「老細，我唔做喇。」
我：「做得好地地，點解呀？」
「Sorry，唔係歧視，但我原來唔太習慣同智障人士一齊做嘢。」
我：「介唔介意講下有咩唔習慣？我想睇下可唔可以說服你留低。」
「我都知咁講一定落地獄㗎喇，其實班friend唔知我公司會用智障人士，有次我傾傾下私人電話，阿琪忽然喺後面大嗌同埋講嘢，唔知點解呢，我朋友一聽就覺得阿琪把聲類似唐氏……可能啲tone真係聽得出，總之我唔想畀朋友知啦，公司啲大合照我又唔敢post，sorry呀，真係唔係歧視，只係我高估咗自己嘅接受能力。」
呢位辭職嘅同事都做咗幾個月，其實曾經有求職者上嚟interview，一見到公司有聘請殘疾人士（包括智障人士同精神康復者），工都唔見就即刻走，坦白講，我哋公司聘請殘疾人士嘅比例唔算多，日常工作並唔會覺得好唔同。
不過我比較耿耿於懷嘅係，其中一次有個客咁樣問我：「你請智障嘅人係咪因為可以攞津貼？」
只可以講句，咩人就諗咩嘢，佢要向呢個方向諗，我都控制唔到。
聘請殘疾人士，概念係源於我以前做過嘅一間公司，當時個老闆都有聘請智障人士同精神康復者，仲記得嗰陣有個同事叫阿明，佢第一日返工就周圍問人交換電話號碼，不過又冇乜人睬佢，可能係太忙嘅緣故，後來阿明走嚟問我。
「我可唔可以同你做朋友呀？」
我：「可以，梗係可以啦！」
「咁我哋交換電話號碼吖！」
我真係有將自己嘅電話號碼畀佢，直到今時今日仲記得阿明嘅表情同埋講過啲乜嘢。
「好嘢！我要返去同醫生講。」
我：「點解要同醫生講？」
「醫生叫我識多啲朋友囉！我而家有朋友喇！」
阿明嗰個開心同埋滿足嘅表情，我依然印象深刻，後來我創業，有自己嘅公司，不經不覺已經踏入第十個年頭，期間一直keep住請殘疾人士。
我公司目前聘用咗3位殘疾人士，雖然佢哋都係負責比較簡單嘅工作，但係表現絕對令我滿意，而且做嘢好上心，責任感同埋效率絕對唔輸蝕畀其他人，最重要嘅係，我見到呢幾位殘疾人士喺公司做得好開心，自信明顯一日比一日多。
雖然耐唔耐都會有一啲上嚟見工嘅求職者，甚至係客人見到我聘用殘疾人士而顯得猶豫，或者展現出嫌棄嘅表情，但係我覺得每個人都應該有平等嘅機會去受聘同發揮，所以呢個大方向我會一直保持。