作為一個HR，想搵份好嘅resume唔算難，大把有料嘅candidate，只要公司出得起錢，福利正正常常，喺香港點會搵唔到人呀？所以我請人最大嘅難度反而係來自line manager，應該咁講，係我公司嘅一位麻煩manager，個candidate幾適合都冇用，因為過唔到佢嗰關。
呢位麻煩嘅line manager叫Nicolas，早排佢個department要人，咁咪問晒佢啲要求，然後出招聘廣告囉，足足登咗隻ad一個月，收嘅CV約莫80幾份，遞畀佢揀嘅都有十幾廿份，全部都冇晒下文，咁你見又好，唔見又好，麻煩講聲吖！
喺招聘網站登廣告請人係有時限㗎，個ad愈出得耐就愈沉底，因為其他公司一出新ad就會覆蓋你隻廣告吖嘛，所以頭幾日一定最多CV收返嚟，然後就會慢慢變少，到期就下架，如果仲未搵到人就要嘥多個quota再出過。
唔知佢想點，我梗係直接問啦：「Nicolas，嗰廿份CV都冇個啱呀？咁耐都唔見你叫我約人上嚟嘅？」
Nicolas：「麻麻地。」
我：「跟足你要求㗎喎，3至5年經驗，大學畢業，如果隻ad出得唔準，你一係講多次requirement我聽，我幫你再出啦！」
好明顯Nicolas聽得出我唔耐煩，只見佢喺嗰廿幾份CV裡面好辛苦咁揀咗一份，喂你請人啫，揀老婆咩，同埋你見下先啦，睇CV同埋見真人係兩回事嚟㗎，堂堂一個department head唔係要我教返你轉頭呀？
我：「不如你揀多兩三個啦，其實呢堆CV個個都幾好㗎，起碼見多幾個先有比較吖嘛！」
然後Nicolas又死死地氣喺枱面疊CV度搵多兩份出嚟，究竟你有冇心請？究竟你個部門係咪要人㗎？我都好多嘢做㗎！
佢千辛萬苦揀咗3份CV，我亦都約晒3個candidate上嚟見，先過我嗰關，全部都係預期之內，學歷同經驗都勝任，咁就直接pass去畀Nicolas做埋個second in啦，點知最後3個candidate都唔要，係我冇眼光，定係你眼角高呢？
我：「呢個3年經驗，人工仲要求同上一份平手，點解唔啱嘅？」
Nicolas：「3年都係唔多夠，太嫩，3年內仲要轉咗兩份工。」
我：「OK，咁呢個呢？5年經驗，講嘢好淡定。」
Nicolas：「佢之前喺我哋嘅competitor度做，好敏感，點知係咪競爭對手搵人嚟攞料。」
我：「咁但係你要3至5年相關經驗吖嘛，上次你講嘅時候我有寫低㗎喎，咁有相關經驗就一定做過同行㗎啦！」我差啲想講埋，唔通之前未做過，然後剪臍帶嘅時候已經帶住3至5年經驗投胎出世？如果唔係咁，啲經驗邊度爆出嚟呀？
Nicolas：「再睇下有冇適合嘅CV先啦，唔急在一時。」
我：「冇CV喇，隻job ad完咗喇，係咪要出多隻吖？你一係畀過啲requirements我，如果我出返一模一樣，啲人實唔啱你心水，其實你想請個咩人？」雖然我笑住問，但佢冇理由唔知我有啲水。
Nicolas：「唔使啦，總之你照出一模一樣得喇。」
睬佢都生臭狐，你諗掂自己想要啲咩人先啦，我出job ad又浪費一個quota，收埋啲CV返嚟你又唔見，3至5年經驗係你講嘅，然後3年就嫌人太嫩，5年就嫌人做過競爭對手，冇經驗你又唔要，點搵呀？出10隻job ad都 搵唔到你要嘅人啦！
然後隔咗幾日，Nicolas忽然主動搵我：「你循例約佢上嚟in一in吖！」
雖然Nicolas同時間遞張紙畀我，不過當時我係get唔到佢講咩：「邊個佢呀？循例約邊個呀？」
接過Nicolas遞嚟張紙，原來係一份CV，咁呢份CV又係邊度爆出嚟㗎？我冇收過喎！
我：「喺上次疉CV裡面㗎？我冇印象有呢個人嘅。」
Nicolas：「我以前公司啲下屬嚟㗎，佢直接畀份CV我，你梗係冇見過啦，佢噚日啱啱last day，可以即刻返工，你循例叫佢上嚟見一見，填張form啦，人工你照畀佢寫住嘅expected salary就得㗎喇！」
你之前揀個candidate見工都好似揀老婆過人世咁，而家又咁草率……我終於明喇。
根本Nicolas就一心想搵自己啲人入嚟，但係又唔好意思講，整古做怪叫我出job ad又份份CV都唔睇唔見，冇經驗又彈，有經驗又彈，原來一早就有晒定案同埋人選。
其實你想自己埋班冇問題，職場都好常見，不過唔該早啲出聲吖嘛，我睇一份CV可能一兩分鐘，人哋打份CV可能用好長時間慢慢砌，仲要嗰3個上嚟interview嘅candidate都係有份工在身，特登請半日假過嚟，你咪鬼咁冇陰公啦！
有啲candidate見工衰咗，可能仲會影響埋自信心，因為明明in得好好，條件又適合，最後不了了之，人哋搵份工啫，欠咗你咩，請半日假都要成本㗎！