「好憎公司咁多鬼佬，佢哋成日撩人講嘢，好煩！」
有個同事曾經咁樣同我講，真心唔知點應佢，你嚟見工嘅時候都知呢間公司有幾個鬼佬㗎啦！同埋所謂嘅「成日撩人講嘢」，都係普通嗰啲How are you！純粹平常打招呼，但我個同事都話有壓力。
「次次問我how are you煩唔煩呀？噚日pantry見到又問，今日pantry見到又問，我咪又係答你I am fine之嘛！」
我：「呢啲普通禮儀嚟啫，有咩問題呢？」
「咁我英文唔好吖嘛，有時去pantry斟杯水都好大壓力，如果有其他同事喺度仲麻煩，好似畀人知道我唔識答咁樣。」
我：「你英文好差咩？Interview嗰陣應該人人都會用英文自我介紹㗎喎！」
「嗰啲死記㗎啫，但你叫我對答就真係冇信心。」
咁佢唔鍾意鬼佬都冇辦法嘅，呢啲係個人喜好，但最奇怪係呢位同事原來一聽到外國人打嚟就會cut線，本身都冇人知㗎，直至有一次office好靜，呢位同事聽完個電話淨係「喂」一下，然後唔講嘢就cut線，再離開個位出去唔知pantry定廁所，過咗一陣電話又響，經理就拎起咗嚟聽，對方係一位外國客人，仲話我哋公司電話好難打通，好幾次打嚟都係講咗一句就斷線。
嗰次經理都冇乜點理嘅，以為只係巧合，點知耐唔耐就發生一次咁樣嘅事，客又試過，我哋英國head office嘅同事又試過，然後大家就發現只要有外國人打嚟講英文，又咁啱係呢位同事聽，佢就會即刻cut線再行開。
長遠落去都唔係辦法，結果經理就搵呢位同事傾，得出嘅結論係……下次遇到外國人打嚟，唔好cut線，講句Just a moment please，然後pass畀隔籬左右同事聽。
🤦🏻♂️呢個簡直係斬腳趾避沙蟲嘅方法，但總好過就咁cut線嘅，亦都好過佢講Angel方加，佢聽日返來，冇人識英文。
最正就係呢位同事向經理投訴返轉頭，佢話每月一次嗰個例會好大壓力，希望唔使出席，因為唔明點解個meeting有10個香港人，得2個鬼佬同事，但係成個會議要講英文。
不如唔好講鬼佬，我叫返你大佬先啦！咁嗰兩隻鬼係高層吖嘛，係咪要佢哋用廣東話開會吖，同埋每月一次個例會都唔使你講嘢，列席做陪襯之嘛，唔使咁抗拒喎，雖然呢度係香港，但呢間點計都係英國公司，好難完全避開英文㗎！
勸過呢位同事去進修，出嚟做嘢如果驚英文會好輸蝕，但佢認為冇需要，最近仲辭埋職，雖然佢轉工唔關講英文事，不過都希望佢將來可以下少少苦功啦，英文嘅嘢避得一時唔避得一世，就算唔使同鬼佬傾計，email好多時都要用英文交流，學好語言唔係要遷就人哋，重點係強化你自己吖嘛！
投稿讀者：Miki