疫情下各行各業生意一落千丈，我哋做門市Sales更加首當其衝，條數唔靚，公司已經係咁放風會cut人。
我做嗰間舖要cut一個，有啲舖兩個，旺區舖就盡量不變，總之人人自危，我就更高危，因為上年生完BB，放假多過其他同事，performance 自然冇咁好。
Area Manager對我唔錯㗎喇，特登落舖同我傾過幾次，畀晒心理準備，雖然好想保住份工，但唔通賴死咩，當時我同老公都好擔心，我老公做工程，近半年公司迫佢哋班員工7折出糧，如果連我都冇咗份工就真係雪上加霜，諗起奶粉尿片樣樣都係錢，成個人都好抑鬱。
事情後來出現轉機，因為有客人打咗上公司讚我，仲send埋email過去，其實公司無論收到讚揚或者投訴都會同我哋講，喺香港呢個投訴之都，complain嘅case大約佔8成，其實好少人會特登打去讚。
有理冇理都好，公司通常會話咗我哋班員工先㗎喇，好多時仲會因為個客嘅一面之詞而扣獎金，多謝劉華囉！嗰句「今時今日咁嘅服務態度唔夠㗎喎」，全香港嘅服務性行業都好憎你呀！
講返封讚揚信先，個客讚我貼心，見到佢手上另一個袋斷咗繩，主動畀個公司大紙袋佢裝嘢，當時佢係一蚊嘢都冇買，所以形容我冇計較，亦冇用任何說話去催迫佢買任何貨品。
第二日佢又再嚟，仲帶咗幾個同事嚟買嘢，我都對呢個客有印象。佢話當時本來想買多啲，點知我向佢解釋，其中兩件貨品嘅功能係一樣，所以唔需要㗰錢，而且美容嘢始終會過期，提議佢用完覺得好先至再買。
個客喺封email裡面講，我咁樣做並唔係倒公司米，因為買多一件貨嘅銀碼有限，反而留低一個老實形象，以後佢會成日嚟買，亦對我哋個品牌有好感，未來啲生意先係無限。
Area Manager話公司見到呢封讚揚信好開心，雖然舖頭始終要cut一個人，但就選擇唔cut我，改為將我調舖。
做門市Sales要搵過份新工未必太難，最難係重新適應啲人、事、policy等等，仲要重新記過其他公司啲product knowledge，行公佣定私佣亦可以差好遠，所以感激嗰位客人封讚揚信，可能對佢嚟講只係舉手之勞打幾隻字，但係對我，對我家庭，仲有對BB嚟講，真係幫到好大忙，何況而家外面風大雨大，可以留低喺熟悉嘅公司，會煩少好多嘢。
調咗舖之後，我應該冇機會撞返嗰位客人喇，冇機會親口講多謝，唯有祝福佢事事順利，好人一生平安。
如果大家有機會，千祈唔好吝嗇讚揚嗰啲做得好嘅前線員工，你隨便一個讚美，可能會令佢哋多幾百蚊獎金收入，甚至係保住個飯碗。
投稿讀者：Sarah