以下全部化名，有個已經走咗一年嘅女同事叫Vincy，坦白講，唔算好靚，不過笑起上嚟就幾甜，有日本妹feel，雖然佢唔高，仲可以話係偏矮添，但佢身材真係超級出眾，即使著到好密實仍然好誇張，有時稍為性感啲更加不得了。
Vincy只係文員一名，20幾歲嘅妹妹仔，好junior，所以佢離職對公司係完全冇影響，第二日已經請到人代替佢，不過對於男同事嚟講就係一大損失喇，始終我哋office後生女實在唔多，所以啲男仔對Vincy係念念不忘。
可能係念念不忘，必有迴響，有個咸濕仔同事竟然相隔咁耐之後，無意中見到Vincy轉咗行喺網上賣相同埋做私影，其實咸濕仔同事應該係成日搵呢類資訊先至會發現，但係已經冇人想知個過程係點，大家只係關心啲相。
Vincy除咗用另一個名喺IG自設fans page同聯繫之外，裡面嘅info亦寫低咗佢有一個平台叫patreon，畀咗錢就可以睇到佢post上去嘅性感相，另外仲有聲稱係大尺度嘅video，呢啲係要另外再畀錢去unlock先睇到。
咸濕仔同事有課金去Vincy個patreon，不過佢話唔會畀我哋睇，一來要尊重Vincy（講呢啲），二來佢都要維護返自己權益，冇理由自己畀錢然後其他人免費睇晒內容，嗱，咁講就合理好多，亦都同時保障緊Vincy嘅收入。
Vincy個patreon有公開post幾張免費唔使畀錢就睇到嘅相，咁樣做應該係宣傳啦，始終都要畀多啲人認識佢，另外仲會見到有幾多個patron（簡單嚟講即係課金嘅人數），雖然Vincy後來閂咗呢part，再睇唔到有幾多人訂閱，不過我哋一開始嗰陣已經見到有一百三十幾人課金喇。
Vincy仲分咗幾個tier，例如課金US 10就只可以睇普通相，US 20就可以睇大尺度嘅相，US 30有埋不定期發佈嘅video，US 50又有佢著過嘅內衣或者絲襪贈送，當佢拉個中位數，平均每個課金嘅人畀US 25，換算港幣即係HKD 196，再乘130個人訂閱，因為係月費，呢度都每月袋$25,480，呢個數字唔係我計，都唔係咸濕仔計，因為我哋只關心啲相係咪真係大尺度，所以Vincy賺幾多，係佢以前個阿姐計。
佢前阿姐知道咗呢件事之後都有湊熱鬧，並且focus喺Vincy賺幾多錢呢個問題上面。
Vincy前阿姐：「有冇搞錯呀？影幾張相，露下個胸，咁都有兩萬幾蚊一個月？咪仲搵得多過以前喺度做？呢條女做嘢唔係好掂咋喎，嗰陣覺得$15,000人工都畀多咗佢，叫親佢OT又不情不願，咦，可能唔止喎！隨時有人再另外畀錢買佢啲片。」
我忍唔住插嘴：「咁每個人都有自己嘅方法賺錢嘅，Vincy仲有IG呢，佢喺嗰邊會接啲影相job㗎！」
Vincy前阿姐：「係呀，都未計佢同人影相，我睇過啦，佢話自己個booking都full full地，嚟緊一個月冇期，叫人提早約吖嘛，知唔知呢啲影相job幾錢呀？」
我：「唔知喎！」
咸濕仔專家上身：「私影job睇你點影啦，同佢deal㗎啫，普通出街影可能幾百蚊，著性感衫或者去studio酒店影就四位數走唔甩，咁Vincy都話自己個期好full，我估佢私影應該賺得多過patreon賣相。」
我：「咁清楚嘅你？有玩開私影㗎？定係你搵咗Vincy去私影？」
咸濕仔：「未，不過想搵，唔知佢會唔會接，始終大家係舊同事，可能怕尷尬，我都想DM佢好耐，一陣就send個msg問下先。」
Vincy前阿姐：「咁我保守估計佢影相又賺一樣嘅錢，兩邊加埋咪每個月5萬幾？大波真係大晒咩！你睇佢IG啲post，就咁擺幾張三點式出嚟都有幾百like，我平時分享啲好deep嘅生活嘢都係得十幾廿個like咋，香港真係好多咸濕佬！」
雖然唔同部門，不過我都想叫佢一聲阿姐，人哋分享嘅係deep V，你分享咩生活好deep嘅嘢呀？冇人想知冇人想睇呀！呢種deep點同嗰種deep呀？幾廿歲人同個妹妹仔比較？得香港多咸濕佬咩，外國嘅生態都係一樣㗎咋，第一日先知大波妹吸like呀？瞓咗幾耐呀？
Vincy前阿姐仲未講完：「我真係平衡唔到囉，咩都唔識，咁樣影下相賺幾皮嘢一個月，我做得咁辛苦都冇，憑咩呀佢？」
真係寸佢都嫌廢事，你肯賣相都未必有人肯買啦，唔係想踩低呢位阿姐，但佢有一個道理唔明白，Vincy又冇偷又冇搶，佢用自己嘅方式搵錢，一樣有付出努力，而且代價就係會畀見到嘅人評頭品足，呢啲又係另一種壓力，所以唔需要比較，換轉我係女仔都冇Vincy嘅心理質素，唔使睇唔起人，亦唔需要唔抵得人。
或者對於Vincy嚟講，又賣相又賣video又接私影，呢個收入同付出都仲未係正比例，不過有一點可以肯定，其實每個人都有自己嘅優點同缺點，長處同短處，Vincy之前返我哋呢度只係好普通嘅職員，或者係工種限制咗佢啫，而家搵到佢自己覺得開心嘅賺錢方法，其實有咩問題呢？佢又冇害人。
個阿姐冇必要將自己同Vincy比，正如我身邊有個friend係做紮鐵，表面上日薪好高，有工開嘅時候月入可以係我兩倍有多，之但係呢個friend嘅工作係好辛苦同埋有危險性，你淨係睇帳面條數根本冇意思，人哋背後嘅辛酸同付出你又睇唔到㗎啫！