見工遇到個傻嘅HR！面對面Interview當日佢不斷壓價，原因係公司出唔起我要求嘅人工。嗱！講清楚先，我唔係上去填form先寫expected salary，我係send CV過去嗰陣已經寫得清清楚楚，所以你畀唔到我個價唔緊要，點解電話唔講呢？仲約我上嚟見工？
或者你會覺得壓價情況好常見，但我想講佢要求嘅減薪幅度係好大，我last salary 32,000，其實expected salary已經寫返32k，即係平手，而個HR係想我接受24,000呢個薪酬，唔係減一兩千喎，呢度足足減咗25％，講緊減4分1喎！你仲好意思叫我嚟interview？
我聽到都覺得好火滾：「唔可以，我諗呢份工唔適合我喇。」
HR：「你考慮下先啦！我嘗試同老細Fight到26,000吖，應該冇問題㗎！」
我：「26,000都唔可以，就算你Flight到30,000都唔得，我嘅底線係唔低過上一份工。」
HR：「咁嘅市道喎！你有冇睇過出面咩環境呀？我認為你唔需要太執著，因為老闆睇過你send嚟嘅reference，佢好鍾意，人工你ok就可以即時返工㗎喇！」
你老闆鍾意冇用㗎，見工係雙向，人工唔啱就係唔啱，市道唔好亦唔等於要屈就，我寧願再擺啲時間繼續搵下一份工。
隔咗唔記得兩日定三日，呢個HR打電話畀我。
HR：「點呀？你考慮成點呀？我哋老闆仲等緊你答覆。」
我：「冇考慮過喎！上次已經講明唔會接受低過32,000，呢個係我最後答案喇！」
HR：「唔怕老實同你講，有另一個求職者最初同你expected salary差唔多，但我offer 24,000佢都肯接受，你哋連經驗都差唔多㗎咋！」
我：「咁咪得囉，你直接請佢啦！問題解決晒，唔使等我回覆㗎！」
你都講到人哋同我一樣咁高咁大，24,000又肯做，請問仲打畀我做咩呀？
聽到呢度係咪以為完咗呢？好不幸，真係未完，同日個HR又再打嚟，呢次仲荒誕。
HR：「你accept個offer啦，知唔知因為你唔肯做，頭先我畀老闆鬧呀！我仲同佢嘈咗幾句。」
我：「其實你畀老闆鬧關我咩事呢？」
HR：「因為你唔肯降低個人工囉！老闆話我做唔到嘢，說服唔到你呀！」
我：「再重申一次，我expected salary係32,000，少個崩都唔得，你頭先咪話有另外一個求職者肯做嘅，仲未叫佢返工咩？」
唔使問ChatGPT都知，根據我嘅分析，呢個HR九成九係白咭，同我講你畀老闆鬧做咩呀？返屋企同媽咪講吖嘛！
風平浪靜咗兩個禮拜左右，我竟然再一次收到呢位HR嘅電話。
HR：「我哋之前請咗另一個求職者喇，不過老闆唔滿意佢嘅工作表現，炒咗喇！老闆真係好想你加入我哋公司呀！28,000得唔得？」
我真係唔識嬲，反而覺得好好笑，然後覆返佢：「唔使喇，我搵到新工。」
HR：「咁快搵到工？係咪同你之前份糧一樣？我試下再搵老闆講，5點前答你，32,000係咪？如果3萬呢？3萬得唔得？」
我：「如果係你哋公司……4萬都唔得，我唔會揀你哋，請你唔好再打畀我，唔該晒！」
究竟佢公司一早可以出32,000但選擇壓價，定真係為我提高budget呢？我唔知；又究竟有冇嗰位傳說中24,000都肯做嘅求職者呢？我都唔知；我甚至懷疑過壓價未必係老闆嘅原意，隨時係個HR自把自為。
不過唔緊要啦！真心幾多錢都唔會揀呢間公司，我唔想自己入咗去之後都要攞白咭呀！（完）