減價，睇中個又平又靚，點知黃生話：「幾千蚊嘅行李箱邊度用得㗎？呢個仲要二千幾？一定好渣啦！」
助理同佢解釋咁平係因為減緊價，黃生就話減價一定有古怪，結果又幫佢搵咗Samsonite一隻6千幾蚊嘅行李箱。
黃生：「六千幾咁平？有冇靚啲㗎？」
助理：「Samsonite呢隻六千幾好靚喎，又輕！」
黃生：「六千幾邊用得㗎，我意思有冇貴啲㗎？」
結果助理走去search RIMOWA，萬幾蚊。
黃生：「萬幾蚊就差唔多，呢隻一定得，就呢隻啦！」
結果佢個RIMOWA出完一次trip爛晒，凹到好似喺十萬呎高空飛落街咁，但黃生堅持話貴嘢永遠係最好。
其實公司有啲同事會捉住黃生嘅特點去呃佢錢，不過用個「呃」字都唔係咁恰當……
有次公司要小裝修同埋換過批枱，某同事舅父就係做呢類生意，咁就連埋出面幾間裝修公司一齊報價啦，返到嚟黃生話間間都差唔多唔識揀，又話啲報價比起佢心目中平好多，覺得唔多可靠，個同事走去同個舅父講，聽講個舅父咁樣回應：「吓？公價嚟㗎喎，見係你老細已經特登平咗，又唔滿意呀？咁一係收佢貴啲囉！」
如是者，同一批材料，同一種做法，同一份報價單，佢舅父mark up多咗20萬，最後黃生真係揀咗！
黃生：「呢間就差唔多喇，佢收得貴一定有原因嘅，料一定靚啲，師父手工一定好啲啦！」最後做完出嚟黃生話好滿意，重複咗好多次「一分錢一分貨」，猛咁讚同事個舅父好掂，第日屋企裝修都會用佢。
同事向我哋講：「舅父話我老細都幾On9，呢份貴咗20萬嘅報價單同之前嗰份根本一模一樣，係改咗個格式同埋銀碼，又話老細完全冇睇內容，淨係用價錢去衡量好與壞，早知狼死啲加夠30萬喎！」
唔止對死物或者工程係咁，黃生對住生勾勾嘅人都一樣，除咗長期覺得貴嘢一定好之外，佢仲認為錢係萬能，有次同佢去人哋間公司見客，黃生係咁話人哋個receptionist又靚又好禮貌，畀咗張卡片人哋兜口兜面要撬個女仔過檔。
我同老細講：「會唔會唔係咁好呀，你喺人哋間公司撬人哋個staff喎！」
黃生：「有咩問題呀？良禽擇木而棲，我畀雙倍人工佢，都係做receptionist之嘛。」
我：「不過我哋公司咪已經有receptionist囉！」
黃生：「咁咪兩個receptionist囉，冇問題呀！」
黃生癲到臨離開人哋office之前走去問個receptionist幾錢人工，因為佢覺得呢個女仔好好，可以畀double，交低咗卡片叫對方記住打畀佢。
好在當時個客冇跟埋出嚟，人哋公司冇其他職員見到，不過呢位receptionist仍然好尷尬，換轉係我都會啦，個客上嚟無端端話好欣賞你，出雙倍人工叫你即刻轉工，點知係咪一個局定係開玩笑呀，所以個receptionist只係禮貌地笑笑打發黃生，都好既，真係要畀黃生知道錢唔係萬能，唔好咁痴線啦！你同強搶民女有咩分別呀？
隔咗兩日，我朝早9點返到公司……人哋公司個receptionist坐咗喺我公司個reception，佢做咗我公司個receptionist，然後我呢度有兩個receptionist……
後來大家熟咗，我走去同呢位receptionist傾計：「估唔到你真係嚟咗。」
「係呀，我最初都以為黃生講笑，點知佢又打嚟我公司，咁我負責聽電話總機㗎嘛……」
我：「真係兩倍人工？」
「係呀，我本身$18,000，黃生話當我$20,000，而家畀夠兩倍我，咁$40,000我真係抗拒唔到，黃生真係好好人。」
呀黃生，我幫你見客做生意，雖然你當時為咗搶我而on top加$5,000，但係我份糧都冇$40,000，receptionist都係聽下電話咋喎，公司仲有兩個receptionist，你使唔使咁呀？豪爽同埋水魚其實只差一線㗎咋！
我同出面啲朋友講，人人都懷疑黃生係睇中人哋想做Sugar Daddy，不過我哋班同事太了解黃生喇，有冇諗過做Sugar Daddy係一回事，但佢的確有鋪高價奪人所好，同埋愈貴愈覺得好嘅癖好，有錢果然特別任性，聽講黃生成個家族都好有錢，所以呢種作風應該唔會改㗎喇。