幾個月前有位叫Kenji嘅新同事加入，懶得幫佢改名，直接出Kenji啦！佢真係好犀利，以一己之力顛覆公司嘅傳統，成為咗老細嘅新寵兒，亦同時做咗好多人嘅公敵，即使我同Kenji唔係同一個department，但係都覺得佢好乞人憎，連帶對日本嘅印象都差咗。
首先我唔係做日本公司，隔籬部門請咗Kenji返嚟純屬巧合，佢之前喺日本讀書，畢業後就喺東京做咗幾年嘢，聽講因為後來冇做，又搵唔到新公司，簽證過期就迫住要返香港，而家話要儲幾年錢先，長遠都係想再去日本發展，是但啦！人哋私事我唔想理，但呢個Kenji就搞到大家好唔開心。
某日Manager忽然同我哋班同事講：「4月開始，大家臨放工要send個report出嚟，講下自己今日做過啲乜嘢，最好有埋時間，for example 12點完成咗啲乜，3點又做咗啲乜，總之係一個簡單嘅工作匯報。」
簡單？有晒時間線，又要講到咁詳細，搞邊科呀？無啦啦點解要整呢啲嘢先？
原來新同事Kenji喺佢部門嘅WhatsApp group每日send工作匯報，話之前喺東京返工會咁做，又話呢啲係日本職場文化同傳統，好衰唔衰Kenji嘅上司喺例會同老細講，而老細聽完覺得咁樣做好好，所以希望全公司試行……
我：「試咩行呀？日本有日本嘅職場文化，我尊重唔代表認同，呢度係香港喎，香港就唔可以有自己嘅文化？」
Manager好無奈咁答我哋：「鬼唔知成件事好戇居咩！慘得過老細buy呀！老細聽完覺得好high，好欣賞日本職場文化，我仲慘啦！我自己都要寫，然後每日集合晒你哋嘅report，再畀個summary老細，多得個Kenji唔少！」
邊個老細聽到唔興奮呀？High還high吖，閂埋房門打隻飛機咪算囉！有乜理由喺香港要行日本呢套？我就唔信老細會日日睇晒全公司同事嘅report喇！
最初諗住呢單嘢三分鐘熱度，點知公司嚟真，有幾個其他department嘅同事試過放工冇交，第二日即刻畀人警告，IT嗰邊更加有人畀高層兇，話唔交工作匯報就當佢嗰日冇做嘢。
咁都未算荒謬，更誇張嘅係過咗一排之後，老細話我哋冇禮貌，原來又係Kenji條蛋散，佢平日對住老細講早晨或者打招呼嘅時候會鞠躬，Kenji話呢啲係日本職場禮儀，仲話喺日本會向高級過自己嘅人、前輩，同埋客戶講敬語，可惜廣東話冇敬語，不過已經習慣咗一路打招呼一路鞠躬，返到香港改唔到喎！
不幸中之大幸係老細冇強制大家鞠躬，只係有比較就覺得Kenji特別有禮貌咁囉！
Kenji又話喺日本做嘢嘅時候，每次離開座位都會棟個牌話畀人知行開咗，呢個係佢東京公司嘅規矩，老細聽完又讚好呀！即係點呀？去廁所棟個牌？去pantry斟水棟個牌？使唔使好似返學咁，舉手問miss可唔可以小便呀？
最嬲肯定係班Sales，因為佢哋成日去煙break，如果將來要跟呢一套就精彩喇！暫時未使，遲下唔知。
聽聽話話，咩都服從，老細梗係鍾意㗎！學埋日本人土下座好唔好？做錯嘢跪低道歉，滿意未吖？總之成班同事就怨聲載道，有人甚至認為Kenji表面上扮跟日本職場禮儀，實際上就係擦鞋。
我唔揣測Kenji嘅目的係乜，淨係知如果份工要向老細鞠躬，去廁所都要棟個牌交代，咁我寧願轉工喇！而家每日要寫工作報告已經有好多同事不滿。
唯一令我「安慰」嘅係，Manager透露過Kenji係全公司人工最低嗰個，聽講佢見工已經填到expected salary勁低，原因係Kenji喺日本做嘢嘅人工扣晒咩年金保險之後，大約只有hkd 11,000至12,000到手，所以expected salary就填13,000，啱㗎喇！老細最鍾意呢啲！唔係想人衰或者睇唔起人，但你已經咁低人工，好心就咪搞咁多嘢累街坊啦！（完）