出完差返嚟諗住搵阿源，想問清楚佢因咩事返工返到要偷走，點知佢快我一步，落咗機等緊行李嘅時候就收到電話：「對唔住呀老細，辜負咗你期望，因為唔敢面對你，知道親口同你講實唔會畀我走，所以我先會趁你出trip唔做。」
我：「你冇對我唔住，不過點解要走先？返工返得唔開心咩？同事對你唔好？我叫咗Ricky唔好畀咁大壓力，頭幾個月唔使set target，應該唔係好辛苦啫，肯定比你以前做倉舒服好多㗎喎，人工仲高啲添。」
阿源：「同事對我好好，特別係Ricky，佢真係好比心機教我，只係我覺得自己唔適合做Sales啫，唔使追數都好大壓力，又唔鍾意搵人傾生意。」
我：「咁你而家搵到工定係點？」
阿源：「未呀，仲搵緊，我唔係騎牛搵馬，真係覺得唔適合咋。」
我：「不如咁啦，你返嚟做……」
阿源：「唔係哩，Sales我麻麻。」
我：「都未講完，返嚟公司做，唔使你做Sales，CS好唔好呀？我哋CS其實即係跟單，唔使對客，得Sales同你接觸開單同夾貨期，唔使你去應酬咪冇嘢好驚囉，後生仔冇嘢做好頹廢㗎，聽我講一次，聽日返嚟！」
衰仔原來唔鍾意做Sales，好易話為啫，公司咁多部門，除咗IT同會計之外，其他department事在人為啦，阿源講到底係我恩公，救過我阿媽，點可以睇住佢失業呢？如是者，呢次係阿源第一次偷走，亦係我第一次捉佢返嚟。
以為阿源做CS「玩自閉」就冇問題啦，點知佢返嚟做咗一個月多啲又遞辭職信，呢次進步咗少少，識得send封email畀CS個阿頭再cc埋我，個衰仔仲要準備好支票，話想即走賠一個月人工。
我：「好多錢呀你？做一個月，賠一個月，咪即係白做？你係咪搵到工先？唔怕老實講喎！」
阿源：「唔係，不如咁啦，你收咗張支票先，橫掂今日星期五，你畀我考慮多兩日啦。」
畀佢考慮多兩日，即係畀佢逃避多兩日，先由得阿源放工，但係星期六我就捉咗佢出嚟食飯，當佢仔咁教。
我：「有冇聽過一句說話，永遠唔好用『鍾意』去揀工作，我見過好多啱啱畢業嘅後生仔，一開始都係好好，因為新鮮感吖嘛，然後過咗3個月，熱情開始減退，半年後，又到樽頸位，跟住辭職搵工，成世人都重複呢個循環，唯一分別只係中間嘅過程長咗，你係咪想咁吖？做倉係體力勞動，唔通你想做一世咩？」
阿源冇出聲，咁我繼續：「用鍾意或者唔鍾意去揀工搵工，係一件好危險嘅事，呢句說話唔係我講㗎，稍為有啲經驗都會知，你要改變呢種心態，慢慢去發掘份工有咩值得你留低，CS唔鍾意係咪？再幫你睇下有咩department要人啦！唔好咁易放棄呀後生仔。」
阿源：「唔使轉部門啦，我再試下。」
我：「咁先係吖嘛，詐騙集團你都唔驚，使咩驚跟單呀？啲單死物嚟之嘛！我真係覺得你應該趁而家學多啲嘢，搵多啲錢，所以唔好嫌我呢個阿叔咁煩，我為你好咋知唔知？」
呢次係我第二次捉阿源返嚟，最終佢又做多半年，一直好平靜，每次我經過CS都見到佢埋頭苦幹，我以為自己引領咗阿源行一條比較舒服嘅路，點知佢竟然喺公司即將出bonus前第三次辭職，今次阿源再進步多少少，因為佢拎住封辭職信直接入房搵我。
阿源：「我唔做喇，多謝你一直以嚟嘅照顧，呢次我唔留低喇，因為真係搵到工。」
我：「搵到工？咩工嚟㗎？幾錢人工呀？係咪高過呢度好多？我可以加畀你。」
阿源：「我做返倉，人工少過呢度㗎！」
我：「返倉有前途咩？你知唔知我哋就出bonus㗎喇，咁都唔等埋？」
阿源：「我知，不過嗰邊係朋友介紹，我覺得好啱自己，如果再等就未必有位喇，始終倉要請人唔難，坦白講，呢度好好，只係我對住文件同數字就唔舒服，我都唔係食呢行飯……」
其實我有啲嬲阿源唔長進，好好地一份office工唔做，人工仲要少咗，當時真係有種恨鐵不成鋼嘅感覺，但係佢已經第三次提出辭職，我亦拉咗佢返公司兩次，算啦，即使係報恩，我都總算喺阿源最需要工作嘅時候照顧到佢，冇理由困住佢一世嘅，有強姦冇焗賭，更加冇焗做。
我：「好啦，今次唔勉強你喇，我阿媽兩日前先問起你，遲啲約埋你同佢老人家一齊食餐飯好唔好？佢係咁話你好乖仔，叫我提攜下你。」
阿源：「冇問題，不如我請食飯啦，多謝你請我做嘢。」
我：「邊有員工請老細食飯㗎，不過你都就快唔係我員工，邊個請都無所謂啦，你新公司邊頭呀？」
阿源：「過兩條街咋，個倉仲要喺地下，隨時行過嚟搵我食lunch都得㗎喎！」
由認識阿源開始，從未見過佢同我嘅對答係咁流暢同開朗，仲睇得出有一絲興奮，乜離開我公司真係咁開心咩？
說好的同阿媽一齊約阿源食飯遲遲未兌現，因為我真係好忙，不過有一日我約咗個客晚飯，見仲有少少時間所以特登行去阿源嗰頭，隔兩條街，個倉喺地下……正想打畀阿源，原來我已經行到，仲見到佢好開心同同事玩緊。
阿源呢班做倉嘅同事夾雜住南亞人，有啲就成手紋身，雖然個個啲樣都兇神惡煞，但佢哋一齊做嘢嘅時候又個個都笑得好開心，呢種笑容喺阿源面上出現就特別陌生，我從未喺自己公司見過佢咁樣笑，特別係第二次拉佢返嚟之後，即係喺CS再留低嗰半年。
忽然覺得當日自己食古不化，點解一定要返office先算成功，點解做寫字樓先算舒服嘅路，其實做倉又好，任何行業都好，你身處其中一樣可以有自己嘅規劃，唔係著西裝打呔先叫人生贏家，呢啲不過係世人嘅傳統睇法同印象。
或者我未去到耽誤阿源嘅前途咁嚴重，但就肯定耽誤咗佢過一啲自己喜歡嘅生活，甚至剝奪咗佢揀職業嘅自由，快樂唔應該只得一種模式，成功定失敗亦唔係用出幾錢糧去衡量，好開心見到阿源做緊一份自己鍾意嘅工。
你呢？你係努力愛上自己份工，定想搵一份你鍾意嘅工？