我：「老婆，見到IT個David送咗份萬幾蚊禮物畀新女同事，我覺得好內疚。」其實我返屋企成日會同老婆分享公司嘢。
老婆：「關你咩事，做咩要內疚？」
我：「咁係我請咗個女仔返嚟，搞到啲同事變晒，Jacqueline返工都未夠一個月，David就洗咁多錢。」
老婆：「你都痴線，男歡女愛，願者上鈎，又唔係你叫佢買，除非係個女仔迫你同事送啫，使乜內疚呀？記唔記得我有個friend叫Libby？」
我：「記得，周身名牌嗰個吖嘛！」
老婆：「佢好高招㗎，睇中啲名牌會send張相畀啲男仔，然後問佢哋靚唔靚，有啲仔真係會買畀Libby，有時Libby又會詐詐諦諦叫啲男仔送，好多時搏到㗎，如果個男仔唔送，Libby就會話自己講笑，邊會真係要人送，好勁㗎佢，呢招進可攻退可守。」
我：「好恐怖，不過Jacqueline應該唔會咁啩，總之我都有少少內疚啦！」
老婆：「咪傻啦，可能David溝到女想多謝你呢！」
至弊溝唔到呢！因為Jacqueline同咗Derek一齊，唔係同David呀！
記唔記得邊個Derek？本身斯斯文文，入咗嚟做之後粗口爛舌嗰個男仔呀！持平啲講，Jacqueline揀Derek係合理嘅，起碼外表順眼，唔似阿權佢哋咁，著起龍袍都唔似太子，件西裝褸有墊膊嘅，起碼都20年前嘅款，柒到唔敢睇。
凡事梗有代價，Jacqueline同Derek係高調宣布拍拖，佢哋Facebook個status同時轉做in a relationship，而且朝朝一齊返工，晚晚一齊放工，愛得咁熾熱當然惹嚟成班餓狼不滿啦，你而家搶走人哋個女神喎！
Jacqueline封盤之後，個別同事打回原形著返牛記笠記返工，貨倉好多人都除返件衫露Lin喇，唯獨是雄哥仲堅持著衫，唔通未放棄積家Lin？
有人意志消沉，有人句句有骨，當然係衝住Derek而嚟啦！
阿恆：「叻啦！有女啦！以後飲嘢唔使預你。」
Carson：「Derek哥而家唔同我哋玩㗎喇！」
Kelvin：「Jacqueline你做咩揀Derek既？我驚你着高踭鞋嘅時候高過佢喎！」
Jacqueline笑而不語，而Derek就選擇沉默應對，啱㗎喇，對住啲葡萄撚唔使咁認真。
阿權就少左出聲，但係枱面出現返馬經，早排唔係話要professional㗎咩，做咩office hour又刨馬呀？
話咁快Jacqueline已經接近做咗3個月，係時候畀佢過試用期喇。
Jacqueline：「唔好意思呀，其實我本身想下星期辭職㗎！」
我：「做得好地地點解要辭職呀？因為同Derek拍拖有說話聽？唔使理出面班友仔㗎！」
Jacqueline：「唔係，我開班教畫畫同埋教整手作仔，老細你係咪有個仔？有冇興趣學畫畫，收你平啲吖。」
我：「我個仔K2咋，唔使住喇，不過你有自己方向都好嘅，祝你順利啦！」
Jacqueline：「多謝你。」
人各有志，咁就無謂勉強，不如諗下再請人搵仔定係搵女仲好，如果請個靚女返嚟似乎唔錯，等班毒L振作下，但又唔希望佢哋再為咗爭女而影響感情，點好呢？
幾隻餓狼喺Jacqueline走咗之後都冇停過挖苦Derek，呢頭問係咪分手或者對人唔好，搞到條女要resign，過兩日又問係咪搞大咗個肚要閃婚，總之喺佢哋口中係唔會聽到任何祝福，全部都係衰嘢。
不過話題始終有完結嘅一日，replacement我都請埋喇，係一個已婚嘅師奶，所以office冇再發生任何劇變，呢班餓狼真係超現實。
某一日Derek敲我房門，個樣煞有介事咁。
我：「點呀？年初四咁嘅樣，唔係連你都辭職呀？」
Derek：「呀……唔係，想問下呢，公司可唔可以借糧？」
我：「借糧？點借呀？做咩要借糧呀？」
Derek：「我張卡一定要聽日找數，如果冇就會畀銀行cut，到時都係要找，仲要搞花個record，另外我有好多嘢係credit card分期，所以唔可以cut卡㗎！」
我：「你欠幾多卡數呀？」
Derek：「35,000咋，唔該你吖老細！可唔可以分期喺份糧扣返畀你？到時出糧你自動扣都得㗎！」
我：「唔係咁㗎Derek，公司要報稅，要報強積金，我唔可以直接扣你糧㗎，啲數會亂，你知唔知強積金你份糧唔同咗，我要喺個system改嘢……我唔係想話你，不過出嚟做嘢咁多年，35,000積蓄都冇？銀行唔會一嚟就叫你清數㗎喎，衰衰地找最低還款額都可以㗎，你連min pay都冇找呀？」
