由於我公司唔畀員工累積大假，一定要年年清，如果放唔晒就當自動放棄，咁呢兩年又冇得旅行，就當你去staycation都係頂盡兩三日左右啫，有時夾屋企人同朋友仲會星期六日先去呢，所以搞到個個啲大假頹住拆散嚟放。
有同事鍾意逢星期三拎一日大假，佢話反正冇得旅行，不如返工返到好似消防員咁，返一兩日放一日，等自己開心啲喎，又有同事專攞星期一，或者係拎星期五，DIY自製三連休長假期，半日半日咁清假嘅同事亦大有人在。
我自己嚟到9月都仲有10日大假未清，但據我所知有啲senior同事仲誇張，好似我阿head咁，佢本身一年已經有21日大假，之前佢話拎假都係留喺屋企數手指，所以一直嘆慢板，聽到0+3嘅消息之後，阿head係第一個log in入system度拎假。
公司請假係要經過system去搞，0+3 一出，個system同國泰網站一樣死Server，IT話冇諗過我哋會全體上去做同一個動作，而公司個Server plan係最雞最細最平嗰隻，雖然我唔識IT啫，不過雞還雞吖，有冇可能100人左右都負苛唔到呀……
除咗我阿head之外，仲有其他同事都係動作勁快，Server瓜柴前已經上system拎晒假，其實拎假唔難，最佩服佢哋同一時間約埋friend買埋機票去韓國，另外有男同事組風月團，開埋WhatsApp group（冇錯，個group有add埋我），大家傾緊去大阪飛田新地定係去東京泡泡浴。
Anyway，請假系統癱瘓，個個嘈喧巴閉，老細隔咗陣叫晒咁多個部門嘅tead head去開會，仲以為知道咗有男同事籌組風月團，原來係佢見到有個department嘅人幾乎拎晒同一時段嘅假期，換言之到時成個部門會真空咁滯。
阿head：「我唔敢出聲呀，因為我都拎咗假，system approve埋，不過你哋啲假睇住攞，最好夾下先。」
同事A：「我仲有15日喎，點睇住呀？再睇就cancel晒㗎喇！」
我：「有冇得變錢先，如果唔拎假一係就換返錢，否則就算我哋分開放都係會重疊㗎喎！」
阿head個副手仲好笑：「搞錯呀，如果真係咁計，我都有十幾日喎，想聖誕前後同老婆去個旅行，你頭先係咪拎咗假，放幾時？」
阿head笑得好尷尬：「我？我拎咗12月中至12月底，到時半個月都見唔到我。」
嘩！你好唔好意思呀？自己就拎假橫跨成個聖誕，我哋個個都有雙位數嘅假期未清㗎！
可能老細都知道大家積埋啲假期太多，0+3之後又群情洶湧，想完全冇重疊真係好難，佢好驚公司嚟緊會出現請假潮，繼而陷入無政府狀態，但又唔肯將假期換錢，所以放工前已經叫HR出email，話之後可以累積大假一年，例如今年放淨10日，下年就有原本嘅大假加10日，不過帶落去下年呢10日就唔可以再累積，仲叫IT改一改個system，等個系統識得自動計數。
聽HR講，如果轉policy，正常程序係要再簽過合約，因為同大家當日所簽嘅條款有出入，第日有咩爭拗對雙方都唔好，所以星期一可能要全部同事再簽一次contract，竟然搞到咁大陣仗！
我個人都係睇定啲先，0+3好似有少少搵笨，當然係慳咗檢疫酒店嘅錢，亦可以返自己屋企唔使出去住，但係中途要檢測要盛，政府啲嘢又五時花六時變，加上啲機票都陰陰濕濕加晒價，如果公司星期一真係再簽合約，大假可以累積一年，咁我寧願睇定少少喇。
不過0+3出咗之後，同事已經冇晒心機做嘢，個個部腦都係睇緊機票網，再唔係就周圍打畀friend夾假旅行，我估星期一都會維持呢種狀態。