唔知大家嘅公司有冇中秋節派月餅嘅習慣，但係如果好似我公司咁樣派法，咁就真係寧願唔要好過要，佢哋係跟你個職位等級去分派，高層每人有一盒月餅，Senior嘅就可以分到一個至兩個，至於Junior就係~~~4分1個。
唔係唔抵得，其實我本身就唔多鍾意食月餅，由細到大如果係冰皮都ok，傳統我就反而麻麻地，點知噚日喺office竟然聽到阿姐同我講：「Ceci，你同阿Joy一人切4分1好喇，你哋幾個拎去pantry分咗佢啦！」
嗰陣食完lunch冇幾耐已經飽到上心口，同埋我真係唔啱嗰啲乜黃蓮蓉月，所以我同阿Joy你眼望我眼，4分1？切完即刻食定係搵保鮮袋包住拎走？我哋唔想要喎！阿姐見我哋冇郁手，又催促我快啲切咗佢。
我：「唔使喇，我仲好飽，不如留畀其他同事。」
阿姐：「4分1有幾多呀？切完就食咗佢啦，一陣老細見冇人食就唔好啦。」
估唔到食月餅都要顧及老細鍾唔鍾意。
有個比我更新嘅男同事好有guts，佢直接同阿姐講：「得4分1咁少，我以前公司每個同事派一盒喎！」
阿姐又同佢妙問妙答：「咁你咪畀心機做嘢囉，好似我咁咪有一盒囉，有月餅派仲想點，出面好多公司直情冇添呀！」
男同事：「我都留畀其他同事啦！」
阿姐：「你哋唔好咁煩啦，一啖咪食晒囉，整色整水，唔食就拎返屋企，嗱嗱聲分晒佢。」
講到我哋班Junior同事好恨食你個月餅咁，冇錯，唔係間間公司都有得派月餅，不過要分等級就好肉酸囉，同埋唔食都唔得？而原來公司個OA同埋Pantry姐姐直情係冇得分，請問一盒月餅幾多錢？你又唔係大酒店嗰啲，普普通通一盒200幾蚊好未？至少分一個畀人啦！
有啲高層仲要成盒月餅周圍拎嚟拎去炫耀，收埋啦唔該！結果我哋幾個Junior都係冇食，將一個本身畀我哋分嘅月餅就咁用保鮮紙包住，直接畀咗Pantry姐姐。
食唔食月餅係一回事，但係一間公司嘅階級觀念咁重就真係令人好唔舒服，有冇諗過啲Junior同埋低級職員有咩感受？唔通因為想要一盒月餅而努力工作搏升？其實你唔派反而冇乜嘢，冇人貪你嗰嚿月餅㗎！
最頂癮係夜晚放工返到屋企樓下，看更叔叔叫住我，佢話公司一人派咗一個月餅，不過佢因為膽固醇超標唔食得，本身想畀我老豆，點知見唔到，唔知我老豆係未返嚟定係冇出過門，然後塞咗成個月餅過嚟，估唔到看更叔叔對我仲好過老細。