多嘢做就嫌辛苦啫，冇嘢做又唔滿意呀？
你睇到一定會咁講啦！
我做receptionist，份工真係太得閒太hea喇，試過好多次resign都唔成功，最後要反面咁滯先甩到身。
身邊都有朋友做receptionist，不過佢哋好多嘢做，唔係局限於聽電話同埋招呼walk in嘅人，其中一個friend要幫手打好多文件，聽講個老細用人用到好盡，另一個做receptionist嘅朋友就要做埋admin工作，例如訂水訂文具，我真係唔明點解我份工可以完全冇嘢做。
返工得兩件事㗎啫，聽電話同埋收速遞，太平盛世嗰陣已經冇乜人walk in上嚟，疫情後就更加少啦，Office仲要行AB team WFH，每日得一半人返公司。
得閒到咩地步呢？要日日煲劇打發時間先掂，梨泰園Class、愛的迫降、屍戰朝鮮嗰啲睇過晒，回答吧1988都翻睇多次，紙房子嗰啲梗係有睇啦，Hunter同火影忍者都唔放過，我直情讀埋西班牙文，喺office溫書，但仍然覺得好無聊呀！
煲劇煲到懷疑人生，試過3次辭職，公司都不斷挽留，第一二次當自己唔夠決心，第三次已經講到有病唔舒服，想放一個長假調理身體，不過公司竟然叫我停薪留職兩個月，呢段期間唔會請人，一心一意等我返嚟，直至最近一次，我好堅持話唔想做，講到反面咁滯，佢哋先畀我resign咋。
可能你會話我曬命，人人做到死，我可以他他調調都要嫌三嫌四，但我原意唔係咁呀，因為份工愈係得閒，啲時間就愈係難過，有時覺得返咗工好耐，昂高頭望下先係11點，唔好話放工，放lunch都未有耐，食完飯返嚟飯氣攻心，睇咗10次鐘都係3點幾4點，距離6點放工好似係一個世紀嘅事，成個人都愈嚟愈頹，我廿幾歲咋，唔想咁樣，好怕咁早已經「滑牙」。
我試過返一份忙嘅工，當時係contract，冇得長做，但我其實幾鍾意，眨下眼就放工，係就係有壓力，不過真心學到嘢，覺得自己成長咗，反而做咗呢份receptionist之後，有種山中方一天，世上已千年嘅感覺，或者有日我老咗會喜歡呢類工作，只係現階段仲想學多啲嘢。
太忙雖然辛苦，而其實太得閒都係另一種辛苦。
投稿讀者：Iris