有個新同事返工，佢好外向同埋活潑，仲主動提出新嚟新豬肉，要請大家一齊食lunch，我哋話唔使啦，咁多人其實好甘，同埋呢啲梗係有大食大，等team head請啦，冇理由要個新人第一日返工就出錢請客㗎嘛！
呢個叫Debbie嘅新人絕對係開心果，welcome lunch好有禮貌咁通知部門同事去，再順便打招呼，不過當佢邀請一位叫Jacky嘅男同事嗰陣，對方就答佢：「我唔去喇，你哋食得開心啲吖，平時做嘢有咩唔明都可以問我。」
Debbie日日都吹雞叫同事食飯，性格真係好開朗，不過叫親Jacky都唔去，久而久之Debbie亦冇再特登叫Jacky喇，直至有一次大家去咗間餐廳食飯，食到一半Debbie忽然好似發現新大陸咁。
Debbie：「坐喺角落頭嗰個咪Jacky，做咩自己食咁悶呀？我見佢平時唔join，呢排冇叫埋佢，等我而家去叫Jacky過嚟先。」
喝都喝唔住，Debbie已經成支箭咁衝咗去搵Jacky，離遠見到Jacky笑笑口同Debbie講咗幾句，仲向我哋呢個方向點頭打招呼。
Debbie返埋嚟嘅時候有啲挫敗：「明明我哋呢邊有位，Jacky都唔過嚟一齊食，其實佢會唔會係唔鍾意我？」
我：「點會呀，你覺得佢對你態度好差咩？」
Debbie：「唔係呀，佢好好禮貌㗎！」
我：「咁你平時問佢嘢，Jacky有冇教你吖！」
Debbie：「有呀，仲教得好細心，咁先唔明，點解寧願一個人食都唔同我哋食嘅？」
我：「性格問題，冇得解釋㗎喎！」
Debbie：「係啫，唔係成班人一齊有講有笑開心啲咩，頭先喺office仲同佢傾緊工作，而家叫都唔過嚟食，好奇怪囉！不如聽日叫埋Jacky同我哋飲茶吖，我都好耐冇飲茶喇，多個人又可以叫多啲點心。」
我：「冇影響工作咪得囉，點解要介意Jacky自己食定係同我哋食呢？你可以邀請佢飲茶，但唔好強迫佢去，唔好畀壓力Jacky喇，食lunch唔一定要拉大隊先至開心嘅，歌仔都有得唱啦，其實自己一個更開心吖嘛！」
Debbie好似百思不得其解，可能佢嘅性格比較好動同埋鍾意一大班人柴娃娃，但係每個人與生俱來就係唔一樣，你鍾意多人熱鬧，亦有人鍾意寧靜獨處，冇分錯與對，只有分邊一樣令自己更舒服。
結果第二日Debbie又真係死纏爛打係咁叫Jacky一齊飲茶，我見到Jacky不斷推卻嘅時候，笑容都變得尷尬同僵硬喇，所以我就出「口」解圍：「你唔好咁煩啦，Jacky有女朋友㗎喇，佢唔會鍾意你㗎！」
Debbie：「我唔係咁嘅意思呀！」其他同事都笑晒，叫佢唔好再纏住Jacky，件事先至告一段落。
我哋本身班同事好了解Jacky，因為大家都經歷過叫佢食飯，亦習慣咗Jacky鍾意一個人食飯，佢想同我哋食自然會出聲㗎啦，明知佢性格係咁，你日日叫佢一齊去，又問佢做咩唔跟大隊食lunch，其實都係一種壓力嚟㗎！
唔好話Jacky，我有時都想自己一個人食飯，唔係討厭同事，亦唔係咩反社會人格，純粹係工作太忙太煩，真係好需要私人空間，想自己靜下，我間公司算好喇，圍內好少講是非，通常傾閒計，所以我先願意一齊食lunch。
以前做過一間公司，食親晏就好多人有意見，又要就呢個，又要就嗰個，食飯有時係猛咁講是非，有時就成班人同枱但各自玩手提電話，講到尾大家都係想去餐廳有人陪，唔想畀人見到自己一個咁無聊，但係時代唔同咗啦，莫講話lunch，就算係dinner都大把獨行俠自己食，其實一啲都唔會怪相，如果覺得怪相，只係心魔啫，咩年代呀，仲興聯群結黨㗎咩？
所以上一份工我做到後期都開始自己食，食完仲可以散下步先返office，無拘無束唔使就人，幾爽！選擇自己最舒服嘅方式去生活，呢樣先至最重要。