投稿讀者：Admin姐姐
公司遲到風氣盛行，其實不嬲都係咁㗎喇，但係疫情下先後幾次work from home，重返office後情況變本加厲，加上唔知係咪天氣凍咗，同事返工時間愈推愈遲，本身返9點，以前已經人人返10點，而家直情推到條線去10點半。
老細有見及此，搵咗我哋Admin開會，我阿姐提議出warning letter（以前從來唔會出）、超過9點半就扣人工，或者超過9點半之後每分鐘20蚊用嚟買零食……等等，呢啲罰則都係大同小異，不過老細就唔鍾意，一來覺得扣錢隨時犯勞工法，二來佢認為咁樣會令同事反感，既然上年疫情咁大嘅難關都闖得過，冇理由而家因為遲到而要令大家唔開心，繼而影響氣氛同士氣。
老細話之前喺LinkedIn睇過一篇文，內容係講有幾間外國公司都用獎勵代替懲罰，準時返工有得抽獎，我阿姐第一個反對，佢覺得準時返工係本份，冇可能咁都要獎勵，但係我哋幾位同事仲有老細都想試下，結果呢個計劃最終實行。
28個人嘅公司，我哋有100張紙仔擺入箱，其中一張係大獎，可以同老細共晉午餐，唔好反白眼住，因為我老細係會請食好西，已經有一個同事中咗，老細同佢去食omakase，兩個人3000幾蚊落樓㗎！不過so far得一個同事中過，因為箱裡面有成100張紙仔，雖然話9點半前返到一定有得參加抽獎啫，都唔保證會抽到好禮物嘅。
最細嘅獎係咖啡店coupon，另外仲有超市50蚊同100蚊現金券、半日有薪假、全日有薪假、餅卡、餐廳coupon、淡雪士多啤梨……等等。
最初幾日實行都唔係個個準時返，特別係Sales嗰邊嘅同事，咩50蚊同100蚊現金券對佢哋嚟講唔吸引，不過推行咗兩個星期之後，慢慢有一種氛圍出咗嚟，特別係同事間互相問起：「喂，你今朝抽到咩？」如果有位同事係繼續日日遲到，咁就日日搭唔到嘴，你知啦，始終有獎品，大家抽完都會係咁討論，而家茶餘飯後都有員工喺pantry用呢單嘢講笑，有人曬下自己抽中淡雪士多啤梨，亦有人自認黑仔連續5日抽中最細嗰份咖啡店coupon。
成個department有得抽有得傾有得笑，如果自己冇份，好無癮㗎嘛！有個Sales就因為呢樣嘢改咗9點半前返到，佢唔係恨你啲coupon，而係想參與，免得平時同其他人吹水冇話題。
或者喺其他老細眼中，準時返工有獎抽係好戇居，呢樣係真嘅，員工只係做返本份啫，但我老細肯將懲罰轉換為獎勵，願意企喺員工角度換位思考，我覺得始終係一項德政。