上星期有單港女喺交友app詳列擇偶條件嘅花生，個女仔被cap圖公開容貌，見到好多人一齊公審，我真係有啲擔心會炒車，因為差唔多嘅事件都喺我公司發生過，唯一唔同嘅只係涉事人係男性。
嗰個畀人cap圖出樣再公審嘅女仔，所列出嘅苛刻條件包括做朋友都要有大學學歷、年過40嘅叔叔請過主、光頭M字額冇興趣，仲強調自己係外貌協會，講到明以貌取人。唔知大家覺唔覺得，post得自己張相又咁寸嘴，可能有借刀殺人成份，其實係有人特登玩佢呢？
我唔識嗰條女，所以我唔評論，可能係真有其人，佢真係有呢啲要求都唔出奇，但我公司幾年前嗰單就肯定係借刀，成件事基本上一模一樣，有個department head（佢係男人）畀人擺咗上交友App，profile裡面嘅擇偶要求有：
唔拍拖，只玩ONS
冇波唔好搵我
可以接受3P
可以玩變態嘢
每次出嚟都一定要著黑絲
本人已婚有仔女，大家開心玩，唔介意你有男友或老公，總之大家唔上身
呢啲要求咁無賴，結果當然同上面個女仔一樣，畀人cap晒圖周圍瘋傳，呢單嘢甚至上過連登，有人喺討論區post咗呢位department head嘅卡片，有齊公司電話、地址、email，嗰幾日間唔中有人打嚟公司，有啲人點名要佢聽，有啲就叫我哋公司炒咗呢個賤男。
平心而論，呢個department head係乞人憎嘅，佢除咗幾個知心友之外，大部分人都唔鍾意佢，因為呢個department head平時好串，仲會當住全世界鬧下屬，又好鍾意邀功，我親眼見過佢鬧到個新人即刻拎袋走，話人哋讀大學但乜都唔識，正一人頭豬腦，當時個女仔係喊住走。
Department head咁嘅作風，得罪人絕對唔意外，問題係你憎佢嘅程度去到邊先？冇返咁上下深仇大恨，應該唔會出到借刀開交友app咁誇張，我哋內部其實一致認為係佢條team啲人。
我唔係左膠，只係呢一著殺錯良民，因為借刀條友擺嘅相，全部喺公司個drive度拎出嚟，清一色係當年annual dinner啲相，我哋當晚特別請攝影師去酒店影，影完就擺晒喺公司內部個drive度，所以開交友app嗰個人一定係同事㗎喇！
嗰啲相牽涉埋其他同事出鏡，我都有份，有張係同佢同埋個司儀一齊影，喂你post埋我上網做咩呀，借刀都幫我打格仔先好唔好？最奇怪係咩呢，啲相涉及好多人，但冇一張影到佢條team嗰幾個同事，心水清都知咩事啦！
後來件事傳到去老細度，老細逐team人叫入房（因為太多人），然後講返發生咗一件咁嘅事，佢自己唔想猜度任何人，只希望同事如果知道邊個做，就幫手叫嗰個人高抬貴手，因為牽連到公司個名。
我哋老細不嬲對員工好好，有同事結婚或者生小朋友，佢甚至會私人畀利是，即使未致於好尊敬呢個老細，不過都冇人會特登同老細作對，總之同大家講完之後，呢單嘢就靜咗落嚟，借刀條友冇發動「第二次恐怖襲擊」。
我唔係話個department head可憐，亦唔係話上星期個女仔一定無辜，不過呢個年代要借刀殺人太容易喇。話時話，經歷咗嗰單嘢之後，個department head明顯收斂咗好多，起碼冇咁串先，亦冇聽過佢當眾大大聲鬧人，似乎係上咗一課。
投稿讀者：King