Derek：「唉……」
我：「講啦，大家男人。」
Derek：「本身我有積蓄，咁大個人點會幾萬蚊都冇吖，但係同咗Jacqueline一齊之後就真係使大咗，其實唔止欠幾萬蚊卡數，我仲借咗財仔……」
我：「你個仆街仔，大耳窿都借？」
Derek：「唔係大耳窿，電視有賣廣告嗰啲正當財務公司，其實自己借到都唔想問你，不過前兩個月先借咗十幾個，所以頭先問另一間就唔批，可能佢見我每個月已經還緊8,000蚊。」
我：「有冇搞錯啊！你人工先得二萬鬆啲，每個月要用8,000蚊還貸款？」
Derek：「所以我咪找唔到卡數囉！」
我：「點解拍拖可以用咁多錢㗎，Jacqueline屈你呀？」
Derek：「冇屈，咁佢想買袋，買錶，買電話，我都係自願送畀佢嘅，Jacqueline真係冇屈我呀！」
我：「袋、錶、電話都係有限數啫！」
Derek：「咁個袋都幾萬蚊㗎，上個月買一個，今個月買一個，呢度都用咗8萬幾，另外隻錶2萬幾，同埋我想支持佢開畫室，而家幫Jacqueline交緊租。」
我：「咁都唔係屈？畫室幾錢租？」
Derek：「6,000蚊，嗰度幾大㗎，所以睇完嗱嗱臨畀晒上期按金，總之佢唔係屈啦，我真心想Jacqueline可以發揮到自己嘅專長同興趣。」
我：「咪住，還財仔8,000，租畫室6,000，你每個月硬掘冇咗14,000，點生活呀？」
Derek：「得，咩唔得呀？我人工22,000，減完14,000都仲有8,000，不過之前買得太多嘢回唔到氣，所以先搞到張卡就快畀銀行cut，同埋阿權同Carson佢哋好似仲嬲緊我同Jacqueline拍拖，費事問佢哋啦，唔好意思呀搞到你。」
我：「淨返8,000，當你每個月搭車食飯用2,000，同Jacqueline拍拖又要用錢，一定唔會少啦，咁你畀幾多錢家用屋企？」
Derek：「我同咗阿媽講，暫時唔畀家用住，所以ok㗎喇！」
我：「Jacqueline點會無啦啦要你買兩個咁貴嘅袋㗎，大家都係打工啫！」
Derek：「佢冇叫我買，咁佢send相嚟問我個袋靚唔靚，都係講下笑叫我送啫，係我自願嘅，同埋可以say no㗎，今朝佢又問我另一個袋好唔好睇，我直接同佢講唔夠錢，Jacqueline都有話講下笑，唔係要我送。」
咁似我老婆個friend Libby嘅……
如果我有個仔好似Derek咁，寧願傾家蕩產貼條女，但一毫子家用都唔畀，我真係當生少個冇咁嬲，佢仲要覺得Jacqueline唔係屈佢呢下先好嘢！
結果我私人借咗35,000畀Derek還卡數，雖然知佢唔會有錢淨，但點都要規定佢每個月還1,000，當係分35期，呢種係承擔，仲講明辭職就要提早還晒，唔係要迫Derek喺度做，而係佢走咗隨時搵唔到人，我都要保障返自己。
呢件事唔敢同老婆講呀，因為佢實鬧我借錢畀Derek，但我好想買個名牌手袋畀老婆。嗱！講出嚟唔准笑喎，心態上覺得Jacqueline「路過」都攞咗Derek咁多著數，老婆咁多年仆心仆命照顧頭家，我就連貴重少少嘅禮物都冇買過畀佢，真係過唔到自己嘅心理關口。
結果我特登同老婆出咗銅鑼灣行時代廣場，再帶佢入名店睇手袋。
我：「買啦，我送畀你。」
老婆：「28,000喎！」
我：「你老公我而家畀唔起咩！買啦！好襯你呀！上個月公司做咗單大生意，當慶功。」
老婆：「唔係你買唔買得起嘅問題呀，係唔值！兩萬幾蚊個袋，裝完紙巾銀包唇膏已經擺唔到電話，你話幾戇居。」
我：「咁買個大啲啦，貴啲都冇所謂喎！」
老婆：「真係唔值哩，一陣刮花咗又肉痛。」
最後我哋喺時代廣場買唔到名牌袋，望住老婆孭緊嗰個600幾蚊嘅CHARLES & KEITH，心裡面有種說不出的感動。
有種女人，可以同你鹹魚白菜同甘共苦，就算你已經腰纏萬貫，佢都唔會要求啲乜，借呢個機會多謝我老婆，感激遇上呢個咁純真同樸素嘅女人，我先可以無後顧之憂努力打拚。
至於Derek同Jacqueline…其實冇咩嘅，一個願打，一個願捱，我作為旁觀者都冇咩好講，希望Derek理智啲啦，阿仔，女唔係咁溝㗎！溝得到，條路都行唔遠啦！
（完）
餓狼傳說 1 – 破天荒請女仔公司大變天
https://hkofficedaily.com/?p=18914
餓狼傳說 2 – 男版宮心計每日上演
https://hkofficedaily.com/?p=18923