公司近年離職率好高，差唔多每個月都有同事辭職，實不相瞞，我自己都係入職人事部半年，但我個department已經有兩個同事轉咗人，最大原因係長期OT，大假又少，所以呢度好多人嘅心態係騎牛搵馬，包括我在內，平時行過同事啲位會見到好多人睇緊求職網，奇景嚟㗎！
鑑於離職頻率太高，老細捉咗我哋人事部開會商討對策，其實有咩對策啫，最簡單咪係加人工同埋改善福利囉！最好就每個部門加人手，咁樣工作量自然會降低啦！但老細認為加人工治標唔治本，仲計埋條數畀我哋睇－－－公司廿幾個同事就算一人只係加500，一個月開支都會多咗萬幾蚊，一年即係多咗十幾萬。
咁我以為老細有咩高見啦！估唔到佢提出咗一個驚天地泣鬼神嘅方案……每個同事送一隻狗！我相信呢個唔係靈光一閃嘅提議，因為老細連條款都諗埋。
老細：「嗱！將來個同事辭職，咁就要還返隻狗畀公司㗎喇！如果你係愛狗之人，咪唔會輕易辭職囉！呢個仲關乎感情問題同埋責任感問題。」
其實我一早知老細有養狗，唔止一隻添！佢無理由唔知愛狗之人基本上唔主張買狗㗎喎！我冇寵物都知道最好係領養啦！不過咁，領養又係另一個層面嘅問題，首先同事住緊嘅地方畀唔畀養寵物先，莫講話公屋唔得，就算租私人樓，租約都未必准你養啦！
老細冇考慮過細節，佢嘅環境可以住洋樓養番狗，唔代表班員工可以㗎！更何況人人都鍾意狗仔咩！
我明老細條縮數點計，如果佢真係打算買狗畀同事，我相信平均一隻幾千蚊？甚至佢有其他渠道購買亦唔出奇，但加人工畀同事就係一筆長期性支出，而且有啲人又唔止加一千幾百呢，小數怕長計，所以就提議用送狗呢招留住員工。
無論從任何角度去衡量，「送狗留人」都係唔可行，太多灰色地帶，太多潛在問題，狗糧呢？公司係咪贊助先？有病睇獸醫呢？公司會買寵物保險？廿幾個同事，真係送廿幾隻狗？
我一路反對，我阿姐又一路做誇誇群附和老細，係咁話送狗好，點樣好呀？結果呢次會議冇共識，老細話既然係咁，就向每個同事派發問卷，叫大家放心匿名填寫，想知道員工有咩睇法。
做問卷咪仲煩！人多就意見多，一定唔會全票通過啦！如果有幾個人唔接受，咁你強行推呢個計劃呀？
真係畀我估中，print完啲問卷派畀同事嗰陣，已經有幾個人話唔贊成，原因包括驚狗、業主唔畀養、屋企人唔鍾意，仲有一個話啱啱生完BB，怕小朋友對動物嘅毛髮敏感。
有啲友仔喺度搞事，問公司可唔可以唔送狗，改為送貓，有個男同事就問改送蜥蜴得唔得？
又有人問係咪可以自由幫隻狗改名？如果改做老細個英文名得唔得……你係咪反社會人格呀？咁快諗定狗仔名，仲要用老細個名？
有個同事仲犀利，佢問如果隻狗仔過咗身，係咪可以請喪假……你恐佈份子嚟喎！未養已經諗住隻狗死？問得出呢個問題，我覺得你會對隻狗不利囉！
你估下最終廿幾個同事有幾多人支持公司送狗？答案係4個，5隻手指都數得晒！比我想像中更少。
由於支持嘅人太少，但意見就好多，計劃被迫擱置，Yeah！感謝主！老細話咁多人唔想養狗令佢好失望，佢有冇諗過員工對佢仲失望呀？
其實一間公司離職率高有好多原因，例如人工同福利冇競爭力、晉升前景唔明朗、工作量大導致經常超時工作、部門文化、同事係咪易相處，呢啲都唔係送隻寵物就可以解決嘅問題，一係你就送層樓，咁都仲可能心甘命抵同你留低。
我嘅建議係直接加薪啦！目前嘅時勢起碼可以放緩員工離職速度，總之唔會係送狗啦天才老細！（完）